Gürcüstanın əsas müxalifət qüvvəsi “Vahid Milli Hərəkat” parlamentə qayıdır
Gürcüstanda müxalifət partiyaları arasında əhalinin dəstəyinə görə liderlik edən “Vahid Milli Hərəkat” parlamentə qayıdacaq, baxmayaraq ki, patiya hələ də hakimiyyətlə razılaşmanı imzalamaqdan imtina edir və təmsilçiləri heç bir mövqe tutmayacaq.
2020-ci il 31 oktyabr parlament seçkilərinin rəsmi nəticələrinə əsasən, “Vahid Milli Hərəkat” seçkidə 27,18 faiz səs toplayıb və 10-cu çağırış parlamentində 36 yer qazanıb.
Aprelin 27-dən Gürcüstanda demək olar ki, bütün müxalifət qüvvələri 2020-ci ilin oktyabr seçkilərindən sonra elan edilmiş parlamentin boykotunu bitirib. Birləşmiş müxalifət hesab edir ki, həmin seçkinin nəticələri saxtalaşdırılıb və yeni seçkilərin keçirilməsini tələb edir.
Tələblər sırasında iki tanınmış müxalifətçinin – “Mtavari” əsas müxalif telekanalının aksiyaçısı Giorgi Rurua və “Vahid Milli Hərəkat” partiyasının lideri Nika Meliyanın həbsdən azad edilməsi də vardı.
Kəskin siyasi böhran bir neçə ay davam edib və Avropa Şurası prezidenti Şarl Mişelin fəal vasitəçiliyi ilə çözülüb. Aprelin 19-da hakimiyyət nümayəndələri və müxalifətin böyük hissəsi onun təklif etdiyi mübahisəli məsələlərin mərhələli həlli haqda müddəaların olduğu razılaşmanı imzalayıblar.
Həbs edilmiş siyasətçilər 2021-ci il aprelin sonunda azadlığa çıxıblar, növbədənkənar paralment seçkilərinin keçirilməsi haqda qərar 2021-ci ilin payızında keçiriləcək yerli seçkilərin nəticələrinə görə qəbul ediləcək.
- Gürcüstanda böhranın sonu? Hökumət və müxalifətin bir hissəsi razılaşmanı imzalayıb
- Nika Meliyanın işi – Gürcüstan müxalifətinin lideri nəyə görə həbs edilib və necə azadlığa buraxılıb?
“Vahid Milli Hərəkat” (Gürcüstanın eks-prezidenti Mixeil Saakaşvili tərəfindən yaradılıb) razılaşmanı imzalamaqdan imtina edib, baxmayaraq ki, imzalayanlar arasında partiyanın ayrı-ayrı nümayəndələri və keçmiş üzvləri var. Partiya sənədi imzalamamaqlarının əsas səbəbi kimi liderləri Nika Meliyanın amnistiyaya salınması ilə bağlı müddəanı hesab edir. “Amnistiya onun günahinin qəbul olunması deməkdir, halbuki o, siyasi məhbusdur”, – partiya nümayəndələri dəfələrlə bildiriblər.
“Amma biz qanunvericilik məsələləri üzrə qərarların verilməsinə tam cəlb olunmuşuq. Biz istefaya getmək niyyətində deyilik və Bidzina İvanişviliyə [milyarder, keçmiş baş nazir və “Gürcü arzusu” iqtidar partiyasının keçmiş sədri, onu Gürcüstanı kölgədən idarə edən şəxs hesab edirlər] qarşı mübarizəmizi davam etdirəcəyik”, – partiya lideri Nika Meliya deyib.
“Biz onunla hər yanda mübarizə aparacağıq – parlamentdə, hökumətdə, şəhərlərin küçələrində, kəndlərdə, barlarda. Bidzina İvanişvilinin oliqarxlığına artıq bu il son qoyulmalıdır”, – Meliya bildirib.
O hesab edir ki, müxalifət yenidən birlik nümayiş etdirməli və ortaq məqsədlər üçün birlikdə çalışmalıdır.
“Milli Hərəkat – Güc Birlikdədir” alyansının üzvü, deputat Qubaz Sanikidze deyir ki, partiyanın parlamentə daxil olmaq haqda qərarı taktiki qərardır, strategiya isə dəyişməz qalır – hökuməti dəyişmək.
“İndi konkret mexanizm var – müxalifətlə hakimiyyətin imzaladığı razılaşmaya görə yerli seçkilərdə iqtidar partiyası proporsional səslərin 43 faizindən azını toplayacağı təqdirdə növbədənkənar parlament seçkiləri elan olunacaq. Real şans var, amma bütün müxalifətin və cəmiyyətin ahəngdar işləməsi lazımdır. Buna görə də biz parlamentə daxil olmaq qərarı almışıq”, – Sanikidze deyib.
“Gürcü arzusu” bu qərarı Twitter-də şərh edib:
“Radikal Milli Hərəkat faktiki öz destruktiv siyasi proqramının məğlubiyyətini qəbul etdi. Bununla belə, Avropa Şurasının vasitəçiliyi ilə əldə edilmiş, siyasi böhranın bitirilməsi üçün əsas olan siyasi razılaşmanı imzalamaqdan imtina edir”.
Aprelin 30-da Mixail Saakaşvili Nika Meliya həbsdən azad edildiyi üçün “Vahid Milli Hərəkatı” hakimiyyətlə razılaşmanı imzalamağa çağırıb.
