ABŞ-ın Bakıdakı səfiri ilə görüş kömək etmədi - məhkəmə jurnalistləri həbsdə saxladı
Azərbaycanda həbslər – “AbzasMedia işi”
Azərbaycan məhkəməsi “Abzas Media işi” üzrə təqsirləndirilən şəxsləri yenidən həbsdə saxlayıb. Vəkillərin Sevinc Vaqifqızı, Ülvi Həsənli və İmran Əliyevin barələrində həbs qətimkan tədbirinin ev dustaqlığına dəyişdirilməsi ilə bağlı vəsatətləri təmin edilməyib.
- “Azərbaycandan çıxış qadağandır” – onlarla fəal və jurnalistə qarşı səfər məhdudiyyəti
- “Moskva regionda yeni reallıqlarla barışmalı olacaq”. Bakıdan baxış
- Professor Qubad İbadoğluna elektron nəzarət tətbiq edilib
Mayın 9-da Bakının Xətai Rayon Məhkəməsində “Abzas Media” müstəqil internet nəşrinin direktoru Ülvi Həsənli, baş redaktoru Sevinc Vaqifqızı və Meclis.info onlayn platformasının rəhbəri İmran Əliyevin ev dustaqlığına buraxılması ilə bağlı vəsatətlərə ayrı-ayrı baxılıb. Məhkəmə vəsatətlərii təmin etməyib vəjurnalistləri həbsdə saxlayıb.
Bir gün əvvəl həmin məhkəmə seçki sahəsində tanınmış hüquq müdafiəçisi Anar Məmmədlinin ev dustaqlığına buraxılması ilə bağlı vəsatəti təmin etməyib.
Həbs olunanların vəkillərinin sözlərinə görə, jurnalistlərin və hüquq müdafiəçisinin həbsdə saxlanması üçün nə maddi, nə də prosessual əsaslar var və onlar siyasi motivlərlə həbs olunublar.
“Təəssüf ki, məhkəmə bizim arqumentlərimizi nəzərə almadı və vəsatəti təmin etmədi”, – deyə Anar Məmmədlinin vəkili Elmar Süleymanov bildirib.
Məhkəmənin qərarlarından apellyasiya şikayəti veriləcək.
“Abzas Media işi”ndə səkkiz fiqurant
2023-cü ilin noyabrından 2024-cü ilin yanvarına qədər yüksək vəzifəli məmurların və onların ailə üzvlərinin korrupsiya fəaliyyəti ilə bağlı jurnalist araşdırmaları ilə tanınan “Abzas Media” portalının 6 əməkdaşı həbs edilib. Bunlar nəşrin direktoru Ülvi Həsənli, onun müavini Məhəmməd Kekalov, baş redaktor Sevinc Vaqifqızı, reportyorlar Nərgiz Absalamova və Elnarə Qasımova, araşdırmaçı jurnalist Hafiz Babalıdır.
Aprel ayında “Abzas Media işi” işi üzrə bu media orqanı ilə heç bir əlaqəsi olmayan Meclis.info saytının rəhbəri İmran Əliyev və Seçkilərin Monitorinqi və Demokratiyanın Tədrisi Mərkəzinin rəhbəri Anar Məmmədli də həbs olunub.
İş üzrə bütün həbs olunanlar “əvvəlcədən əlbir olaraq xarici valyuta qaçaqmalçılığı”nda ittiham olunurlar. Bu ittihamla onları 5 ildən 8 ilə qədər azadlıqdan məhrumetmə cəzası gözləyir.
Hüquq müdafiəçiləri həbs olunan jurnalistləri və vətəndaş cəmiyyəti nümayəndələrini siyasi məhbus kimi tanıyıblar. Bir sıra beynəlxalq təşkilatlar Azərbaycan hakimiyyətini onları dərhal azad etməyə və onlara qarşı bütün təqibləri dayandırmağa çağırıblar.
Ombudsman nümayəndələri həbsdə olan jurnalistlərə və fəallara baş çəkiblər
Mayın 8-də Azərbaycan Respublikasının İnsan Hüquqları üzrə Müvəkkili (Ombudsman) yanında Milli Profilaktika Qrupunun üzvləri 1 saylı Bakı İstintaq Təcridxanasında “Abzas Media işi” üzrə həbs olunanlar da daxil olmaqla bir qrup jurnalist və fəala baş çəkiblər. Bu barədə İnsan Hüquqları üzrə Müvəkkil Aparatının mətbuat xidmətindən məlumat verilib.
Sıralarında həkimin də olduğu qrup üzvləri Toplum TV-nin təsisçisi Ələsgər Məmmədli, III Respublika siyasi platformasının idarə heyətinin üzvü Ruslan İzzətli, “Xural” qəzetinin baş redaktoru Əvəz Zeynallı, “Abzas Media”nın əməkdaşları Ülvi Həsənli, Sevinc Vaqifqızı, Nərgiz Absalamova, Elnarə Qasımova, Hafiz Babalı, meclis.info saytının baş redaktoru İmran Əliyev və Kanal-11 YouTube kanalının rəhbəri Teymur Kərimovla görüşüblər.
“Söhbətlər konfidensial xarakter daşıyıb. Ombudsmanın nümayəndələri həbs olunanların saxlanma şəraiti və sağlamlıq vəziyyətini araşdırıb, müraciətlərini dinləyiblər”, – deyə press-relizdə bildirilib.
ABŞ səfiri həbs olunanların yaxınları ilə görüşüb
Bir gün əvvəl, mayın 7-də isə ABŞ-ın Azərbaycandakı səfiri Mark Libbi həbs edilən jurnalistlərin və vətəndaş cəmiyyəti fəallarının ailə üzvləri ilə görüşüb. Səfirliyin bəyanatına görə, Libbi həbs olunanların azad edilməsinin vacibliyini qeyd edib.
“Birləşmiş Ştatlar qətiyyətlə inanır ki, müstəqil vətəndaş cəmiyyəti fəal və məsuliyyətli cəmiyyətin ayrılmaz hissəsidir və haqsız yerə həbs edilənlər cəmiyyətdəki mühüm işlərini davam etdirə bilmələri üçün azad edilməlidir”, – deyə səfir Libbi qeyd edib.
