“Bu etnik təmizləmə deyil”. Bakıdakı ekspertlər antiterror əməliyyatının nəticələri haqda
Ekspertlər antiterror əməliyyatının nəticələri haqda
Azərbaycan ordusu Qarabağda antiterror əməliyyatı keçirib. 24 saat sonra tanınmamış DQR ordusu və hakimiyyət orqanları əməliyyatların dayandırılması üçün Azərbaycan tərəfinin təkliş etdiyi şərtlərə razı olduqlarını bəyan etdilər. Yevlaxda rəsmi Bakının nümayəndələri ilə Qarabağın erməni icması arasında keçirilən görüşdə Qarabağ ermənilərinin Azərbaycan cəmiyyətinə reinteqrasiyası məsələsi müzakirə olundu.
“Azərbaycan Qarabağ ermənilərinə iki seçim verib: ya qanunlarımızı qəbul et və Qarabağda yaşa, ya da Azərbaycanın ərazisini tərk et! Bu etnik təmizləmə deyil”, – “Atlas” Analitik Mərkəzinin rəhbəri Elxan Şahinoğlu belə hesab edir.
- Qarabağda müharibə. Azərbaycan antiterror əməliyyatı keçirir. CANLI
- Azərbaycan Qarabağda antiterror əməliyyatına başladı
- “Rusiyanın Azərbaycanla münasibətləri bəzən müttəfiqlik səviyyəsində olur, bəzən də olmur”. Bakıdan baxış
“Rusiya Azərbaycana mane olmadı”
“Azərbaycan Qarabağda anti-terror əməliyyatını uğurla həyata keçirdi. Rusiya Azərbaycana mane olmadı. Rusiya Azərbaycana mane olmaq istəsəydi, Ukrayna müharibəsinə görə tərəfdaşlarını itirdiyi dövrdə Azərbaycan və Türkiyə ilə münasibətlərdə gərginliyi yaranacaqdı. Bu nə Rusiyanın, nə Azərbaycanın, nə də Türkiyənin maraqlarına cavab verir.
“Azərbaycan Qarabağda anti-terror əməliyyatını uğurla həyata keçirdi. Rusiya Azərbaycana mane olmadı. Rusiya Azərbaycana mane olmaq istəsəydi, Ukrayna müharibəsinə görə tərəfdaşlarını itirdiyi dövrdə Azərbaycan və Türkiyə ilə münasibətlərdə gərginliyi yaranacaqdı. Bu nə Rusiyanın, nə Azərbaycanın, nə də Türkiyənin maraqlarına cavab verir.
Rusiyada Azərbaycanın anti-terror əməliyyatı ilə bağlı iki yanaşma mövcuddur. Birinci yanaşma odur ki, Rusiyada mərkəzlər Ermənistan hakimiyyəti ilə münasibətlərdə gərginlik yaşaması fonunda Azərbaycana mane olmamalıdırlar. Ermənistanda artıq mitinqlər başlayıb. Radikallar baş nazir Nikol Paşinyanı devirmək istəyirlər. Bu Rusiyanın maraqlarına uyğundur.
Rusiyadakı mərkəzlərin ikinci yanaşması isə bundan ibarətdir ki, Azərbaycana Qarabağın tamamını nəzarətə almaqda hansısa mərhələdə mane olmaq lazımdır. Buna baxmayaraq, Rusiya hələ ki, Azərbaycana mane olmur.
Rusiya prezidentinin mətbuat katibi Dmitri Peskov və Rusiya Xarici İşlər Nazirliyinin mətbuat katibi Mariya Zaxarova açıqlamalarında Azərbaycanın hərbi əməliyyatının əleyhinə fikir bildirməyiblər. Rusiya hərbi komandanlığı da açıqlama verərək, Qarabağdakı əməliyyatda Rusiya hərbçilərinə təhlükə olmadığını bildirdi. Bu o deməkdir ki, Rusiya hələ bir müddət də Azərbaycanın hərbi əməliyyatına mane olmayacaq.
