30 sutkalıq həbs olunmuş azərbaycanlı fəal və vicdan məhbusu işgəncələrdən şikayət edir

30 sutkalıq inzibati həbsə məhkum olunmuş NİDA hərəkatının fəalı Bayram Məmmədov istintaq təcridxanasında işgəncələrdən şikayət edib.

Məmmədov martın 30-da həbs edilib – əfv olunaraq həbsxanadan buraxıldıqdan cəmi iki həftə sonra. O, polisə tabe olmamaqda ittiham olunub və artıq bir neçə saatdan sonra inzibati həbsə məhkum olunub.

• Azərbaycanda “yeddi il müddətinə məhkum olunub” nə deməkdir

• Ermənistanda ömürlük həbs cəzasına məhkum olunmuş şəxsin həbsxanadan məktubu

Onun vəkili Elçin Sadıqov şikayət verib, apellyasiya məhkəməsi şikayəti nəzərdən keçirib və onu rədd edib. Məhkəmədə Bayram Məmmədov bildirib ki, polis əməkdaşları ona işgəncə veriblər.

Bayram Məmmədov kimdir?

2016-cı ildə fəallar Bayram Məmmədov və Qiyas İbrahimov narkotik alverində ittiham olunaraq hər biri 10 il müddətinə məhkum edilmişdilər. Bilavasitə bundan öncə onlar Azərbaycanın eks-prezidenti, hazırkı prezidentin atası Heydər Əliyevin heykəlinin postamentində hökumət əleyhinə şüar yazmışdılar. “Amnesty International” hüquq-müdafiə təşkilatı onları vicdan məhbusu kimi tanıyıb. Hər ikisi 16 mart 2019-cu il tarixində aralarında 50 siyasi məhbusun da olduğu 399 nəfərin əfv edilməsi çərçivəsində azadlığa buraxılıblar.

Həbs və işgəncələr

Bayram Məmmədovun sözlərinə görə, martın 30-da həbs edildikdən sonra onu istintaq təcridxanasında qəddarlıqla döyüblər. O, hakimə üzündəki göyümtül ləkələri göstərib və hətta onu döyənlərin adlarını çəkib – həmin adamıar da məhkəmə zalında olublar. Bu barədə məhkəmədən sonra digər keçmiş siyasi məhbus, məşhur bloger Mehman Hüseynov məlumat verib. Eyni zamanda, bloger video çəkib ki, həmin kadrlarda onun Bayrama ünvanladığı “necəsən?” sualına məhbus “pis” cavabını verir.

“Kavkazski uzel” yazır ki, hakim apellyasiya şikayətini rədd edib, lakin işgəncələrlə bağlı şikayəti qəbul edib.

Vəkil məlumat verib ki, ona müdafiə etdiyi şəxsi ziyarət etməyə icazə verilməyib və belə bəhanə gətirilib ki, orada dezinfeksiya aparılır.

Jurnalistlər və müxalifətçilər həbsdə kimin günahkar olması barədə mübahisə edirlər

Məmmədovun həbsi mətbuatla müxalifətçilər arasında qızğın mübahisəyə səbəb olub.

Həbsindən bir gün əvvəl Bayram Məmmədov “Turan” agentliyinə müsahibəsində onu və Qiyas İbrahimovu heykəli yazmağa sövq edən səbəblər haqqında danışıb.

Müsahibədən bir parça:

“- Başına nələrin gələcəyini bilsəydin yenə edərdinmi həmin hərəkəti?

– Əgər bilsəydim ki, yaşadıqlarımın bir neçə qatını yaşayacağam, hec çəkinmədən, qorxmadan yenə gözübağlı gedərdim ora, abidənin yanına. Sadəcə, bu dəfə daha artığını etməyə çalışardım”.

Məhz bu ifadəni bir çoxları yeni həbsin əsl səbəbi hesab edirlər. Onlar jurnalisti öz sualı ilə Bayramı təxribata çəkməkdə və faktiki olaraq, onun təhlükəsizliyini düşünmədən “pis vəziyyətə qoymaqda” ittiham edirlər.

Həmin mövqeyi, misal üçün, müxalif “Respublikaçı alternativ” partiyasının lideri İlqar Məmmədov da paylaşır:

“Azərbaycanda indinin bir çox jurnalisti özünü qabaqcıl demokratik ölkədə, ya da heç olmasa nisbətən azad ölkədə yaşadıqları kimi aparırlar. Onlara elə gəlir ki, rejimə qarşı çətin mübarizə aparan şəxslərə hər növdə sual verməyə mənəvi və peşəkar haqları çatır. Onların yersiz sual əvəzində qazandığı, indiki şəraitdə hər hansı bir mübariz şəxsin azadlığı hesabına ödənilmiş ola bilər”.

Elə İlqar Məmmədov da anonim həmkarlarının (müsahibədə imza yoxdur) müdafiəsinə qalxmış bəzi jurnalistlərin əsas hədəfinə çevrilib.

“Həqiqəti tapmaq sərhədləri aşmaqdan keçirsə, o sərhədlər aşılmalıdır. Siyasətçinin xətrini xoş tutmaq üçün xəbər yazılmır, müsahibə alınmır”, – özünün səhifəsində jurnalist Sevinc Vaqifqızı yazıb.

Lakin jurnalistlərin arasında İlqar Məmmədovun tərəfini tutanlar da var:

“O siyasətçi deyil, o gənc fəaldır. Qəhrəmandır, hansı ki heç kimin edə bilmədiyini etdi. Amma bizim cəmiyyət nə etdi? Bayramı vəhşilərin əlinə verdi”, – Aynur Heydərova yazıb.