Anakliya – siyasətin girovuna çevrilmiş Gürcüstan kurortu
Anakliya – Gürcüstanın Qara dəniz sahilində unudulmuş kurortu
Anakliya Gürcüstanın qərbində, Abxaziya sərhədinin yaxınlığında yerləşən kurortdur. Bura ilk baxışdan inkişaf və gözəl həyat üçün hər şeyi – sərfəli coğrafi mövqeyi, iqlimi, dənizi olan kiçik qəsəbədir. Amma buna baxmayaraq, burada insanlar total işsizlik və yoxsulluq vəziyyətində yaşayırlar. Yerli sakinlərin çoxu hesab edir ki, Anakliyanın inkişafı üçün hakimiyyətin siyasi iradəsi yoxdur. Buna görə də nəhəng vədlərin həyata keçməsini onlar artıq 10 ildən çoxdur ki, gözləyirlər.
Gürcüstan hakimiyyəti 2010-cu ildə sürətli templə kurortu inkişaf etdirməyə başlayıb. Amma 2012-ci ildə hakimiyyət dəyişikliyindən sonra paytaxtda Anakliya unudulub. 2016-cı ildə burada dərinsulu limanın inşası başlayanda yaranmış ümid də boşa çıxıb. Milyonlarla investisiya, minlərlə iş yeri və hətta geosiyasi sıçrayış ümidi verən layihə 2020-ci ildə investorlarla Gürcüstan hakimiyyəti arasında yaranan mübahisə nəticəsində dayanıb. Dayandırılmış layihə ilə birlikdə Anakliyada həyat da dayanıb.
Kontrastlar qəsəbəsi
Anakliyanın mərkəzi küçəsi gözəldir, bütün uzunluğu boyu palmalar əkilib. Dayanacaqda saçları maviyə boyanmış, çiynində böyük çanta olan qız dayanıb, parlaq zahiri görünüşü ilə diqqət çəkir. O, foto çəkdirməyə razılaşır, amma az danışır və müsahibə verməyə razılaşmır.
Adı Tamunadır, Zuqdididə – Sameqrelo – Zemo Svaneti regionunun mərkəzində, buradan 30 kilometrlik məsafədə yaşayır. Anakliyaya çimərlikdən budaq toplamağa gəlib. Onlardan müxtəlif bəzək əşyaları düzəldir.
Pandemiyaya qədər qeyri-hökumət təşkilatında işləyib, indi işsizdir. İxtisasca turizm mütəxəssisidir, amma öz regionunda ixtisası üzrə iş axtarmır. Biz təəccüblənirik. Amma tezliklə pazlın hissələri yerinə oturur.
- Dondurulmuş mövsüm. Pandemiya Gürcüstanın qış kurortlarına necə təsir edib?
- Dəniz sahilinin direktoru və ya Gürcüstanda pandemiya zamanı turizm. Video
Qəsəbənin mərkəzindən və sahildən uzaqlaşdıqca avropasayağı Anakliyanın yoxa çıxdığını və sıradan kasıb Gürcüstan kəndi mənzərəsinin başladığını görürsən. Dağılmış yollar və palçıqlı küçələr, köhnə evlər, yan yatan hasarlar, bəzi yerlərdə gürcü və rus dillərində kirayə evlər haqda köhnə paslı lövhələr gözə dəyir.
Yerli sakinlər az danışırlar. Bu ehtiyat tədbiridir – tərəzinin digər gözünə yay mövsümünün taleyi qoyulub.
Boş bulvar və mövsümün başlaması
Yayın ilk həftəsidir, günortadan sonra. Hava sarıdan bəxtimiz gətirməyib – hava tutqundur və ara-sıra yağış yağır. Amma biz çimərlikdə insanlara rast gələcəyimizlə bağlı ümidimizi itirmirik. Məlum olur ki, nahaq yerə.
