Azərbaycan hökuməti qətlə yetirilmiş yazıçının ailəsinə kompensasiya ödəyəcək
AİHM-nin Rafiq Tağının qətlilə bağlı qərarı
Avropa İnsan Haqları Məhkəməsi azərbaycanlı həkim və yazıçı Rafiq Tağının yaşamaq hüququnun pozulduğu haqda qərar çıxarıb. Azərbaycan hökuməti mərhumun həyat yoldaşına kompensasiya ödəyəcək. Rafiq Tağının ölümündən 11 il keçsə də qatil hələ də tapılmayıb. 2006-cı ildə İranda yazıçının qətli haqda fətva verilib.
- ABŞ Dövlət Departamenti bəyan edib ki, Azərbaycanda hərbi xidmətdən imtina etmək mümkün deyil
- Azərbaycan hökuməti Avropa Məhkəməsində müxalif jurnalistə uduzub
- Azərbaycanda qapalı çevrə: seçki pozuntuları və AİHM-in gecikən qərarları
2022-ci il iyulun 7-də Avropa İnsan Haqları Məhkəməsi (AİHM) Azərbaycandan daxil olan növbəti şikayətlə bağlı qərarını açıqlayıb. Məhkəmə mərhum yazıçı Rafiq Tağının həyat yoldaşının şikayəti üzrə qərarında Avropa Konvensiyasının 2-ci maddəsinin (yaşamaq hüququ) pozulduğunu təsbit edib.
Mailə Tağıyeva Azərbaycana qarşı
AİHM-də № 72611/14 iş üzrə azərbaycanlı yazıçı-publisist, o cümlədən də həkim-kardioloq Rafiq Tağının həyat yoldaşı Mailə Bulud qızı Tağıyeva iddiaçı qismındə çıxış edib. Öz ərizəsində o göstərib ki, ərinin 2011-ci il noyabrın 19-da bıçaqlanması nəticəsində xəstəxanada baş vermiş ölüm şəraiti effektiv araşdırılmayıb.
Dini doqmalara qarşı yönəlmiş “Avropa və biz” məqaləsinə görə 2006-cı ildə iranlı ayətullah Fazil Lənkərani yazıçı və publisist Rafiq Tağının ölümü haqda fətva verib.
Elə həmin 2006-cı ildə Rafiq Tağı Azərbaycanda “Avropa və biz” məqaləsində “dini və milli zəmində nifrətin qızışdırılması” ittihamı ilə 3 il müddətinə azadlıqdan məhrum edilib. 2007-ci ildə yazıçı prezident tərəfindən əfv olunub və azadlığa buraxılıb.
2011-ci il noyabrın 19-da Bakıda naməlum şəxslər Rafiq Tağıya hücum edib və onu bıçaqla yaralayıblar. Həkimlərin yazıçının müalicəsinə kifayət qədər səy göstərməməsi ilə bağlı şübhələr olsa da, məsələ araşdırılmayıb. Rafiq Tağı xəstəxanada jurnalistlərə müsahibə verib, ona qarşı hücumun soyğunla bağlı olmadığını (hücum səbəbi ilkin rəsmi məlumatda belə göstərilmişdi), onun yazdıqlarına görə qisas cəhdi olduğunu bildirmişdi.
Qətlindən iki il sonra 2013-cü ildə Tağının qətli ilə bağlı istintaq qatil(lər)in şəxsiyyətinin müəyyən edilməməsi səbəbilə dayandırılıb.
Yerli məhkəmələr mərhum yazıçının həyat yoldaşının istintaqın dayandırılması ilə bağlı şikayət ərizəsini icraata qəbul etməyib. Son instansiya olaraq Mailə Tağıyeva həyat yoldaşının yaşamaq hüququnun, ədalətli istintaq hüququnun və ifadə azadlığı hüququnun pozulması ilə bağlı AİHM-ə müraciət edib.
Avropa Məhkəməsi bu halda Avropa Konvensiyasının 2-ci maddəsinin (yaşamaq hüququ) pozulduğunu təsdit edib.
AİHM-in qərarında xüsusi qeyd edilib ki, hakimlər Tağının qətlinin istintaqının gedişində heç bir pozuntu aşkarlamayıb. Bununla yanaşı zərərçəkən statusu almış Mailə Tağıyevanın hüquqları pozulub. Avropa Məhkəməsi qət edib ki, zərərçəkən Tağıyevanın dəfələrlə müraciətinə baxmayaraq, istintaq ona araşdırmanın gedişatı ilə tanış olmağa imkan verməyib. Həmçinin istintaqın gedişatı ictimaiyyətdən də gizlədilib.
AİHM-in qərarı ilə Azərbaycan hökuməti Rafiq Tağının həyat yoldaşına dəymiş mənəvi zərərə görə 12 min avro, həmçinin məhkəmə xərclərinə görə 2 min avro kompensasiya ödəməlidir – “Avropa Məhkəməsi Gündəliyi”nin məlumatında deyilir.
