Ermənistanda daşınmaz əmlak yenidən bahalaşıb: Rusiyadan yeni mühacirət dalğası və digər səbəblər
Ermənistanda daşınmaz əmlak yenidən bahalaşıb
Ermənistanda son iki ay ərzində Rusiyada mümkün səfərbərliklə bağlı yayılan məlumatlar fonunda ölkəyə köçənlərin yeni axını müşahidə olunur. Bununla əlaqədar həm kirayə haqları, həm də satışa çıxarılan daşınmaz əmlakın qiymətləri yenidən artıb. Kirayə və satış qiymətlərində orta hesabla 20 faiz artım qeydə alınıb.
Bir müddət qiymətlər demək olar ki, hər gün artırdı və bunu daşınmaz əmlakın alqı-satqısı və kirayəsi üzrə populyar onlayn platformalardakı elanları izləməklə görmək mümkün idi. Xüsusilə kirayə mənzil bazarında böyük canlanma müşahidə olunur. Yerevanla yanaşı, paytaxta yaxın Abovyan, Masis və Nor Açın şəhərlərində də aktivlik artıb.
Gələnlərin əksəriyyəti Rusiyada yaşamış ermənilərdir. Onların öz sözlərinə görə, orduya çağırışdan yayınmaq və son dövrlərdə yaşadıqları qeyri-müəyyənlik səbəbindən Ermənistana köçürlər.
Kütləvi axın fonunda ucuz və orta qiymət kateqoriyasına aid kirayə mənzil tapmaq çətinləşib. Bu, həm də yeni tədris ilinin başlaması ilə regionlarda yaşayan tələbələrin paytaxta köçməsi ilə bağlıdır.
- “Moskvanın əsas qorxusu Ermənistanın Avropa İttifaqını seçməsidir” – rəy
- “Biz sübut etdik ki, Ermənistan quberniya deyil, kəsişmə ölkəsidir”, – Paşinyan
- Ermənistanda inflyasiyanın Rusiyadan relokasiya ilə əlaqəsi nədir?
Rusiya vətəndaşı iş tapıb, amma mənzil tapa bilmir
Dmitri Popov üç həftə əvvəl dostları ilə birlikdə Ermənistana gəlib. İlk dayanacaqları Yerevan olub, daha sonra dostları Lori vilayətinə gedərək Alaverdi və Tumanyan şəhərlərində məskunlaşıblar.
O isə Yerevanda qalmaq qərarına gəlib. Burada tanışları var və hazırda onların yanında yaşayır. Artıq iş də tapıb, Yerevan şirkətlərindən birində kuryer kimi işə qəbul olunub. Hazırda işəgötürənlə əməkhaqqı ilə bağlı danışıqlar aparılır. Bütün bu müddət ərzində Dmitri paytaxtın mərkəzdən kənar rayonlarında bir və ya ikiotaqlı mənzil axtarır. Mərkəzdə mənzil kirayələmək onun üçün çətindir, çünki qiymətlər çox yüksəkdir.
“Əvvəlcə 500 dollara qədər mənzil axtarırdım, indi isə 700 dollara axtarıram. Hələlik heç nə tapa bilməmişəm, çünki mənə minimum şəraiti olan mənzil lazımdır, mebel, məişət texnikası. Hətta orta səviyyədə təmirli mənzil təklif edəndə belə, məlum olur ki, orada soyuducu, paltaryuyan maşın və ya rahat divan yoxdur”, – deyə gənc izah edir.
O bilir ki, qiymətlərin artması böyük ölçüdə Rusiyadan gələn yeni miqrasiya dalğası ilə bağlıdır.
Rusiya-Ukrayna müharibəsinin ilk aylarında baş verən ilkin axın və qiymət artımından bir müddət sonra daşınmaz əmlak bazarı sabitləşməyə başlamışdı. Bir çox Rusiya vətəndaşı ölkəsinə qayıtdığı və ya başqa ölkələrə köçdüyü üçün qiymətlər bir qədər enmişdi. İndi isə yenidən kəskin artıb.
“Düzünü desəm, Yerevan çox xoşuma gəldi. Şəhərin öz ritmi, maraqlı mədəni həyatı, dadlı yeməkləri, mehriban insanları və rahat nəqliyyat əlaqələri var. Bir neçə gün ərzində iş tapa bildim. İndi yalnız mənzil tapmaq qalır. Yerevanda tapa bilməsəm, yaxınlıqdakı yaşayış məntəqələrində axtaracağam. Hazırda yerli sakinlərdən şəhərətrafı nəqliyyatın necə işlədiyini, hansı kirayə variantlarının olduğunu və orada həyatın nə dərəcədə fəal olduğunu soruşuram”, – deyə Dmitri bildirir.