Dəniz kurortu görkəmini itirmiş baxımsız Anakliya çimərliyində praktiki olaraq heç kim yoxdur. Bulvar da boşdur. Burada da baxımsızlıq hökm sürür. Bulvar boyu ucalan palmalar artıq qurumağa başlayıb, naxoş mənzərədir.
“Dünən otu biçiblər, dizə çatırdı artıq”, – bunvarda velosiped və uşaq maşınlarını kirayə verən gənc qadın Nana (ad dəyişdirilib) deyir. Baxımsız bulvarda onun rəngarəng velosipedləri uzaqdan diqqət çəkir. Cəmi bir neçə gün əvvəl o öyrənib ki, indən belə bələdiyyəyə icarə pulu ödəməli olacaq, bu da onun xoşuna gəlmir.
Nana deyir ki, son iki ili Anakliya yerli sakinlər üçün əsas gəlir mənbəyi olan turizmlə yaşaya bilməyib. O, bu il vəziyyətin yaxşılaşacağına və həm icarəni ödəyəcək, həm də ailəsini dolandıra biləcək qədər pul qazana biləcəyinə əmin deyil. Nana ailədə işləyən tək adamdır.
Bu bizneslə dörd ildir ki, məşğuldur. Velosiped kirayəsinin bir saatı 10 laridir [$3,2 yaxın], uşaq maşınında 10 dəqiqə gəzmək isə beş lariyə başa gəlir. Nana deyir ki, orta hesabla mövsüm boyu 4-5 min lari [$1 300-1 600 civarında] qazanır. Bu pulla ailəsi bütün qışı dolanmalıdır.
Anakliya haqda
Anakliya Gürcüstanın Sameqrelo regionunda, Abxaziya ilə sərhəddə, inzibati mərkəz Zuqdididən 30 kilometrlik məsafədə yerləşən, qumluq çimərlikləri olan dənizkənarı iqlim kurortudur. Qəsəbə İnquri çayı üzərində qurulmuş, Anakliyanı qonşu Qanmuxuri kəndi ilə birləşdirən Gürcüstanda ən uzun – 552 metrlik piyada körpüsü ilə də məşhurdur.
2011-ci ildə, ötən hakimiyyət dövründə Anakliyaya şəhər statusu verilməsi planlaşdırılırdı. 2012-ci ildə Anakliya ətrafındakı ərazidə Lazika yeni liman şəhərinin inşa ediləcəyi elan olunmuşdu. Bu şəhər 2024-cü ilə qədər yarım milyonluq əhalisi ilə Gürcüstanın ikinci böyük şəhərinə çevrilməli idi.
Bir neçə binanın inşası başlamışdı, amma 2012-ci ildə Mixail Saakaşvili seçkilərdə uduzandan sonra layihə dayandırıldı. Həmin vaxtdan Gürcüstan milyarder Bidzina İvanişvilinin “Gürcü arzusu” partiyası tərəfindən idarə olunur, o da, Saakaşvilinin layihələrinə rəğbətlə yanaşmır.
Gürcüstanın Statistika xidmətinin məlumatına əsasən, 2014-cü ildə Anakliyada 510 ailə və ya 1400 nəfər yaşayırdı. Yerli sakinlərin əsas gəlir mənbəyi turizm və balıqçılıq idi.
Dənizkənarı şəhərcik həyatının cazibəsi və kədəri
“Dəniz kənarında həyat bir lütf olmalıdır. Amma siz indi pensiyada deyilsizsı və heç yanda işləmirsizsə, acından ölməli olacaqsız”, – “Nuqo” ailə otelinin sahibəsi Tamar Çeliya deyir. Tamar kədərlə bildirir ki, dənizkənarı qəsəbənin sakinləri dolanışıq üçün xaricə gedirlər:
“Qadınlar əsasən İtaliyaya baxıcı işləməyə gedirlər. Çoxları artıq gedib. Ancaq son zamanlarda on qadın”.
