Gürcüstan prezidenti: “İvanişvili yeni seçkilərlə bağlı danışıqlara gəlsin, axı hər şeyə nəzarət edən odur”
Zurabişvili İvanişvilini danışıqlara çağırıb
Gürcüstan prezidenti Salome Zurabişvili Tbilisinin Rustaveli prospektində minlərlə insanın iştirak etdiyi avropapərəst mitinqdə çıxış edərək, hakim “Gürcü arzusu” partiyasının fəxri sədri, ölkənin kölgə hökmdarı sayılan oliqarx Bidzina İvanişvilini prezident administrasiyasında görüşə və yeni parlament seçkilərinin necə təşkil ediləcəyinin müzakirəsinə dəvət edib.
Prezident bildirib bu görüş dekabrın 29-dan əvvəl, “Gürcü arzusu”nun yeni prezidenti Mixail Kavelaşvilinin inauqurasiyasının keçirilməsi nəzərdə tutulan vaxta qədər təşkil edilməlidir.
Salome Zurabişvili bir daha qeyd edib ki, “o, konstitusiyaya sadiq qalacaq və yeni parlament seçkiləri keçirilənədək Gürcüstanın legitim prezidenti və Ali Baş Komandanı olaraq qalacaq”.
Tbilisi və Gürcüstanın digər şəhərlərinin küçələri üç həftədən çoxdur ki, avropapərəst etirazlara bürünür. On minlərlə insan Avrointeqrasiya kursunu müəyyən edən konstitusiyanın qorunmasını və ölkədə hakimiyyətin qanuni yolla dəyişməsinə imkan verəcək yeni parlament seçkilərinin keçirilməsini tələb edir.
Müxalifət, prezident, eləcə də vətəndaş cəmiyyəti oktyabrın 26-da keçirilən parlament seçkilərini saxta hesab edir, parlamentin və onun seçdiyi hökumətin, həmçinin yeni prezidentin legitimliyini tanımır.
Salome Zurabişvili Rustaveli prospektində çıxışına başlayanda bir neçə dəqiqə sonra onun mikrofonu söndürülüb. Prezident meqafon vasitəsilə danışmağa davam etməli olub.
Salome Zurabişvili nə deyib?
“Bu, indi sizin qarşınızda dayandığım çox simvolik yerdir (Rustaveli prospektindəki 1 nömrəli məktəb). Atam bu məktəbdə oxuyub […] Sizin sayənizdə Yeni Gürcüstan artıq doğulub və sabah güclü Avropa Gürcüstanı olacaq, buna heç kim mane ola bilməz.
Mənə söz verdilər ki, tezliklə həbsxanaya düşəcəm”.
Bir gün əvvəl “Gürcü arzusu”nun təyin etdiyi baş nazir İrakli Kobaxidze deyib ki, Salome Zurabişvili hakim “Gürcü arzusu”nun yeni prezidenti Mixail Kavelaşvilinin inauqurasiyasının planlaşdırıldığı dekabrın 29-dan əvvəl postunu tərk etməkdən imtina edərsə, həbsxanaya düşəcək.
“Biz qorxuruq? Burada [inqilabın] doğulduğunu söyləyənlər yalan danışır, bir çox başqa şeylərdə olduğu kimi. Burada yalnız sülh, sevgi və azadlıq hökm sürür. <…> Mən sizə nə edəcəyimi demək istəyirəm. Mən Gürcüstanı müdafiə edən, onu təchiz edən və gücləndirən tərəfdaşlara sadiq olan Gürcüstan ordusuna sadiq olacağam. Mən onun ali komandanıyam və belə də qalacağam. Heç kim düşünməsin ki, mən hamının prezidenti deyiləm. Mən varam və olacağam! <…> Oktyabrın 26-da keçirilən parlament seçkilərini heç kim tanımayıb: nə siz, nə də Gürcüstanın xarici tərəfdaşları.
Hökumət qeyri-legitim və konstitusiyaya zidd olduqda, biz dərin böhrana düşürük və istənilən demokratik ölkədə bundan yeganə çıxış yolu yeni seçkilərin keçirilməsidir. Ona görə də mən Kobaxidzeni və parlamentin spikeri Papuaşvilini, seçkilərdə iştirak etmiş digər partiyaları və onları müşahidə edən təşkilatları dəvət edirəm. Yeni seçkilərin necə və nə vaxta təyin ediləcəyini müzakirə edəcəyik.
[…] Qoy İvanişvili yeni seçkilərlə bağlı danışıqlara gəlsin, çünki hər şeyə nəzarət edən odur. Dekabrın 29-na kimi bizim bu ölkəni irəli aparmaq, demokratiya, barışıq, tərəqqi nümunəsi kimi buraxmaq şansımız var. Mən cavab gözləyirəm. Və hər şeyə aydınlıq gətirmək üçün dekabrın 23-də axşam prezident administrasiyasından yeni müraciət yazacağam”.Etiraz iştirakçılarının təxmini sayını hesablayan Visioner təşkilatı dekabrın 21 və 22-də hər axşam ən azı 200 min insanın Tbilisinin mərkəzində olduğunu bildirib. İrakli Kobaxidze deyib ki, müxalifət və prezident 3000-dən çox insanı toplaya bilməz.
Zurabişvili İvanişvilini danışıqlara çağırıb
