Ermənistan parlamentinin deputatı Gürcüstana buraxılmayıb
Gürcüstan sərhədçiləri Ermənistanın “Yerkir tsirani” (“Əriklər ölkəsi”) müxalif partiyasının sədri Zaruhi Postancyanın ölkəyə gəlişinə mane olub.
“Azadlıq” Radiosunun məlumatına görə, erməni müxalif siyasətçi Ermənistan tərəfdən “Bavra” sərhəd keçid məntəqəsini maneəsiz keçib. Amma Gürcüstanın “Ninotsminda” keçid məntəqəsində sərhədçilər Zaruhi Postancyana bildiriblər ki, onun Gürcüstan ərazisinə girişinə qadağ qoyulub.
Zaruhi Postancyan partiyadaşları ilə birlikdə Axalkalaki rayonuna erməni icmasının nümayəndələri ilə görüşə gedirmiş.
“Azadlıq” Radiosunun Ermənistan redaksiyası ilə söhbətində Zaruhi Postancyan bildirib ki, izahat tələb etməsinə baxmayaraq, Gürcüstan sərhədçiləri onun ölkə ərazisinə girişinə qoyulan qadağanın səbəbini açıqlamayıblar. Postancyanın özü ehtimal edir ki, Gürcüstan tərəfi bu addımı Ermənistan hakimiyyəyinin xahişi ilə ata bilər.
• Zaruhi Postancyan Ermənistan parlamentindəki ölkənin Avrasiya İqtisadi İttifaqında (AAİİ) təmsil olunmasını açıq tənqid edən azsaylı deputatlardandır.
• 2015-ci ildə Zaruhi Postancyan silahdaşları ilə birlikdə Tbilisidə Ermənistan prezidenti Serj Sarqsyan və “Gürcü arzusu”nun təsisçisi Bidzina İvanişvilinin də iştirak etdiyi erməni kilsəsinin açılış mərasimində etiraz aksiyası keçirmişdi.