Tamarın ailəsi artıq dörd ildir ki, Anakliyada ailə oteli idarə edir. Üçmərtəbəli taxta evdə 30 adamlıq doqquz otaq var. Hər otağın divarları dünyanın müxtəlif ölkələrinin mənzərələri ilə tərtib olunub. “Qonaqlar razı qalsınlar deyə”, – ev sahibəsi deyir.
Son iki ildə pandemiyaya görə istirahət edən olmayıb:
“Turist olmayıb. Elə biz də qorxmuşduq, heç kimi evə buraxmırdıq. İndi də Anakliyada heç kimin evində qonaq yoxdur, bəlkə mərkəzdə bir-iki nəfər”.
Anakliyada üç böyük otel və ailə tipli çox sayda mehmanxana var. Bir gecəlik qiymət xidmətlərdən və şəraitdən asılı olaraq 30 laridən [$9,6 yaxın] başlayır və 200 lariyə [$64 yaxın] çatır.
Ötən il pandemiyaya görə Anakliyada demək olar ki, əcnəbi turist olmayıb. Böyük otellər karantin üçün məkan olaraq təqdim olunub. Ötən il yerli mehmanxanalar daxili turizm hesabına ayaqda qalıb, amma bu rejimlə uzun müddət davam etmək mümkün deyil.
“Pandemiya bizim həyatımızı dəyişib, gəlirlərimizi iki dəfə azaldıb, amma biz yenə də bu il açılmağa hazırlaşırıq”, – artıq doqquz ildir ki, bulvarda kafe idarə edən Eka Qviliya deyir.
O bildirir ki, bir həftə sonra açılışa hazırlaşır, amma çətin alındın:
“Yerli bələdiyyə bizə rədd cavabı verir, onlar hansısa yeni qaydalar müəyyən ediblər icarə ödənişi istəyirlər, amma hələ qiymət müəyyən olunmayıb. Biz də qiyməti öyrənməyincə açıla bilməyəcəyik”.
Zuqdidi meriyasından bizə bildirildi ki, icarə qiymətini hələlik deyə bilmirlər – əmlakın audit dəyərləndirməsinin nəticələrini gözləyirlər.
Vaxt isə gedir. Eka yerli turistlərə ümid edir və inanmır ki, bu mövsümdə əcnəbilər gəlsin.
Həm Ekanın, həm Nananın gələcəyi yerli hakimiyyətin təyin edəcəyi icarə qiymətindən asılıdır.
Bundan başqa, meriyada Ekadan ümumilikdə üç ay işləyəcək açıqhava kafesinin memarlıq çertyojunu istəyiblər. Onun sözlərinə görə, bunun üçün onun müraciət etdiyi memar imtina edib, çünki küçdə düzülən masaların və çətirlərin çertyojunun nəyə lazım olduğunu anlamayıb.
O, həmçinin öz hesabına kafeyə elektrik və su çəkməlidir.
Anakliyada liman – dondurulmuş layihə
Turizm Anakliyada həyatı indikindən daha cəlbedici edəcək yeganə şey deyil. Üstəlik Gürcüstanda hesab edirlər ki, investisiyalar sayəsində Anakliya yalnız bu balaca qəsəbənin və ya rayonun yox, bütünlükdə ölkənin həyatını dəyişə bilər. Söhbət Gürcüstanda ilk dərinsulu limanın inşasından gedir.
Anakliyanın yerləşdiyi İnquri çayının mənsəbi ötən dövrlərdə də naviqasiya üçün rahat yer hesab olunurdu. Bu kiçik kənddə liman tikmək ideyası sovet Gürcüstanında da bir neçə dəfə gündəmə gəlib.
Şəhər və liman inşaatı ideyasını Gürcüstanın keçmiş hakimiyyəti irəli sürüb. “Gürcü arzusu” hökuməti və şəxsən partiya lideri İvanişvili bu layihə ilə bağlı dəfələrlə skeptik mövqeyini ifadə edib.
