«Քաղաքական հաշվեհարդա՞ր»․ Հայաստանի պաշտպանության նախկին նախարարը՝ մեղադրյալ
Քրեական հետապնդում Սեյրան Օհանյանի նկատմամբ
Հայաստանի պաշտպանության նախկին նախարարը որպես մեղադրյալ կներգրավվի մի քանի քրեական գործերում։ Ազգային ժողովը փետրվարի 8-ին փակ քվեարկությամբ համաձայնություն է տվել Սեյրան Օհանյանի նկատմամբ քրեական հետապնդում հարուցելու մասին երկրի գլխավոր դատախազի երեք միջնորդություններին՝ այդ կերպ նրան զրկելով պատգամավորական անձեռնմխելիությունից։
Նախկին նախարարը, ով այժմ ընդդիմադիր «Հայաստան» խմբակցության ղեկավարն է, ավելի վաղ հանդես էր եկել տեսաուղերձով՝ գործընթացը որակելով որպես իշխող թիմի համար «ոչ հաճելի մարդկանց նկատմամբ քաղաքական հաշվեհարդար»։ Խորհրդարանական ընդդիմությունը կարծում է՝ այս կերպ իշխանությունը փորձում է ուշադրությունը շեղել Զինված ուժերում ստեղծված բարդ իրավիճակից և երկրի անվտանգային խնդիրներից։
ԱԺ քննարկման մանրամասները․ գլխավոր դատախազի ներկայացրած փաստերը, նախարարի տեսաուղերձը, ընդդիմության կարծիքը, մեկնաբանություն
Հարցը երկու օր քննարկվեց խորհրդարանում։ Գլխավոր դատախազ Աննա Վարդապետյանը Օհանյանի վերաբերյալ երեք միջնորդագիր ներկայացրեց։ Դրանցից երկուսը քննարկվել են բաց, մեկը՝ դռնփակ ռեժիմով։
Առաջին միջնորդագիրը որպես զորամաս ծառայող հողամասերի ապօրինի օտարման, երրորդը՝ ՊՆ-ին պատկանող տարածքների մասնավոր անձի փոխանցմանն են վերաբերել։ Դրա արդյունքում պետությունը կրել է ավելի քան 5 մլրդ դրամի վնաս։
Գլխավոր դատախազի երկրորդ միջնորդագրի մասին շատ բան չի հաղորդվել։ Գլխավոր դատախազը նշել է միայն, որ այն քննարկվում է փակ ռեժիմով, քանի որ պարունակում է օրենքով պաշտպանվող գաղտնիք: Ըստ մամուլում առկա տեղեկությունների՝ այն առնչվում է «անպիտան հրթիռներ» անունով հայտնի գործին, որի հիմնական մեղադրյալը նախկին պաշտպանության նախարար Դավիթ Տոնոյանն է։
Զորամասերի տարածքի ապօրինի վաճառքի մասին
Գլխավոր դատախազ Աննա Վարդապետյանի խոսքով՝ նախաձեռնված քրեական վարույթով տվյալներ են ձեռք բերվել այն մասին, որ Արարատի մարզի Արմաշ համայնքի ղեկավարի 2005 թվականի երկու որոշումներով անհատույց (մշտական) օգտագործման իրավունքով պաշտպանության նախարարությանն են տրամադրվել 1,2 հա մակերեսով և 0,9 հա մակերեսով «հատուկ նշանակության» հողամասեր: Դրանք ունեցել են զորամասի կարգավիճակ։
Դատախազության հաղորդագրությունից տեղեկանում ենք, որ նախարարի կողմից լիազորված անձը ՊՆ անունից առքուվաճառքի պայմանագիր է կնքել՝ փաստացի զորամասերից մեկի հողն ու շինությունները վաճառելով Գրիգորի Խաչատուրովին (ՀՀ ԳՇ նախկին պետ Յուրի Խաչատուրովի որդին է): Սեփականությունը, սակայն, գրանցվել է Խաչատուրովի հետ փոխկապակցված Էդգար Արշակյանի անվամբ, այդ կերպ խեղաթյուրվել է գույքի իրական պատկանելիությունը: Բացի այդ՝ այն վաճառվել է կադաստրային արժեքից անհամեմատ էժան գնով։
Գրիգորի Խաչատուրովը, ըստ աղբյուրի, երկու անգամ գրավադրել է անշարժ գույքը՝ այդ կերպ օրինականացնելով նշված գումարի հանցավոր ծագումն ու ստանալով առանձնապես խոշոր չափերի գումար։
Գրեթե նույն սցենարով օտարվել է նաև երկրորդ անշարժ գույքը, որը նույնպես ուներ զորամասի կարգավիճակ։ Այս դեպքում ևս հողամասը վաճառվել է անհամեմատ էժան գնով։
