Azərbaycanın quru sərhədləri açılmayacaq
Azərbaycanın Nazirlər Kabinetinin qərarı ilə koronavirus pandemiyası ilə bağlı xüsusi karantin rejimi daha iki ay – 2022-ci il senyabrın 1-ə qədər uzadıb. Bu o deməkdir ki, ölkənin qonşu dövlətlərlə quru sərhədləri bağlı qalacaq. Bu qərar sosial şəbəkələrin yerli istifadəçiləri arasında narazılığa səbəb olub.
- Azərbaycan, Ermənistan, Gürcüstan: alyans yaratmaq, yoxsa həyatda qalmaq üçün böyük ölkələrlə dostluq etmək?
- Azərbaycanda dini hərəkat üzvü polis tərəfindən zorlandığını bildirib
- Reportyor və LGBTI+ fəalı Əvəz Hafizlinin qatilinin məhkəməsi başlayıb
Karantin uzadıldı
İyulun 1-də səhər saat 6-da Azərbaycanda koronavirus pandemiyasına görə elan olunmuş xüsusi karantin rejimi başa çatmalı idi. Amma ölkənin Nazirlər Kabineti karantin rejiminin 2022-ci il sentyabrın 1-ə qədər uzadılması haqda qərar verib.
Sənəddə qeyd olunub ki, daha əvvəl tətbiq olunmuş bəzi məhdudiyyətlər ləğv edilir. Beləliklə, insanlara 10 nəfərdən daha çox qruplarla (ailə üzvlərini və yaxın qohumları saymasaq) toplaşmağa icazə verilib.
Həmçinin kütləvi tədbirlərin (məsələn, toyların) təşkilatçıları üçün xüsusi yaradılmış nəzarət saytında qeydiyyatda keçmək məcburiyyəti aradan qaldırılıb.
Bilinməyən qadağa
Sonuncu qadağa bu günə qədər işləsə də, 10 nəfərdən artıq insanın bir yerdə toplaşmasına qoyulan qadağanın ləğv edilməsi sosial şəbəkə istifadəçilərini təəccübləndirib.
“Siz bilirdiz ki, bu günə qədər 10 nəfərdən çox qruplarla birlikdə toplaşmaq olmaz? Mən də bilmirdim. Ancaq ləğv ediləndən sonra xəbərim oldu”, – Facebook istifadəçisi yazır.
İndiyə qədər Azərbaycanda ticarət mərkəzlərinə giriş zamanı koronavirusa qarşı tam vaksinasiyadan keçildiyi haqda COVID-pasport tələb olunur. Əksər qapalı məkanlar, məsələn, kafe və restoranlar, digər bu kimi müəssisələr bu qaydanı iqnor edirlər.
Qapalı quru sərhədlər
Azərbaycanın quru sərhədləri koronavirus pandemiyasına görə xüsusi karantin rejimi elan olunandan bəri artıq iki ildən çoxdur ki, qapalı qalır.
Bu, qonşu ölkələrə səfər etmək istəyən insanlar üçün böyük çətinliklər yaradır. Hava yolundan başqa heç bir hərəkət imkanı yoxdur.
Bu səbəbdən karantinin uzadılması haqda qərar böyük narazılığa səbəb olub. Sosial şəbəkələrin Azərbaycan seqmentində yazılan bəzi şərhləri təqdim edirik:
“Artıq iki ildir ki, ailəmizlə Gürcüstana gedə bilmirik. Əvvəl necə idi? Maşına oturdun, bir neçə saatdan sonra öz kəndində, doğmalarının yanındasan. İndi bu, ancaq təyyarədə mümkündür, qiymətlərsə bahadır. Ailəylə getmək mümkün deyil. Hələ ordan da kəndə gedib çıxmaq lazımdır. Dəhət!”
“Lənətə gəlmiş sərhədləri açın da nəhayət. Bütün normal ölkələrdə sərhədlər açılıb. Turizm bir qırağa, insanlar işlərinin dalınca gedə bilmirlər. Düz deyirlər ki, bu, inhisarçı “AZAL”-ın işidir. Bu qərardan həmin aviaşirkətdən başqa hamı uduzur”.
“Nə etmək olar? Naxçıvana təyyarə bileti tapmaq mümkün deyil. Deyirlər iyulun 5-dən tez uçmayacaqsız. Gürcüstan və Türkiyədə maşınla gedə bilərdim ora, amma sərhədlər bağlıdır. Vəziyyətlə bağlı fikrimi söyüşsüz ifadə etməkdə çətinlik çəkirəm”.
