Azərbaycan və Gürcüstan müttəfiqliyə can atır

Bakı Tbilisi ilə münasibətləri strateji tərəfdaşlıqdan Azərbaycan–Gürcüstan–Türkiyə xətti üzrə müttəfiqliyə qədər inkişaf etdirmək istəyir. Bu haqda İlham Əliyevin Tbilisi səfəri haqda şərhində siyasi icmalçı Aqşin Kərimov bildirib. Ekspert qeyd edib ki, Ankara və Bakı Rusiya tərəfindən təhlükə və təzyiqə qarşı Gürcüstan üzərində “təhlükəsizlik çətiri”nin yaradılmasında maraqlıdır.

• Azərbaycan Ermənistanı Laçın dəhlizindən Qarabağa mina ötürməkdə ittiham edib
• Türkiyə Rusiyanın sanksiyalardan yayınmasına şərait yaradır? İstanbuldan icmal
• Azərbaycan və Türkiyə liderləri Zəngilanda yeni beynəlxalq hava limanını açıblar

Oktyabrın 24-də Azərbaycan prezidenti İlham Əliyevin Tbilisiyə bir günlük işgüzar səfəri baş tutub və o, Gürcüstanın baş naziri İrakli Qaribaşvili ilə görüşüb. Siyasi icmalçı Aqşin Kərimov JAMnews-a bu səfərin səbəb və məqsədləri haqda danışıb.

“Forbes”: Gürcüstanda qırıcı təyyarələrin istehsalını Azərbaycan maliyyələşdirə bilər

“Forbes” iddia edir ki, Gürcüstan yeni hərbi təyyarə istehsal etmək niyyətindədir və Azərbaycan bu istehsalı maliyyələşdirə bilər

Beş mümkün səbəb

Aqşin Kərimovun sözlərinə görə, Azərbaycan Prezidenti İlham Əliyevin Gürcüstana səfər edərək bu ölkənin baş naziri İrakli Qaribaşvili ilə görüşlər keçirməsinin səbəblərini aydınlaşdırmaqdan ötrü bir neçə istiqaməti əsas götürməliyik.

Ekspert tərəflərin müzakirəsi üçün mümkün beş əsas məsələni sadalayıb.

“Birincisi, Rusiya-Ukrayna müharibəsinin davam etməsi postsovet məkanının başı üzərindəki təhdidlərin bir parçasını ərazi münaqişəsindən əziyyət çəkən Gürcüstana fokuslayır. Yəni, Gürcüstanda davam edən konfliktlər bu ölkəni Rusiyanın manipulyasiyası və təzyiqləri qarşısında aciz qoyur.

İkincisi, Gürcüstandakı erməni faktorunun alışan çəllək həddinə çatması mümkündür ki, bu da Azərbaycan üçün qeyri-məqbul ssenaridir.

Üçüncüsü, İran Gürcüstanda azərbaycanlıların kompakt yaşadığı bölgələri ideoloji axınla “zəhərləmək” niyyətini işə salıb ki, bu da Bakını narahat edən faktorlar siyahısında yer alır.

Dördüncüsü, Azərbaycanla Gürcüstanın strateji tərəfdaşlığının müttəfiqlik zəmininə çatması üçün zaman yetişib.

Beşincisi, Tbilisi Azərbaycan-Ermənistan münasibətlərinin tənzinlənməsi prosesində vasitəçilik niyyətindədir, lakin bu, Gürcüstanın şəxsi təşəbbüsü yox, Qərbin onun qarşısında qoyduğu təlimatlar “kitabçasının” ruhundan irəli gəlir”, – Kərimov dəqiqləşdirib.

Gürcüstandan Şuşaya tez-tez gəlirlər. Səbəb nədir?