Amma 2014-cü ildə hökumət yenə də Anakliyada dərinsulu limanın inşaatı ilə bağlı beynəlxalq tender elan edib. Tenderdə Gürcüstanın “TBC Holding”, Amerikanın Orta Asiya ölkələrində çalışan “SSA Marine, British Wondernet Express”, o cümlədən də Bolqarıstanın “G-Star Ltd” şirkətlərinin daxil olduğu “Anakliya İnkişaf Konsorsiumu” qələbə qazanıb. Layihəyə 400 milyon dollar sərmayə yatırımı nəzərdə tutulmuşdu.
Gürcüstanın Qara dənizdə iki limanı var – Poti və Batumi. Amma dərinlikləri az olduğu üçün bu limanlara bütün növ gəmilər yanaşa bilmir. Buna görə də bu limanlar Qara dənizdəki nə Türkiyənin, nə də Rusiyanın limanları ilə rəqabət apara bilmir.
Anakliyada liman inşa edilərsə, mənzərə kəskin dəyişəcək. Layihədə deyilir ki, liman 10 min konteyner tutumlu gəmiləri qəbul edə biləcək – müqayisə üçün ölkənin əsas Poti limanı ancaq 1500 konteyner tutumlu gəmiləri qəbul edə bilir. Anakliya limanı Gürcüstanın tranzit potensialını əhəmiyyətli dərəcədə artıracaq, çünki Mərkəzi Asiya və Avropa arasında yüklərin tranziti üçün yol açmış olacaq.
İnvestisiya razılaşması imzalanıb və 2017-ci ildə inşaat başlayıb. Amma cəmi bir il sonra, artıq sualtı işlər başa çatdıqda dövlət və konsorsium arasında ziddiyyətlər başlayıb və inşaat dayandırılıb.
Ziddiyyətlərin əsas səbəbi liman planlaşdırılmış müddətdə layihə gücünə çatmayacağı halı üçün hökumətin investorlara dövlətin maliyyə zəmanətini təqdim etməməsi olub. Hökumət konsorsiumu lazımi vəsaiti tapmağa qadir olmamaqda günahlandırıb.
Bundan başqa, konsorsium rəhbərlərinə – nüfuzlu bankirlər Mamuka Xazaradze və Badri Caparidzeyə qarşı 10 il əvvəl baş vermiş tranzaksiyada çirkli pulların yuyulması ilə bağlı ittiham üzrə cinayət işi başlanıb.
Gürcüstan müxalifəti dəfələrlə bildirib ki, hakimiyyət Gürcüstanda yeni limanın tikilməsindən narahat olan Rusiyanın təzyiqi altında qəsdən inşaatı sabotaj edir.
Layihə qarşısında yaradılan maneaələrlə bağlı ABŞ Dövlət Departamenti dəfələrlə narazılığını ifadə edib.
2021-ci ilin yanvarında Gürcüstan hökuməti konsorsiumla sövdələşməni tamamən pozduğunu və layihənin dayandırıldığını elan edib. Martda isə baş nazir İrakli Qaribaşvili yeni tender hazırlamaq və yeni investorlar tapmaq haqda göstəriş verib.
Bu gün heç kim Anakliya limanının nə zaman tikiləcəyi ilə bağlı hətta təqribi müddət də deyə bilmir.
“Liman inşa ediləndə çox adam işlə təmin olunmuşdu, onların gəliri vardı. Bəziləri fəhlələri evlərini kirayə vermişdi, bəziləri onlar üçün yemək hazırlayırdı, xadimə işləyirdi. Hamı razı idi”, – yerli sakin Tamar Şeliya Anakliyada inşaatın fəal getdiyi dövrü xatırlayır.
Anakliyada kiminlə danışsaq, hamı gələcək çiçəklənməni liman inşaatı ilə bağlayır.