Ըստ դատախազության հաղորդագրության, երկու դեպքում էլ ՊՆ նախկին նախարար Սեյրան Օհանյանը խախտել է Հողային օրենսգրքի պահանջները, որոնց համաձայն՝ արգելվում է քաղաքացիներին և իրավաբանական անձանց սեփականության իրավունքով փոխանցել պետական և համայնքային սեփականություն հանդիսացող հատուկ նշանակության հողեր։ Բացի այդ, արգելվում է նաև օտարել պետական և համայնքային uեփականություն հանդիuացող այն շենքերը կամ շինությունները, որոնք կառուցված են նշված հողերում:
Սեյրան Օհանյանին է մեղսագրվում Քրեական օրենսգրքով սահմանված հանցավոր արարքների կատարումը, մասնավորապես՝
- oգտագործելով պաշտոնեական դիրքը՝ առանձնապես խոշոր չափերով վատնում կատարելը,
- անձնական այլ շահագրգռվածությունից և խմբային շահերից ելնելով, իր պաշտոնեական դիրքը ծառայության շահերին հակառակ օգտագործելը, որն անզգուշությամբ առաջացրել է ծանր հետևանքներ։
Գլխավոր դատախազի խոսքով՝ Օհանյանի կողմից այս հանցավոր արարքների կատարումը հաստատվել է նախաքննությամբ ձեռքբերված մի շարք փաստական տվյալներով, այդ թվում՝ Կադաստրի կոմիտեից առգրավված գործերի զննությամբ և նոտարական գործերում առկա փաստաթղթերի զննության մասին արձանագրությամբ։
Նախկին նախարարը հրաժարվել է ցուցմունք տալ հիշյալ հողատարածքներն օտարելու վերաբերյալ, դիրքորոշում չի հայտնել նաև վաղեմության ժամկետներն անցնելու հիմքով իր նկատմամբ քրեական հետապնդում չիրականացնելու մասին։
«Եթե Օհանյանը դիմեր դատախազություն` վաղեմության ժամկետներն անցնելու հիմքով իր նկատմամբ քրեական հետապնդում չիրականացնելու վերաբերյալ միջնորդությամբ, ապա այդ հիմքով իր նկատմամբ քրեական հետապնդում չէր հարուցվի։ Այս դեպքում Քրեական դատավարության օրենսգրքի իմպերատիվ պահանջն է, որ քրեական վարույթը պետք է շարունակվի ընդհանուր կարգով»,- շեշտել է Հայաստանի գլխավոր դատախազը։
Օհանյանը նիստերի դահլիճում չէր
Ազգային ժողովի կանոնակարգի համաձայն՝ ելույթի իրավունք ուներ նաև Սեյրան Օհանյանը։ Նա, սակայն, դահլիճում չէր։ Խմբակցությունից լրագրողներին հաղորդել էին, որ նա առողջական խնդիրներ ունի, այդ պատճառով չի մասնակցում քննարկումներին։
ԱԺ ընդդիմությունը բոյկոտել էր նիստը՝ այն անվանելով «իշխանությունների կազմակերպած ներկայացում»։
Քվեարկությանը մասնակցեցին միայն իշխող ուժի պատգամավորները։ Եվ քանի որ նրանց ձայները բավարար էին որոշում կայացնելու համար, միջնորդությունն ընդունվեց։
Գլխավոր դատախազը միջնորդություն է ներկայացրել նաև «Հայաստան» խմբակցության պատգամավորներից Արմեն Չարչյանի նկատմամբ քրեական հետապնդում հարուցելու վերաբերյալ։ Քվեարկությունը կայանալու է վաղը։ ԱԺ համաձայնության պարագայում նա որպես մեղադրյալ ներգրավվելու է Արթուր Սարգսյանի մահվան հանգամանքներին առնչվող գործում։ Սարգսյանը հանրության շրջանում առավել հայտնի է որպես «Հաց բերող»։ 2016 թ․-ին՝ ՊՊԾ գնդի գրավումից հետո նա իր մեքենայով հաց էր հասցրել գունդը գրաված անձանց, ովքեր գտնվում էին ոստիկանության շրջափակման մեջ։
«Փորձում են շեղել հասարակության ուշադրությունը». ընդդիմություն
Ազգային ժողովի ընդդիմադիր «Հայաստան» խմբակցության պատգամավոր Գեղամ Մանուկյանը Օհանյանի և Չարչյանի դեմ գործերը քաղաքական է համարում։ Հիշեցնում է՝ դրանց մեկնարկ է տրվել դեռևս 2019 թ․-ին և հավելում՝ նախաքննությունը կարող էր ավարտված լինել նախքան նրանց պատգամավոր դառնալը։ Կարծում է՝ պատահական չէ, որ միջնորդություններն օրակարգ բերվեցին հենց Ազատ գյուղում զորամասի կացարանի հրդեհից հետո, որի արդյունքում զոհվեց 15 զինծառայող։
«Այդ իսկ պատճառով, շատ ակնառու է, որ սա շոուի մի մասն է՝ հասարակության ուշադրությունը շեղելու»,- «Ազատության» եթերում հայտարարել է Մանուկյանը։