2022-ci ilin aprelində Gürcüstanın mədəniyyət təmsilçiləri Şuşanı ziyarət ediblər, bu gün isə Gürcüstanın din xadimləri Azərbaycana gəliblər, onlar da bu şəhərə səfər edəcəklər

Gürcüstan üçün Azərbaycanın müsbət nümunəsi

“Həmin bu konseptual baxışları açsaq, deyə bilərik ki, Gürcüstan Rusiya və Qərblə münasibətlər sistemində balanslı akta ehtiyac hiss edir. Tbilisi bunun üçün yaxşı nümunəyə, yəni Azərbaycanın xarici siyasət modelinə müraciət edir və Əliyevin qənaətlərini öyrənir”, – deyə ekspert əlavə edib.

“Rusiyanın da, Qərbin də Tbilisi üzərində əhəmiyyətli təsir rıçaqlarını saxlamaq üçün kəsişən maraqları Azərbaycan və Türkiyənin Kreml-Gürcüstan əlaqələrinin normallaşmasında birgə tarazlaşdırıcı mövqe tərtib etməsinə rəvac verir”, – deyə Kərimov vurğulayıb və bildirib ki, Azərbaycan və Türkiyə Gürcüstana Rusiyadan artan təzyiqlərin azaldılması və Tbilisinin təhlükəsizlik çətiri altında saxlanılması üçün səylərini əsirgəmirlər.

• “Gürcüstan Azərbaycanla Türkiyə arasındakı enerji və Bakı-Tbilisi-Qars dəmir yolu arteriyasını təmin edən tranzit ölkədir,
• Gürcüstanda yaşayan azərbaycanlılar amili Bakı və Ankara üçün bu ölkəyə münasibətdə etnik müstəvi üzrə vahid proqram hazırlamaq prioritetlərini təqdim edir”.

Strateji tərəfdaşlıqdan müttəfiqliyə

Gürcüstanın etnik azərbaycanlılar yaşayan hissəsində İran yönlü qüvvələrin fəallaşması üzərində duran siyasi icmalçı bildirir ki, artıq Azərbaycan həm öz təşəbbüsləri, həm də Türk Dövlətləri Təşkilatının prinsiplərindən irəli gələrək dünya üzrə səpələnən azərbaycanlıların hüquqlarının müdafiəsini öz siyasətinin mərkəzinə proyeksiya edir.

Bu mənada, İranın Gürcüstandakı azərbaycanlıların potensialından öz xeyrinə yararlanmaq cəhdlərinin arxasında yaxşı niyyətlər durmadığını həm Bakı, həm də Ankara gözəl bilir”, – deyə Kərimov bildirib.

Onun sözlərinə görə, Azərbaycanla Gürcüstan arasında ikitərəfli münasibətlər qrafikində həllini gözləyən çağırışlar dayanmaqdadır:

“Ən böyük hədəflərdən biri Bakı-Tbilisi strateji tərəfdaşlığını Azərbaycan-Gürcüstan-Türkiyə üçtərəfli müttəfiqlik səviyyəsinə çatdıracaq fikirlərin inkişaf etdirilib nəticə hasil edilməsidir. Tbilisi reallaşması planlaşdırılan Zəngəzur dəhlizinə qoşulmaq qərarını açıqlamaqla Azərbaycan-Türkiyə-Gürcüstan damarına töhfə verə bilər”.

Tbilisinin vasitəçilik rolu

Sonda Aqşin Kərimov Ermənistan və Azərbaycan arasında münasibətlərin nizamlanmasına Gürcüstanın vasitəçilik rolu haqda fikirlərini açıqlayıb:

“Qərb, xüsusilə də ABŞ Gürcüstanın Azərbaycan-Ermənistan gündəliyindəki moderatorluq roluna sahiblənməsində maraqlıdır. Vaşinqton bəzi oyun qaydalarında özünü göstərmək meylindən uzaqdır və pərdəarxasından qurulan tamaşaya rejissorluq etmək qabiliyyətlərinə malikdir.

Bu mənada ABŞ Gürcüstan vasitəsilə Azərbaycan-Ermənistan münasibətlərinin nizamlanmasında maraqlarını təmin etmək və Moskvanı prosesdə neytrallaşdırmaq məqsədlərini güdür”, – ekspert sözlərini yekunlaşdırıb.