Anakliyanın İnkişaf Konsorsiumunun apardığı “Anakliyanın xüsusi iqtisadi zonasının potensialı”nın tədqiqinə əsasən, layihənin reallaşdırılması 20 il ərzində 16 min iş yeri açmağa və bir milyard dollardan çox sərmayə cəlbinə imkan verəcək.
Qum burulğanları
Amma hələlik dondurulmuş inşaat yerli sakinlərə ancaq bəla gətirir. Gələcək limanın yerinə, 110 hektarlıq sahəyə beş milyon kubmetr qum tökülüb. Hazırda işlərin dayandırıldığı liman rayonu qəsəbə ilə sıx sərhəddədir. Külək əsəndə Anakliyada hər şey boz olur, yerli sakinlərin evləri və həyətləri qumla örtülür.
“Bu, adi qum deyil. Bu, qum tozudur. Bütün dəlmə-deşikdən keçir. Nəfəs almaq olmur. Adam zəhərlənir”, – evini inşaatdan hasarın ayırdığı Tamar Şeliya deyir.
Şeliyanın ailəsi artıq bir neçə dəfə üçmərtəbəli taxta evini “Kerxerlə” yuyub. Qum yuyulub, amma taxta divarlara su hopub və evdəki hər şey xarab olub. Qara kifi gizlətmək üçün divarları qızılı lakla boyayıblar. Amma hər dəfə külək əsəndə Şeliyaların gözəl üçmərtəbəli taxta evi yenidən qaralır və cəhənnəm əzabı yenidən başlayır.
“Biz evi dədə-baba ərazisində tikmişik, hüç yana getmək istəmirdik. Biz təsəvvür etmirdik ki, bizi belə bir şey gözləyir. İndi mən arzu edirəm ki, bizi burdan köçürsünlər”, – Tamar deyir.
Bu dözülməz qum burulğanları ancaq insan sağlamlığına yox, turizmə də ziyan vurur.
“Bizə turistlər gəlsə və bir daha külək əssə, hamı qaçacaq. Qaynım yanımızda yaşayır. Onlara uşaqlı rus ailə gəlmişdi. Səhər gəldilər bir-iki saat sonra külək başladı. Onlar şokdaydılar ki, burada necə yaşayırsız, necə nəfəs alırsız? Taksi çağırdılar və getdilər”, – Tamar Şeliya danışır.
Nuqzar Qabeliyanın sahəsi də liman inşaatının düz yanında yerləşir. O deyir ki, qum keləyi ancaq onun evini yox, bütün Anakliyanı bürüyür: “Bu quç un kimidir. Hətta ən xırda dəlik tapsa da, bütün evi dolduracaq”.
Nuqzar deyir ki, problemin həlli üçün bu əraziyə yenidən münbit torpar tökmək kifayətdir və bir neçə dəfə yağış yağandan sonra qum burulğanları artıq olmayacaq.
“Bir də sahilin dağılmaqdan qorunması problemi var. Onu da həll etmək çətin deyil. Kişik dalğaqıranlar quraşdırmaq lazımdır, çay bir az da qum gətirəcək və dəniş təbii yolla geri çəkiləcək… Amma quç məsələsində olduğu kimi, təbii ki, bizdən soruşan yoxdur”.
Balıq tutmaq olar, amma olmaz
“İnsan həmişə su yanında yaşamağa çalışıb ki, bundan xeyir götürsün. Amma 21-ci əsrdə bu, xeyir yox, problemə çevrilib”, – Nuqzar Qabeliya təəssüflə deyir.
Nuqzar balıqçıdır, uzun illər bu biznes onun üçün həm biznes, həm də gəlir mənbəyi olub:
“Anladığım qədərincə, Anakliyada balıqçılıqheç vaxt məhdudlaşdırılmayıb. Kürü qoyma dövrü olur, o zaman balıq tutmursuz, qalan bütün vaxt qazana bilərsiz. İndi isə sizi elə cərimələyə bilərlər ki, evi satmaq məcburiyyətində qala bilərsiz”.
