Daha iki jurnalist qaçaqmalçılıq ittihamı ilə həbs edilib
Azərbaycanda həbslər – Şahnaz Bəylərqızı, Şəmşad Ağayev
Azərbaycanda daha iki jurnalist qaçaqmalçılıq ittihamı ilə həbs edilib. Məhkəmə Şahnaz Bəylərqızı və Şəmşad Ağayev barəsində həbs-qətimkan tədbiri seçilməsinə qərar verib.
- Qəzaya uğrayan AZAL təyyarəsi Rusiyanın “Pantsir-S” HHM müdafiə sistemi ilə vurulub
- Azərbaycandan Avropa Məhkəməsinə edilən şikayətlər son iki ildə az qala iki dəfə artıb
- Qusarda terrorçulara qarşı əməliyyat keçirildiyi haqda rəsmi məlumat yayılıb
“Toplum TV işi” üzrə doqquzuncu həbs
Bu gün, fevralın 6-da Bakının Xətai rayon Məhkəməsinin qərarı ilə jurnalist Şahnaz Bəylərqızı (Hüseynova) həbs edilib. Bu qərar istintaq orqanının, yəni Azərbaycan Daxili İşlər Nazirliyinin təqdimatını təmin edi və Şahnaz Bəylərqızı barəsində 3 ay 15 gün müddətinə həbs qətimkan tədbiri seçilib.
Vəkili Bəxtiyar Hacıyev məhkəmədə hakimin diqqətinə çatdırıb ki, Şahnaz Bəylərqızının himayəsində iki azyaşlı övladı var, səhhətində ciddi problemlər (şəkər və hipertoniya) mövcuddur, bir ilə yaxındır ölkədən çıxışına qadağa qoyulması səbəbilə istintaqdan gizlənmək ehtimalı olmadığı üçün onun həbsdə saxlanmasına heç bir əsas yoxdur.
Lakin prosesdə ittiham tərəfini təmsil edən müstəntiq Əlibala Hacıyev bildirib ki, bu faktla bağlı yeni cinayət işi açılıb və jurnalist “mütəşəkkil dəstənin digər üzvlərinə” təsir göstərə bilər.
Vəkil Bəxtiyar Hacıyevin sözlərinə görə, Bəylərqızının həbs olunduğu bu iş yanvarın 21-də “Toplum TV işindən” ayrı icraata ayrılıb.
Şahnaz Bəylərqızı məhkəmədə çıxış edərək ona qarşı irəli sürülən ittihamlarla razılaşmadığını, həbsinin jurnalist fəaliyyəti ilə bağlı olduğunu bildirib.
“Toplum TV işi” üzrə həbs edilən digər şəxslər kimi, ona da Cinayət Məcəlləsinin 162-1.1 (qanuni qüvvəyə minmiş əmək müqaviləsi bağlamadan işçiləri hər hansı işə cəlb etmə), 192.3.2 (külli miqdarda qanunsuz sahibkarlıq), 193-1.3.1 (qanunsuz əldə edilmiş əmlakın leqallaşdırılması), 193-1.3.2 (…külli miqdarda törədildikdə) maddələri ilə ittiham irəli sürülüb miqyasda), 206.4 (qaçaqmalçılıq mütəşəkkil dəstə tərəfindən törədildikdə) və 213.2.1 (mütəşəkkil dəstə tərəfindən vergidən yayınma) maddələri ilə təqsirləndirilir.
Bu maddələr üzrə 12 ilə qədər həbs cəzası nəzərdə tutulur.
Şahnaz Bəylərqızı müstəqil internet mediası olan Toplum TV-də ictimai-siyasi verilişin aparıcısı olub. O, bu media orqanının fəaliyyəti ilə bağlı açılmış cinayət işi üzrə şahid qismində bir neçə dəfə dindirilib.
2024-cü ilin mart ayında Toplum TV-nin redaksiyasına polis basqını olub, ofisi möhürlənib, texniki avadanlıqlar götürülüb, həmin vaxt redaksiyada olan bütün əməkdaşlar polis idarəsinə aparılıb. Daha sonra əməkdaşların bir hissəsi sərbəst buraxılıb. 7 nəfər Toplum TV-yə qarşı açılan cinayət işi üzrə həbs edilib, daha iki əməkdaş isə polis nəzarətinə götürülüb. Onlardan biri Fərid İsmayılov 2025-ci il yanvarın 17-də həbs edilib.
Şahnaz Bəylərqızı fevralın 5-də saxlanılıb, mənzilində axtarış aparılıb, telefonu, kompüteri və bəzi şəxsi əşyaları götürülüb.
Onun həbsindən bir neçə saat əvvəl hökumətyönlü “Baku TV” internet nəşri Toplum TV haqqında Bəylərqızının da adının çəkildiyi qaralayıcı material dərc edib.
“Arqument.az”ın baş redaktoru, “Toplum TV”nin aparıcısı “Meydan TV işi”ndə həbs edilib
Bu gün məhkəmənin qərarı ilə ikinci jurnalist, Arqument.az saytının baş redaktoru Şəmşad Ağayev qaçaqmalçılıq ittihamı ilə ilkin istintaq dövründə 2 ay 1 gün müddətinə həbs edilib. O, həm də “Toplum TV”də veriliş aparıcığı olub. Amma Ağayevin həbsi “Meydan TV işi” çərçivəsində baş verib.
Qeyd edək ki, ötən il dekabrın 8-də “Meydan TV” əməkdaşları Ramin Cəbrayılzadə (Deko), Aynur Qəmbərova (Elgünəş), Aytac Əhmədova (Tapdıq), Aysel Umudova, Xəyalə Ağayeva, Natiq Cavadlı və Bakı Jurnalistika Məktəbinin direktor müavini Ülvi Tahirov 4 ay müddətinə həbs ediliblər.
Onlara qarşı Azərbaycan Cinayət Məcəlləsinin 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb.
Şəmşad Ağayevin vəkili Şəhla Hümbətova məhkəmədə bildirib ki, Ağayevin həbsi üçün heç bir əsas yoxdur və jurnalist “Toplum TV işi”ndə şahid olduğu üçün onun ölkədən çıxışına onsuz da qadağa qoyulub.
Lakin müstəntiq Samir İsmayılov Şəmşad Ağayevin azadlıqda qalmasını məqsədəuyğun hesab etməyib.
Jurnalist özü ona qarşı irəli sürülən ittihamları rədd edərək həbsinin jurnalist fəaliyyəti ilə bağlı olduğunu bildirib.
Ağayev də fevralın 5-də saxlanılıb. Polis əməkdaşları onu gecə saat 2-də evindən aparıblar. Jurnalistin mənzilində axtarış aparılıb, şəxsi əşyaları, kompüteri, onun və ailə üzvlərinin telefonları götürülüb.
2023-cü ilin noyabr ayından Azərbaycanda 3 cinayət işi – “Abzas Media işi”, “Toplum TV işi” və “Meydan TV işi” üzrə qaçaqmalçılıq ittihamı ilə 24 media nümayəndəsi həbs edilib. Həmin müddətdə daha üç jurnalist başqa ittihamlarla həbs edilib.
