Azərbaycanda şairin heykəlinin sökülməsi ətrafında mübahisə qızışıb

Fevralın 26-da Mikayıl Müşfiqin heykəlinin sökülməsi Azərbaycanda böyük narazılıqlara səbəb olub. Heykəl “Azəravtoyol”un işçiləri tərəfindən Mədəniyyət Nazirliyinə və Bakı şəhər İcra Hakimiyyətinə xəbərdarlıq edilmədən “ərazinin abadlaşdırılması məqsədilə” demontaj olunub.

Monument dövlət əhəmiyyətli abidələr siyahısına daxil edilib. Hazırda Mədəniyyət və Turizm Nazirliyi “Azəravtoyol”u məhkəməyə verməyə hazırlaşır. Bu haqda nazirliyin Mədəni İrsin Mühafizəsi Şöbəsinin rəisi Zakir Sultanov “Qafqazinfo” agentliyinə müsahibəsində bildirib.

Heykəlin demontajı cəmiyyətdə geniş rezonans doğurub.

Moskva Dövlət Universitetinin Bakı filialının rektoru (Azərbaycanın birinci vitse-prezidenti Mehriban Əliyevanın bacısı) Nərgiz Paşayevabu hadisəni “vandalizm və barbarlıq aktı” adlandırıb. “Bu, dahi şairin xatirəsinin təhqir olunması və böyük günahdır”, – Paşayeva haqqın.az saytına deyib.

Azərbaycan Yazıçılar Birliyinin katibi, populyar detektiv romanların müəllifi Çingiz Abdullayev heykəlin sökülməsini acı ironiya ilə şərh edib: “Stalin dövründə repressiya edilmiş Azərbaycan yazıçılarının adları həkk olunmuş lövhəni də Azərbaycan Yazıçılar Birliyinin binasının divarından söküb atmaq lazımdır. Müsəlmanlar haqda heç də xoş danışmayan Sabirin abidəsini, bütün əsərlərini fars dilində yazmış Nizaminin heykəlini, vətənində ölmək var ikən Suriyada öldürülən Nəsiminin abidəsini də dağıtmaq lazımdı. Eyni səbəblə məzarı yad ölkədə olan Fizuli monumentini də götürmək lazımdı, üstəlik o, üç dildə yazırdı”, – haqqın.az Abdullayevdən sitat gətirir.

Heykəlin demontajına görə məsuliyyət daşıyan “Azəravtoyol”dan bildirirlər ki, “yol-təmir işləri aparılarkən zədələnməsin deyə büst sökülüb. O, anbardadır. Işlər başa çatandan sonra əvvəlki yerinə qaytarılacaq, həmçinin orda böyük park salınacaq”, – qurumun mətbuat xidmətinin rəhbəri Anar Nəcəfli  “Minval” informasiya portalına bildirib.

Heykəlin sökülməsi sosial şəbəkələrdə də geniş müzakirə olunub. Budur, müxtəlif istifadəçilərin tipik statusları:

“Ümid edirəm ki, Müşfiqin heykəli daha əlçatan yerə köçürüləcək. İki gur küçənin arasındakı balaca bağçaya gedib çıxmaq üçün ya gərək, onun arxasındakı binadan ev alasan, ya da ora aşağı və ya yuxarı tranzitlə keçərkən, yaxud da səhvən gedib düşmək olar. Ağaclar isə heyifdir”.

“Burda kimliyindən asılı olmayaraq heykəlləri sökmək nəinki çoxdan qəbul olunmuş məsələdir. Azərbaycanda həmişə xatirələrin özünü “söküblər”, tarixi siliblər”.

“Bakını mədəniyyətsiz şəhərə çevirmək istəyirlər. Orda Xətainin heykəlini sökmüşdülər, indi də Müşfiqə keçiblər. Mərkəzi küçələrə heç kimin tanımadığı insanların adını verirlər. Şəhər kolxoz bazarına çevrilir”.

• Mikayıl Müşfiq (Mikayıl Əbdülqədir oğlu İsmayılzadə) 1908-1938. Azərbaycan şairi və yazıçısı həyatının bu qədər qısa olmasına baxmayaraq, Azərbaycan ədəbiyyatında görkəmli iz qoya bilib. Məhəbbət və gözəlliyi vəsf edən çox sayda şeirin müəllifidir. Öz şeirlərində o həmçinin sosial-mədəni məsələlərə öz münasibətini ifadə edib. Stalin repressiyalarının qurbanı olub və 1938-ci ildə güllələnib.