"Belə uzun müddət davam edə bilməz" Bakıdan şərh
Ermənistan-Azərbaycan sərhədində vəziyyət
Qarabağın Rusiya sülhməramlı qüvvələrinin müvəqqəti yerləşdiyi hissəsi ətrafında vəziyyət gərgin olaraq qalır. Zəruri mallarla dolu 24 yük maşını Ermənistanla Azərbaycan sərhədində qalıb. Qarabağın erməni əhalisinə lazım olan hər şeyi Azərbaycanın Ağdam-Xankəndi yolu ilə çatdırmaq təklifinə Ermənistan tərəfi hələ də məhəl qoymur.
Siyasi icmalçı Hacı Namazov hesab edir ki, Ermənistan tərəfi birbaşa Azərbaycana üz tutmaqla bu vəziyyəti həll edə bilər. “Ermənistan malların çatdırılmasında suveren dövlət olan Azərbaycan ərazisindən nəqliyyatın hərəkətinə heç bir şəkildə müdaxilə etmək imkanı olmayan virtual “beynəlxalq ictimaiyyətə” güvənir”.
- Avropa Parlamentinin iki nümayəndəsi Azərbaycan hakimiyyətini Qubad İbadoğlunu azad etməyə çağırıb
- Azərbaycanın Açıq Hökumət Tərəfdaşlığından çıxarılması nə deməkdir?
- Azərbaycanlı tələbə İranda 2 il həbs cəzası alıb
Azərbaycanlı siyasi icmalçı Hacı Namazov Qarabağın Rusiya sülhməramlı qüvvələrinin müvəqqəti yerləşdiyi hissəsi ətrafında yaranmış vəziyyəti və orada yaşayan erməni əhalinin taleyini belə şərh edib:
“Azərbaycan və Ermənistan sərhədində gərginlik səngimir. Hələlik Qarabağın Rusiya sülhməramlılarının müvəqqəti yerləşdiyi hissəsi, daha dəqiq desək, bu bölgənin erməni əhalisi ilə bağlı heç nə aydın deyil.
Bakı Xankəndi və ətraf qəsəbələrdə ərzaq və malların Azərbaycandan Ağdam-Xankəndi yolu ilə daşınmasını israr etməkdə davam edir və Yerevan hələ də Qarabağa zəruri malları çatdırmaq ümidi ilə qonşu ölkə ilə sərhəddə 24 yük maşınını saxlamaqdadır.
Eyni zamanda, rəsmi məlumatlardan bəlli olur ki, Ermənistan malların çatdırılmasında suveren dövlət olan Azərbaycan ərazisindən nəqliyyatın hərəkətinə heç bir şəkildə müdaxilə etmək imkanı olmayan virtual “beynəlxalq ictimaiyyətə” güvənir. Bu məsələ ilə bağlı Yerevanın Bakıya üz tutması barədə heç bir məlumat yoxdur. Halbuki yalnız Azərbaycan öz ərazisinə nəyinsə gətirilməsinə icazə verə, ya da verməyə bilər. Heç bir beynəlxalq ictimaiyyət rəsmi Bakıya diqtə edə bilməz”.
Hacı Namazovun sözlərinə görə, “bu vəziyyət ölü nöqtədən tərpənmədikcə, Azərbaycan və Ermənistan müdafiə nazirlikləri arasında məlumat “atışması” ilə birlikdə tərəflər arasındakı gərginlik də yüksəlir”.
“Atəşkəs rejiminin pozulması ilə bağlı məlumatların sayı bəzən gündə 5-6-ya çatır. Üstəlik, atəşkəs həm Azərbaycanla Ermənistanın faktiki sərhədində, həm də Qarabağda pozulur”.
Səbəbləri sadalayan siyasi şərhçi “Belə uzun müddət davam edə bilməz” deyir.
“Yay başa çatır. İki-üç aydan sonra Qarabağa qar yağacaq, soyuqlar düşəcək. Bu, regionun erməni əhalisinin onsuz da qibtə olunmaz vəziyyətini daha da pisləşdirmək təhlükəsi yaradır. Digər tərəfdən, qışda Azərbaycanın bu hissəsində hərbi əməliyyatlar aparmaq o qədər də asan deyil. Hərbi ekspertlərin fikrincə, Qarabağda qeyri-qanuni silahlı birləşmələrə qarşı onları tamamilə məhv etmək məqsədi ilə aparılacaq əks-terror əməliyyatı iki aya qədər çəkə bilər.
Buna əsaslanaraq, güman etmək olar ki, bu və ya digər qərarın qəbuluna az vaxt qalıb – ən çoxu sentyabrın sonuna qədər”.
Hacı Namazov “Hadisələrin inkişafı üçün ən çox ehtimal olunan ssenari hansıdır?” sualına cavab verərək deyir:
“Əlbəttə, problemin sülh yolu ilə həlli ən arzuolunandır. Burada başqa variant yoxdur – Qarabağ erməniləri Bakının inteqrasiya ilə bağlı şərtlərini qəbul etməli, qanunsuz “dövlət birləşmələrini” ləğv etməlidir. Amma kiminsə belə bir qərar qəbul etməsi onu bir gecədə bütün ermənilərin düşməninə çevirəcək. Bu baxımdan, 2020-ci il noyabrın 10-da Ermənistanın baş naziri Nikol Paşinyan ikinci Qarabağ müharibəsini bitirmək üçün üçtərəfli sazişi kim bilir harda imzaladığını və sonra bir neçə gün iş yerində görünmədiyini xatırlayıram. Başqa sözlə, belə bir qərarı separatçı rejimin rəhbərliyindən olan, Qarabağdan əvvəlcədən qaçmış kimsə verə bilər. Amma bu gün bunun nə dərəcədə mümkün olduğunu bilmirəm.
Məsələnin hərbi yolla həlli ehtimalının yüksək olmasının səbəbi hazırda Azərbaycan və Ermənistanın sülh yolu ilə nizamlanmanın aktual mövzuları üzrə konsensusdan uzaq olmasıdır. Danışıqlar dayandırılıb. Diqqət edirsinizsə, Paşinyan artıq Qarabağın Azərbaycana məxsus olmasından danışmır, çünki onun cəsarətli çıxışları Ermənistanda düşmənçiliklə qarşılandı və o, geri addım atdı.
Rəsmi Bakı tamamilə susur, son günlər sərhəddə və Qarabağ ətrafında vəziyyətlə bağlı bir dənə də olsun açıqlama verilmir.
BMT Təhlükəsizlik Şurasında Laçın yolu ilə bağlı müzakirələr heç bir nəticəyə gətirib çıxarmasa da, vəziyyəti daha da qızışdırdı.
Ona görə də yaxın günlərdə Qarabağın erməni əhalisinin Azərbaycan cəmiyyətinə inteqrasiyasının labüdlüyünə dair Xankəndi və ya Yerevandan bəyanatlar eşitməsək, qorxuram ki, bütün mümkün variantlardan ən pisinə hazır olmalıyıq”.