Այս կարծիքը կիսում է նաև ընդդիմադիր պատգամավոր Տիգրան Աբրահամյանը։ Ասում է՝ իշխանությունը փորձում է շեղել Զինվաժ ուժերում տեղի ունեցող ողբերգություններից, ԶՈւ-ի ձախողման պատճառով երկրի ինքնիշխան տարածքի կորուստներից․
«Բավական թույլ «փաստարկներով», իրավական խոցելի հիմքերով փորձում են ԶՈւ–ում առկա իրավիճակը պայմանավորել վերջին 2-3 տասնյամյակների գործընթացներով»,– լրագրողների հետ զրույցում նշել է պատգամավորը։
Աբրահամյանի դիտարկմամբ՝ այն իշխանությունը, որը նախորդ տարի պաշտպանության նախարարության բալանսից 71 ռազմական օբյեկտներ աճուրդի է հանել, այսօր 1 զորամասի վաճառքը ներկայացնում է որպես լուրջ վնաս։
«Բանակը քանդողներն ինձ չեն կարող մեղադրել». Օհանյանի ուղերձը
Սեյրան Օհանյանի կարծիքով՝ իրավապահներն իրեն թիրախավորել են մարդկանց ուշադրությունը բանակի կազմաքանդումից շեղելու նպատակով։ «Հայաստան» խմբակցության ղեկավարը տեսաուղերձում հիշատակել է Ազատ գյուղում տեղի ունեցած հրդեհն ու նշել, որ իր և Չարչյանի նկատմամբ հարուցված գործերը «վաղուց էին կարվել, սակայն միջնորդությունը հիմա են ներկայացրել, որպեսզի Վարդենիսում այրված տղաների ձայները խլացնեն»։
«Որոշել են աղմուկ բարձրացնել, որ իրենց աղաղակող հանցագործությունները խլացնեն: Շինծու և անհիմն քրեական գործեր են հարուցել իմ դեմ»,- հայտարարել է նախկին նախարարը։
Նրա բնորոշմամբ՝ դատախազությունը ոչ թե քրեական գործի շրջանակներում միջնորդություն է ներկայացրել, այլ անմեղության կանխավարկածի խախտմամբ մեղադրական եզրակացություն, ինչն, ըստ Օհանյանի, ապօրինություն է։
Նա շեշտել է՝ պատգամավորական մանդատն իր կյանքի «բարձրագույն տիտղոսը կամ գերնպատակը չի եղել», հիշեցրել, որ «ինքը հաղթանակած բանակի գեներալ է, ու բանակը քանդողները չեն կարող իրեն որևէ բանում մեղադրել»։
Փորձագիտական կարծիք
Քաղաքագետ Արմեն Հովհաննիսյանի բնորոշմամբ՝ սկսված գործընթացը «վրեժ» է «Ադրբեջանի կողմից Լաչինի միջանցքը փակելու հարցի վերաբերյալ» խորագրով կազմակերպված խորհրդարանական լսումների համար։ «Մեդիալաբի» հետ զրույցում նա նշել է, որ կարիք կա, որ քաղտեխնոլոգները կառավարությանը խորհուրդ տան այլ մեթոդներ։ Նրա դիտարկմամբ՝ մշտապես նախկին-ներկա մեթոդին դիմելու պարագայում ժամանակը չի կարող իշխանության օգտին աշխատել։
«Իշխանության այս մեթոդը նրա համար է, որ նախկինների ֆոնի վրա ավելի լավը երևան, քան կան։ Կարող են Սեյրան Օհանյանի անուն, ազգանունն էլ ձեռքից խլել, բայց հետո՞, իրենք ինչո՞ւ են վատ կառավարում այս երկիրը, որը վստահվել է իրենց երկրորդ անգամ։ Այս հարցի պատասխանը թող տան, հետո նոր ձերբակալեն մարդկանց»,- նշել է նա։
Կարծում է՝ այս ամենի փոխարեն իշխող թիմը պետք է զբաղվի բարեփոխումներով, արտաքին քաղաքական կարևորագույն որոշումներ կայացնելով, այլ ոչ թե միայն խոստումներ տալով։ Հովհաննիսյանի խոսքով՝ նախկինում արված սխալներն ուղղելուց բացի պետք է պատասխանատվություն ստանձնել սեփական քայլերի համար և ստեղծել ապագա իշխանության պլատֆորմ։
Քաղաքագետի գնահատմամբ՝ Հայաստանի ներկայիս խորհրդարանում պետականամետ խմբակցություն չկա։
«Բոլորը ռուսական գործակալների հավաքածու են, ու հիմա ուզում են ասել, որ երկիրը վատ վիճակում է, որովհետև նախկին ռուսական գործակալներն ավելի վատն էին, քան այսօրվանները․ լավ ինչքա՞ն կարելի է հուսալ, որ մարդիկ դրան հավատում են»,- ամփոփել է Հովհաննիսյանը։
Հետևեք մեզ — Facebook | Youtube | Telegram
Քրեական հետապնդում Սեյրան Օհանյանի նկատմամբ
