Bakı: təsviri sənət və musiqi

Təsviri sənət 

Müasir incəsənət Bakıda gözlənilmədən özünə yer tapa bildi. Düşünürəm ki, bu “boqemaya yaxın publikanın olması ilə bağlıdır. O, heç vaxt xüsusi əziyyət çəkmədən daha bir “seçilmişlər klubunun yaradılması imkanından vaz keçməzdi. Sıravi tamaşaçıya aydın olmayan rəsm və heykəltəraşlıq əsərləri sərgisinə gələnlər isə məhz bu klubun üzvləridirlər.

Beləliklə, o qədər də soyuq olmayan yanvar günlərindən birində Müasir İncəsənət Mərkəzində “Sırğa olsun adlı sərgi keçirildi. Bu ifadə, məlum olduğu kimi, hansısa dəyərli məlumatı yadda saxlamağın vacibliyini vurğulayan deyimin bir hissəsidir. Konseptualizm istiqamətinin rəssamlarına “nəsillərin varislik mövzusuna toxunmaq təklif edildi.

Sərgiyə baş çəkən gənclərin sifətindən yüksək incəsənətin onların fikirlərinə hakim kəsilə bilib-bilmədiyini anlamaq çətiniydi.

Musiqi

Bundan yarım saat sonra isə kiçik “Le Chateau pabında “DədəBaba ansamblının “Sənin dünyan, mənim dünyam adlı konserti keçirildi.

İşıqlanma çox zəifiydi, ventilyasiya ondan da betər. Bununla belə, zalda tam anşlaq idi. Hiss olunur ki, rok musiqisinə zirzəmilər artıq dar gəlir. Bu cür canlı rok çıxışlar son 2-3 il ərzində daha tez-tez baş tutur, amma bu, hələ də Bakının mədəni həyatında kifayət qədər nadir hadisədir.

İş orasındadır ki, Bakı məsələn, Tbilisidən fərqli olaraq, rok deyil, daha çox pop musiqisi şəhəridir. Bunu ictimai iaşə obyektlərinin musiqi fonunda da müşahidə etmək olar. Bakıda “Led Zeppelini dinləyə-dinləyə yemək yemək üçün siz evdə oturmalı olacaqsız. Məhz buna görə də rok konsertləri əksər vaxtlarda “öz gücünə təşkil olunur, amma bu da öz növbəsindən əsl “andeqraund ab-havası yaradır. Gənclərin əyləncəsi üçün də bundan gözəl heç nə ola bilməz.