Avropa İttifaqının Ermənistandakı nümayəndə heyətinin qrant proqramları üzrə əlaqələndiricisi Yerevanda həbs edilib

Avropa İttifaqının Ermənistandakı nümayəndə heyətinin qrant proqramları üzrə əlaqələndiricisi Marine Papyan xüsusilə böyük miqdarda maliyyə vəsaitinin mənimsəməsi şübhəsilə saxlanılıb.

İstintaq Komitəsinin məlumatına görə, Marine Papyan bu vəsaitləri Avropa İttifaqının Ermənistana ayırdığı qrantlardan mənimsəyib.

İstintaq məlumatlarına görə, adı açıqlanmayan ictimai təşkilat 2008-ci ildə Aİ Nümayəndə Heyətinin qrant müsabiqəsində iştirak edib. Müsabiqə nəticələrinə əsasən bir neçə illik qrant müqaviləsi imzalanıb. Təşkilatın hesabına pul köçürülüb, amma təşkilat öz öhdəliklərini yerinə yetirməyib. Təşkilatın sədri mənimsəmədə ittiham olunur. Mənimsənilən vəsaitin həcmi 67,335 milyon dram (təxminən 135 min avro) həcmində dəyərləndirilir, – bu gün News.am nəşri yazıb.

İstintaq orqanları qeyd edir ki, təşkilat xərclərin əsaslı olması haqda saxta sənədlər hazırlayaraq Aİ-ə təqdim edib. İctimai təşkilatın rəhbərinə qarşı Ermənistan Cinayət Məcəlləsinin 178-ci maddəsinin 3-cü hissəsinin 1-ci bəndi (dələduzluq, xüsusilə böyük həcmdə) və 325-ci maddəsinin 2-ci hissəsi (sənədlərin, ştampların, möhürlərin, blankların, dövlət nömrə nişanlarının saxtalaşdırılması, satılması və ya istifadəsi, əvvəlcədən əlbir olmaqla bir qrup şəxs tərəfindən törədildikdə) üzrə ittiham irəli sürülüb. Bu gün “Novosti-Armeniya” nəşrinin yaydığı məlumata görə, ziyanın əvəzi artıq ödənilib.

Papyan aprelin 26-da saxlanılıb. Qaldırılmış cinayət işi çərçivəsində daha 13 nəfər ittiham olunur, onlardan üçü haqqında axtarış elan olunub. Onlar da Avropa İttifaqının Ermənistandakı Nümayəndə Heyətinin qrant üçün ayırdığı vəsaiti mənimsəməkdə, mənimsəmədə əlbir olmaqda, sənədləri saxtalaşdırmaqda günahlandırılırlar.