Azərbaycan vətəndaşları epidemiya yayılmış şəhərdən çıxarılıb
Azərbaycanın altı vətəndaşı Türkiyə hakimiyyəti tərəfindən 2019-nCoV koronavirusunun epidemiya episentrinə çevrilmiş Çinin Uhan şəhərindən evakuasiya edib.
Uçuşdan əvvəl onların hamısı çinli həkimlər tərəfindən müayinə edilib və onlarda xəstəlik əlamətləri aşkarlanmayıb.
Evakuasiya olunanları Ankaraya gətiriblər, onlar burada 14 günlük karantinə yerləşdirilib, daha sonra Azərbaycana qayıda biləcəklər.
Türkiyə və Azərbaycan vətəndaşlarından başqa Türkiyə Uhan şəhərindən Gürcüstan və Albaniya vətəndaşlarını da evakuasiya edib – Report xəbər verib.
2019-nCoV koronavirusundan Çində artıq üç yüz nəfərdən çox insan ölüb. Təxminən eyni sayda xəstəni xilas etmək mümkün olub.
Uhan şəhərinə hazırda giriş və çıxış bağlanıb. Çindən öz vətəndaşlarını evakuasiya etmək üçün dövlətlər ÇXR hakimiyyətindən icazə almalı və bütün detalları onlarla razılaşdırmalıdırlar.
• Çindən qayıdan dörd azərbaycanlı tələbə karantin altındır