Antiterror əməliyyatının məqsədləri haqda:
Azərbaycanın hədəfi bəllidir:
- Erməni separatçıları silahları təhvil verməli;
- Separatçılar “parlamenti” və “hökuməti” buraxmalıdırlar;
- Qarabağda Azərbaycan qanunları işləməlidir.
Azərbaycanın bu şərtləri yerinə yetirilməyənə qədər hərbi əməliyyatı davam etdirəcəkdi. Məsələ birdəfəlik həll olunmalı idi.
Dünyadakı və bölgədəki mövcud vəziyyət Azərbaycana hərbi əməliyyatı davam etdirmək üçün münbit zəmin yaradıb”.
Türkiyə Azərbaycanı dəstəklədi
Türkiyə ikinci Qarabağ müharibəsində olduğu kimi Azərbaycana dəstəyini davam etdirdi. Bu, Rusiya və İranı Azərbaycana qarşı hər hansı təxribatdan çəkindirməli olan əsas amildir. Moskva və Tehran “Şuşa bəyannaməsini”nin mövcudluğunu da nəzərə almaq məcburiyyətindədirlər.
Türkiyə prezidenti Rəcəb Tayyib Ərdoğan sentyabrın 19-da BMT Baş Assembleyasındakı çıxışında Azərbaycanın antiterror əməliyyatını dəstəklədi. Ərdoğanın çıxışı bu tezis üzərində qurulmuşdu ki, heç bir dövlət və beynəlxalq təşkilat Azərbaycana qanuni haqlarını bərpa etməyə mane olmamalıdır.
Yeri gəlmişkən, Türkiyə prezidentinin yaxın zamandaa Azərbaycana gəlməsi ehtimalı var”.
“Bu etnik təmizləmə deyil”
“Azərbaycanın Qarabağda anti-terror əməliyyatını “etnik təmizləmə” kimi qiymətləndirməyə çalışan ermənipərəst mərkəzlər var. Yaxın tarixdə ən böyük etnik təmizləmə 1995-ci ildə Xorvatiyada həyata keçirilib. Xoravtiya 250 minə yaxın serbin yaşadığı bölgəni yerlilərdən təmizləyib və Qərb dövlətləri buna etiraz etməyiblər. Bunun iki səbəbi var idi. Birincisi, keçmiş Yuqoslaviya 1990-cı illərdə dağıldıqdan sonra Serbiyadan fərqli olaraq Xorvatiya Qərblə yaxınlıq etmək istəyirdi. İkinci səbəb isə Xorvatiya serblərin Bosniyada olduğu kimi burada da separatçılığa başlayacağını proqnozlaşdırır və buna yol vermək istəmirdi. Qərb mətbuatı Xorvatiya ordusunun əməliyyatını “ərazilər serb separatçılarından təmizləndi” başlığı ilə yayırdı. Xorvatiya rəhbərliyini anlamaq olardı, qonşusu Serbiya Ermənistan kimi serbləri silahlandırmağa və separatizmə başlamağa həvəsləndirirdi. Xorvatiyaya olarsa, Azərbaycana niyə olmasın?
Azərbaycan Qarabağ ermənilərinə iki seçim verib: ya qanunlarımızı qəbul et və Qarabağda yaşamağa davam et, ya da qanunlarımızla yaşamaq istəmirsənsə, Azərbaycanın ərazisini tərk et! Bu etnik təmizləmə deyil.
Azərbaycan Qarabaği separatçılardan təmizləyəcək. Bundan sonra Azərbaycanla Ermənistan arasında sülh sazişini imzalamaq asanlaşacaq. Nikol Paşinyan Azərbaycanın Qarabağdakı antiterror əməliyyatına seyrçi qaldı. Çünki Paşinyan anlayır ki, Ermənistan ordusu Azərbaycana müdaxilə edərsə, bu böyük müharibəyə çevriləcək və Azərbaycan ordusu Ermənistan Qərbi Zəngəzur ərazisinə daxil olacaq”.
