Koronavirus hava ilə yayıla bilər. Rəsmən təsdiqlənən bu məlumat pandemiya ilə mübarizə kontekstini tamamən dəyişir
Ümumdünya Səhiyyə Təşkilatı (ÜST) iyulun 8-də koronavirusun hava yolu ilə yayılma ehtimalının doğru ola biləcəyini rəsmən qəbul edib.
Daha əvvəl ÜST bildirmişddi ki, COVID-19 insanlar arasında burun və ağız suyu damcıları vasitəsilə yayılır, havaya düşdüyü zaman isə dərhal yerə oturur.
32 ölkəni təmsil edən 239 nəfər alimdən ibarət qrup ÜST-ə məktub yazandan sonra bu bəyanat səsləndirilib. Bəyanatda virus hissəciklərinin havada uzun müddət qala və bu məkana düşən istənilən adamı yoluxdura bildiyinə dair sübutlar təqdim edilib.
• Koronavirus biznesə qarşı. Yerevandan video
Məktubu imzalayan alimlər Ümumdünya Səhiyyə Təşkilatına israrla rəhbərliyi dəyişməyi tövsiyə edirlər.
“Bu, qətiyyən ÜST-ə hücum deyil. Bu, elmi diskussiyadır, amma biz bunu artıq ictimai müstəviyə gətirməyə məcburuq, çünki Ümumdünya Səhiyyə Təşkilatı bir neçə dəfə bizim sübutlarımızı dinləməkdən imtina edib”, – məktubu imzalayanlardan biri, Kolorado Universitetinin kimyaçı alimi Xose Ximenes “Reuters”ə müsahibəsində bildirib.
ÜST-ün infeksiyanın profilaktikası və onunla mübarizə üzrə texniki rəhbərliyi Benedetta Alleqrantsi bunun cavabında Cenevrədə brifinq keçirib. Jurnalistlər bu brifinqi tarix adlandırıblar.
Əsas problemlər bu məsələdə beynəlxalq ictimaiyyətin sərt parçalanması və panika təhlükəsidir – Alleqrantsi deyib və Ümumdünya Səhiyyə Təşkilatının niyə bu mövzuda daha əvvəl heç bir açıqlama yaymadığını izah edib.
“Əgər insanlar eşitsələr ki, virus hava yolu ilə yayılır, o zaman hətta bu, sübut olunmasa belə, tibb işçiləri xəstəxanaya getməkdən imtina edəcək”, – o deyib.
Benedetta Alleqrantsi ehtimal edib ki, panika halında daha varlı ölkələr real müdafiə vasitəsi olan N95 raspirator maskaların bütün ehtiyatlarını ala bilər.
“İnkişafda olan ölkələr üçün maska qalmaya bilər”, – ÜST nümayəndəsi bildirib.
Ümumdünya Səhiyyə Təşkilatı yaxın günlərdə koronavirusun necə yayılmasına dair elmi rəy təqdim edəcək.
Əgər hava ilə yayılma nəzəriyyəsi təsdiqlənsə, təhlükəsizlik anlayışına ciddi dəyişikliklər daxil ediləcək. Məsələn, bir metrlik məsafə artıq təhlükəsiz hesab olunmayacaq.
ÜST-ün açıqladığı prinsiplərə ümid edən hökumətlər virusun yayılmasının qarşısının alınması üçün görülən tədbirləri əhəmiyyətli dərəcədə dəyişməli olacaqlar.
İyulun 8-də dünyada koronavirusa yoluxanların sayı 12 milyon nəfəri keçib. Pandemiyanın əvvəlindən dünyada 548,211 nəfər ölüb.