18 il həbsə məhkum edilən tədqiqatçı: "Mənim qəlbim azaddır"
Talış tədqiqatçısının həbsdən müraciəti
Mayın 20-də Lənkəran Ağır Cinayətlər Məhkəməsinin 18 il müddətinə azadlıqdan məhrum etdiyi etnik tədqiqatçı və “Talış Milli Akademiyasının xəbərləri” jurnalının baş redaktoru İqbal Əbilov həbsxanadan iki dildə, həm ana dili olan Talış dilində, həm də dövlət dilində müraciət ünvanlayıb.
İqbal Əbilov Azərbaycan Cinayət Məcəlləsinin üç maddəsi – 274 (dövlətə xəyanət), 281.3 (xarici təşkilatların göstərişi ilə dövlət əleyhinə çağırışlar) və 283.1 (milli, irqi və dini nifrətin salınması) üzrə təqsirli bilinib.
Əbilov və vəkilləri irəli sürülmüş ittihamların heç birini qəbul etmir. Müdafiə tərəfi bildirir ki, məhkəmə və istintaq prosesi boyunca təqdim olunan materiallarda ittihamları təsdiq edən hər hansı əsaslı və hüquqi dəlil ortaya qoyulmayıb.
Bir nüsxəsi “JAMnews”a da göndərilən məktubun Azərbaycan dilində olan hissəsini təqdim edirik:
“Dəyərli dostlar!
Qəlbim ailəmlə, xalqımla, dostlarımla, məni dəstəkləyən hər kəslədir. Mənim qəlbim azaddır.
Buradan hər kəsə salamlarımı və minnətdarlığımı çatdırıram: geniş ürəkli valideynlərimə, yaxınlarıma, dostlarıma, bu ittihamlardan qorxmayıb, mənimlə həmfikir ola-ola və ya olmaya-olmaya məhkəmələrimə gələnlərə, müdafiəmə qalxanlara, səslərini ucaldanlara, yüksək səslə ya da ürəklərində, vicdanları önündə bu təqiblərlə razı olmayan hər kəsə təşəkkür edirəm. Xüsusi minnətdarlığımı öz mübariz və ədalətpərəst vəkillərim Fariz Namazlı və Rövşənə Rəhimovaya çatdırıram. Onlarla tanış olduğuma şadam.
Mən xoşbəxtəm və bilirəm ki, siz də mənim kimi insanların bərabərliyinə inanırsınız. Heç bir insan öz cinsiyyətinə, milliyətinə, dilinə, dininə, məzhəbinə görə heç bir hüququndan məhrum edilə bilməz.
Ötən günlərdə təcridxana dəhlizində üzü-gözü şişmiş Əhməd Məmmədlini gördüm. Burdan ona öz salamlarımı və dəstəyimi göndərirəm! Onun kimi saf, savadlı, həqiqətpərəst cavanlar dövlətin ümidi və gələcəyidirlər.
Həmişə azad və gülərüzlü olun! Elm və daxili azadlıq qulaqdan daha güclüdür!”
Talış tədqiqatçısının həbsdən müraciəti
