Azərbaycanda ölüm göstəricisi kəskin artıb, lakin hakimiyyət koronavirusla əlaqədən danışmır
Azərbaycanda 2019-cu illə müqayisədə ölüm göstəricisi kəskin şəkildə, təxminən 50 faiz yüksəlib. Ölkədə koronavirusa yoluxma səviyyəsi böyük olsa da, hakimiyyət ölüm göstəricisinin artmasının pandemiya ilə əlaqəli olması barədə məlumat vermir.
Rəsmi rəqəmlərə görə, 2020-ci ilin iyun ayında 6 203 nəfər ölüb.
• Bakıda koronavirus dövründə çimərliklər “qanuni” və o qədər də qanuni olmayanlara bölünüb
• Rusiya prezidenti koronavirusa qarşı peyvəndin hazırlandığını bildirib: inanmağa dəyərmi?
• Gürcüstan və İran: infeksiya ocağı ilə yanaşı həyat
2020-ci ilin iyun ayında Azərbaycanda 6 203 ölüm halı qeydə alınıb. Müqayisə üçün deyək ki, 2019-cu ildə analoji göstərici 4 055 hal təşkil edib.
2014-2019-cu illərdə iyun ayında orta ölüm göstəricisi 4 040-a bərabər olub.
“Başqa sözlə, 2020-ci ilin iyununda Azərbaycanda 2 163 “izafi” ölüm halı qeydə alınıb. Rəsmi məlumatlara görə isə, iyun ayında koronavirusdan cəmi 150 nəfər ölüb”, – özünün “Facebook” səhifəsində JAMnews-un iqtisadi eksperti Toğrul Maşallı yazır.
Azərbaycan Dövlət Statistika Komitəsi ölkə əhalisinin daha çox öldüyü xəstəliklər üzrə məlumatları açıqlayıb.
Belə ki, 2019-cu ildə ümumilikdə ölkə üzrə 55 916 ölüm halı qeydə alınıb. Bunlardan 58%-nin səbəbi ürək-damar sistemi xəstəlikləri olub.
İkinci yeri onkoloji xəstəliklər (15,8%), üçüncü yeri isə travmalar, zəhərlənmələr və xarici amillərin təsirindən ölüm halları (5%) tutur.
Koronavirus pandemiyası Azərbaycanda 509 nəfərin ölümünə səbəb olub. Ümumilikdə, virusa 34 744 nəfər yoluxub, 32 201 nəfər sağalıb.