Anakliya sakinlərinin təxminən 10 faizi üçün balıqçılıq yeganə qazanc mənbəyidir. Anakliyada balıqçılar indi çox ağır vəziyyətdədirlər. Azad şəkildə balıq tutmaq üçün onlara lisenziya lazımdır. Lisenziyanı almaq üçün isə onların tam təchizatlı balıqçı gəmisi olmalıdır, Batumiyə getməli və bir neçə min lari ödəməlidirlər.
Anakliya balıqçıları isə balığı kiçik motorlu qayıqlarda balıq toru ilə balaca qapalı ərazidə tuturlar:
“Bizə Anakliya ərazisində kilometr yarım ərzi ayrılıb. Orada nə qədər insan yerləşə bilər?! Mövsüm gələndə isə Türkiyədən 30-40 gəmi gəlir… Ora qoruqdur, bura qadağan olunmuş ərazidir, bəs balığı harada tutaq?”
Türkiyə gəmilərinin lisenziyası var, Anakliya balıqçıları üçün onlarla rəqabət aparmaq mümkünsüz bir şeydir.
Transparency International Georgia təşkilatının 2015-2016-cı illərdə Anakliya balıqçılarının ağır vəziyyətinə həsr olunmuş materiallarında qeyd olunur ki, dövlət balıq tutmaq üçün verilən lisenziya şərtlərini yenidən gözdən keçirməlidir, çünki yerli sakinlər üçün lisenziyalı şirkətlərlə rəqabət aparmaq sadəcə mümkün deyil.
Nikbinlik üçün səbəb var?
Amma çox sayda problemlərin olmasına baxmayaraq, yerli sakinlər nikbinliyi əldən vermirlər.
“Anakliyanın böyük potensialı var, normal yiyəsi olsa, hamıya yaxşı olmalıdır”, – Zuqdidi yerli Şurasında, Bələdiyyə Sakrebulosunda Anakliyanı təmsil edən majoritar deputat Data Şeliya deyir. O, keçmiş prezident Mixail Saakaşvilinin partiyası Vahid Milli Hərəkatın nümayəndəsidir.
2014-cü ildən Zuqdidi bələdiyyəsinə Gürcüstandakı bütün bələdiyyələr kimi “Gürcü arzusu” iqtidar partiyasının nümayəndəsi sədrlik edir.
Anakliya sakinləri arasında keçmiş hakimiyyətə qarşı rəğbət yaxşı hiss olunur – böyük ehtimalla ona görə ki, məhz VMH dövründə burada böyük yenidənqurma işləri başlayıb, hazırkı hakimiyyət dövründə isə dayandırılıb.
“Burada heyrətamiz sahil, qumluq çimərlik, sakitlik, park var. Bəs siz haradasa Anakliyanın reklamını görmüsüz?!”, – Data soruşur. Biz də Tbilisidən Anakliyaya qədər yolda bircə dənə də olsun reklam lövhəsinə rast gəlmədiyimizi xatırlayırıq.
“Əgər metroda, keçidlərdə Tbilisidəki kazinonun reklamını asmaq mümkündürsə, məsələn, Tbilisi-Zuqdidi qatarında niyə Anakliyanın reklamı və məlumat bukletləri olmasın?!” – deputatın səsində həyəcan hiss olunur.
Data Şeliya hesab edir ki, mövsüm zamanı böyük turist axını müşahidə olunan artıq “təbliğ olunmuş” turizm mərkəzlərində Anakliya haqda informasiyanın təqdim olunduğu böyük bannerlər olmalıdır ki, insanlar burada da turistlərin gözləndiyini bilsinlər.
Başqa bir imkan festivallardır. 2014-cü ildə Anakliyada Rusiyanın ilhaq etdiyi Krımdan bura köçmüş “Kazantip” festivalı keçirilib.
