Avropa İnsan Haqları Məhkəməsi Azərbaycanı 64 min 30 avro [$74.915] həcmində cərimələyib. Bu qərar dövlət strukturları tərəfindən mülkiyyət hüquqlarının pozulduğunu bildirən yeddi ölkə vətəndaşının iddiasına əsasən qəbul edilib.
Avropa İnsan Haqları Məhkəməsi (AİHM) sentyabrın 21-də Azərbaycanın yeddi vətəndaşının iddiası ilə bağlı qərarını açıqlayıb. Yeddi iddia “Zülfiyyə Əliyeva və digərləri Azərbaycana qarşı” adı altında bir işdə birləşdirilib.
İddiaçılar Bakının Səbail rayon sakinləridir. Onların paytaxtın mərkəzindəki mənzilləri 2011-2012-ci illərdə şəhər hakimiyyətinin sərəncamı ilə yol inşaatına görə sökülüb. Mənzilin hər kvadratmetrinə görə iddiaçılara 1500 manat [2012-ci ilin məzənnəsinə görə təxminən $2.000] ödənilib. Amma nəticədə sökülmüş evlərin sakinləri kompensasiyalarına aldıqları məbləğin 30%-i qədər əlavəni əldə edə bilməyiblər.
İddiaçılar AİHM-ə ünvanladıqları iddialarında qeyd ediblər ki, bütün yerli məhkəmə instansiyaları onların Avropa Konvensiyasının 1-ci və 14-cü maddələrində əks olunan mülkiyyət hüququnu pozub.
Avropa Məhkəməsi iddiaları əsaslı hesab edib və Azərbaycanın Konvensiyanın 1-ci protokolunun 1-ci maddəsini (mülkiyyət hüququ) pozduğu qərarını verib.
Beləliklə, AİHM-in qərarı ilə Azərbaycan dövləti iddiaçılara ümumilikdə 64.030 avro [$74.915] ödəməlidir. Bu məbləğə mənəvi ziyana görə kompensasiya da daxildir.