Onun sözlərinə görə, elə də böyük seçim imkanı olmayıb: ya Yerevana, ya da Tbilisiyə gedə bilərdi:
“Bu iki şəhərdə də dəfələrlə olmuşam və Rusiyada son gərginlik yaranmazdan əvvəl də onlardan birinə köçməyi düşünürdüm. Hər iki şəhərdə yaşamış dostlarım Yerevanı tövsiyə etdilər, baxmayaraq ki, burada qiymətlər Tbilisidən daha yüksəkdir. Deyirdilər ki, Yerevanda insanlar mehribandır, rusları sevirlər, yardımsevərdirlər və kömək etməyə hazırdırlar. Bundan başqa, burada iş tapmağın daha asan olacağını deyirdilər. Yeri gəlmişkən, Ermənistanın digər şəhərlərinə də köçməyi məsləhət görürdülər. Məsələn, Gümrü, Dilican və Vanadzora”.
Dmitri deyir ki, Rusiyadakı qohumları ona zəng edərək Ermənistana uzun müddətə gəlməyə dəyib-dəymədiyini öyrənmək istəyirlər. O, müsbət cavab verir, baxmayaraq ki, mövcud problemlərdən də danışır.
Özü isə qərara gəlib ki, gələcəkdə daha çox qazana bilsə, Yerevanda bir otaqlı mənzil alacaq.
Qiymətlərə təsir edən amillər
Silver REA daşınmaz əmlak agentliyinin direktoru Andranik Arutyunov deyir ki, ötən illə müqayisədə mənzillərin kirayə qiymətləri təxminən 15 faiz artıb. Bu, orta göstəricidir, şəhərin ayrı-ayrı rayonları və mənzil növləri üzrə qiymətlər xeyli fərqlənir.
Alqı-satqı bazarında da oxşar vəziyyət müşahidə olunur. Rieltorun sözlərinə görə, qiymət artımı üçün vahid göstərici müəyyənləşdirmək və onu ötən ilin rəqəmləri ilə müqayisə etmək çətindir:
“İlkin bazarda qiymət dəyişikliklərini qiymətləndirmək kifayət qədər çətindir, çünki tikinti şirkətləri yaşayış komplekslərindəki mənzilləri tikintinin müxtəlif mərhələlərində fərqli qiymətlərlə satırlar. Təkrar bazarda da marağın artması baxımından nəzərəçarpacaq dinamika müşahidə olunur”.
Arutyunov qeyd edir ki, təkrar bazardakı mənzillərə diaspor nümayəndələri daha çox maraq göstərirlər. Onlar üçün bu, bir növ biznes investisiyasıdır. Mənzili kirayəyə verməklə eyni məbləği bankda saxlamaqla müqayisədə daha yüksək illik gəlir əldə edirlər.
“Rusiya-Ukrayna müharibəsi başlayandan sonra Ermənistana köçənlər də fəaldırlar. Onlardan bəziləri təxminən bir ildir burada yaşayır və birdəfəlik məskunlaşmaq qərarına gəliblər. Digər qrup isə əvvəllər Ermənistanla əlaqələri olan, indi isə bizneslərini və ailələrini Ermənistana köçürmək qərarına gələn insanlardır.
Fəallığın başqa bir səbəbi də son illərdə Ermənistanda daşınmaz əmlak formasında kapitala daha çox dəyər verilməsidir. Buna görə də həm ilkin, həm də təkrar bazarda mənzilə tələbat yüksək olaraq qalır”, -deyə daşınmaz əmlak agentliyinin rəhbəri bildirir.
İnzibati rayonlar üzrə mənzil qiymətlərinin dinamikası
Kadastr Komitəsinin məlumatına görə, 2026-cı ilin ikinci rübündə Yerevanın bütün inzibati rayonlarında daşınmaz əmlakın bahalaşması tendensiyası davam edib. Lakin artım tempi fərqli olub. Ən əhəmiyyətli artım Nork-Maraş, Şenqavit və Açapnyak rayonlarında qeydə alınıb.
Qiymət artımına Nork-Maraş liderlik edir. Burada bir kvadratmetrin orta qiyməti 553 min dramdır (1527 dollar). Ötən illə müqayisədə qiymətlər 24 faiz artıb.
Eyni dövrdə Şenqavitdə mənzillərin qiyməti təxminən 19 faiz, Açapnyakda isə 16 faiz artıb. Tikintinin fəallaşması və qiymətlərin nisbətən daha əlçatan olması bu inzibati rayonlara marağın artmasına səbəb olub.
Digər inzibati rayonlarda qiymət dəyişiklikləri daha mülayim olub. Kiçik mərkəzdə və ondan sonra gələn Ərəbkir rayonunda artım tempinin nisbətən aşağı olması burada qiymətlərin onsuz da yüksək olması ilə izah edilir.
Ümumilikdə, Yerevanda daşınmaz əmlakın qiymət artımı davam edir. Lakin ən fəal dinamika inkişaf potensialı olan və qiymətlərin nisbətən daha əlçatan olduğu inzibati rayonlarda müşahidə olunur.
Ermənistanda daşınmaz əmlak yenidən bahalaşıb