“İnsanlar o qədər çox idi ki, yer yox idi. Anakliyadan 30 kilometr radiusda mövcud bütün yerlər bron edilmişdi”, – Tamar Şeliya xatırlayır.
“Kazantip” ancaq bir dəfə keçirilib, sonra Anakliyada “Gem Fest” və “Echo Waves” festivalları təşkil olunub. Sonuncunun bu il də keçirilməsini böyük ümidlə gözləyirlər. Data Şeliya hesab edir ki, bu festival iki illik fasilədən sonra Anakliyanı dirçəldəcək.
Digərləri də belə düşünür.
“Deyirlər ki, avqustun son həftəsində keçirmək lazımdır. Belə festival bura insanları cəlb etməlidir, yoxsa burada infrastruktur yoxdur, əyləncə yoxdur, istirahət edənlər bura gəlməyəcək, Batumiyə gedəcəklər”, – Eka Qviliya deyir.
Dövlət nə edir?
Anakliyanın inkişafı üçün dövlət nə etmək niyyətindədir? Biz bu sualı Gürcüstanın Turizm Administrasiyasına verdik, onlar da bizi “Sameqrelo yerli idarəetmə təşkilatına” (Samegrelo Destination Management Organization — DMO) yönləndirdilər. Bu, beynəlxalq tövsiyyələrə əsaslanan, USAID-in maliyyə dəstəyilə fəaliyyət göstərən turizmin yeni idarəetmə modelidir. Məqsədi regionların təbliği və turizmin inkişafıdır.
Bu il Sameqrelo və Anakliyanın təbliği məqsədilə bir neçə tədbir nəzərdə tutulub – “Sameqrelo DMO” direktoru Levan Tsulaya bizə bildirib:
“Yaxın günlərdə Anakliya yaxınlığında yerləşən Kolxid Milli Qoruğunun Çuriya hissəsi açılacaq, orada USAID dəstəyilə kəndir parkı tikilib və biz turist gəzintiləri üçün bərə almışıq. “Balıqçı evi”nin açılışı da nəzərdə tutulub… Bundan başqa, hər il biz informasiya turları keçiririk ki bu da Sameqrelonun turizm potensialının populyarlaşdırılması üçün yaxşı vasitədir”.
Bundan başqa, Sameqrelo haqda iki dildə (gürcü və ingilis) qrafik video-çarx artıq hazırdır, onlar Gürcüstanın və xarici onlayn platformalarda, o cümlədən də Tripadvisor-da yerləşdiriləcək. İki video-çarxdan biri ümumilikdə Sameqrelonun turizm potensialına, digəri isə gənclər festivallarının keçirilməsi üçün uyğun yer kimi Anakliyaya həsr olunub.
JAMnews Sameqrelo administrasiyasından da dövlətin Anakliyanın inkişafı üçün nələr etdiyini və ümumiyyətlə dövlətin bu yerlərin potensialını necə gördüyünü aydınlaşdırmağa çalışıb. Amma administrasiyada şərh verməkdən imtina ediblər.
Zuqdidi meriyasından Anakliya kurortunun inkişafı üçün nə planlaşdırıldığı haqda sorğumuzun cavabında bildiriblər ki, bu il yerli yollardan birinin və küçə işıqlandırmasının təmiri, o cümlədən də idman meydançasının inşası nəzərdə tutulub.
“Dörd il əvvəl rus ailə qonağımız idi. “Müəssisə hesabına” süfrə açdım. Şərab, pendir vardı, xaçapuri bişirmək əlimizdə asan məsələdir. Qadın küçəyə çıxdı, özününkülərə zəng vurmağa başladı ki, bəs bizim prezidentimizin dedikləri yalandır, biz cənnətə düşmüşük!” – Nuqzar Qabeliya danışır.
Hər şeyə rəğmən o, nikbinliyini itirmir və inanır ki, Anakliyada daha yaxşı həyatın mütləq başlayacağına inanır.
Mediaşəbəkənin dəstəyi ilə
