«Քարոզչություն և ապատեղեկատվություն». ԱՄՆ պետքարտուղար Բլինքենը սադրե՞լ է աբխազներին
Պետքարտուղար Բլինքենն ու վրաց-աբխազական հակամարտությունը
2008 թվականին Վրաստանի և Ռուսաստանի միջև Հարավային Օսիայի շուրջ «օգոստոսյան» պատերազմի 14-րդ տարելիցի հետ կապված ԱՄՆ պետքարտուղար Էնթոնի Բլինքենի հայտարարություններն Աբխազիայում անվանել են «քարոզչություն, որը կարող է հանգեցնել էսկալացիայի»:
«2008 թվականից մենք հիշում ենք ռուսական զորքերի կողմից սպանվածներին և վիրավորներին։ Տասնամյակներ շարունակ Վրաստանի քաղաքացիները Աբխազիայում և Հարավային Օսիայում ապրել են ռուսական օկուպացիայի տակ, տասնյակ հազարավոր մարդկանց տեղահանել են, հետապնդել և ունեզրկել: Նրանց կյանքն ու ապրուստը խլել են»,— հայտարարել է Բլինքենը տարելիցի օրը՝ օգոստոսի 8-ին:
Նա ընդգծել է, որ «այս տարի Ռուսաստանի չհրահրված ներխուժումն Ուկրաինա ցույց է տալիս Վրաստանի և Ուկրաինայի ժողովուրդների համար համերաշխության կարևորությունը»։
«Վրաստանի ժողովուրդը շատ լավ ծանոթ է Ռուսաստանի ագրեսիվ գործողություններին։ Սա ներառում է ապատեղեկատվությունը, այսպես կոչված՝ «սահմանագծումը», և մարդկանց բռնի զանգվածային արտագաղթը։ Այս ամենը հանգեցրել է անհաշվելի դժվարությունների ու ավերածությունների»:
«Սա ապատեղեկատվություն է»,- հայտարարում են հայտնի աբխազ կոնֆլիկտաբանները
«Ցավոք, հենց պետքարտուղար Բլինքենի և նրա հետ համերաշխ մեկնաբանների հայտարարությունը, ըստ էության, ապատեղեկատվության աղբյուր է», — ասում է աբխազ քաղաքագետ Լիանա Կվարչելիան:
«Վրաց-աբխազական և վրաց-օսական հակամարտությունները երկար պատմություն ունեն։
Դրանք սկսվել են 2008 թվականից շատ առաջ, երբ Վրաստանը նախագահ Սահակաշվիլիի գլխավորությամբ փորձեց ռևանշի գնալ և փոխել ստատուս քվոն։ Իսկ այն ձևավորվել է հենց Վրաստանի կողմից սանձազերծված մի քանի պատերազմներից հետո:
Վրաց-աբխազական հակամարտության դեպքում պետք է վերադառնալ առնվազն 1992 թվական: Հենց այդ ժամանակ էլ, ինչպես պարոն Բլինքենն է նշում, տեղի ունեցավ վրացական զորքերի չհրահրված ներխուժումը Աբխազիա:
Ցավոք, ուկրաինական իրադարձություններն արևմտյան և ուկրաինացի քաղաքական գործիչների կողմից օգտագործվում են հետխորհրդային տարածքում սառեցված հակամարտությունները բորբոքելու համար։
Մենք բազմիցս լսել ենք ուկրաինացի և եվրոպացի որոշ քաղաքական գործիչների կողմից երկրորդ ճակատ բացելու կոչեր։ Փաստորեն, Բլինքենը նույն բանն է անում, միայն թե այլ խոսքերով:
ԱՄՆ պետքարտուղարը փաստացի կոչ է անում փոխել ստատուս-քվոն վրաց-աբխազական համատեքստում։
Շատ ցավալի է, որ տարբերություն է դրվում պետությունների և ժողովուրդների միջև՝ մեկի կյանքը կարևոր է, մյուսինը՝ ոչ: Ի վերջո, պետքարտուղար Բլինքենը չի կարող չհասկանալ, որ ստատուս քվոն փոխելու փորձերը կբերեն ռազմական գործողությունների վերսկսման։
Ցավոք, այսօր աշխարհը առաջնորդվում է այն կեղծ պնդումով, որ Վրաստանը հակամարտություն չունի Աբխազիայի հետ, և խոսք պետք է գնա միայն Ռուսաստանի և Վրաստանի միջև կոնֆլիկտի մասին: Այս կեղծ մոտեցումը կարծես երկրորդ կյանք է ստացել՝ կապված ուկրաինական իրադարձությունների հետ»։
Աբխազ քաղաքագետ Աստամուր Թանիան Էնթոնի Բլինքենի հայտարարություններն անվանել է «սովորական քարոզչություն»։
«ԱՄՆ պետքարտուղարի հայտարարությունը, ինչպես նաև վրացական իշխանությունների ներկայացուցիչների հայտարարությունները սկզբունքորեն նոր բան չեն պարունակում։ Եվ համապատասխանաբար, դրանք չեն նպաստում վրաց-աբխազական հակամարտության կարգավորմանը։
Այս տեսակի քարոզչությունը ցույց է տալիս, որ Աբխազիայի ղեկավարությունը, քաղաքական գործիչները, փորձագետները և ամբողջ հասարակությունը պետք է ավելի ակտիվորեն աշխարհի տեղեկատվական տարածք ներմուծեն վրաց-աբխազական հակամարտության առաջացման և զարգացման իրական պատկերը:
Այս հակամարտությունը 15 տարվա վաղեմության չէ, ինչպես հիմա փորձում են ներկայացնել։ Եվ դա կապված է աբխազ ժողովրդի ինքնապահպանման և իր իրավունքների համար մղվող երկարամյա պայքարի հետ։ Հակամարտությունը կապված է նաև Վրաստանի փորձերի հետ՝ տապալելու այդ ձգտումները, այդ թվում՝ ռազմական ուժի և պատժամիջոցների միջոցով։
Պատմությունը քարոզչությամբ փոխարինելը չի հանգեցնում ժողովուրդների միջև նորմալ, բարիդրացիական հարաբերությունների հաստատմանը։ Հուսանք՝ քաղաքական գործիչները դա կգիտակցեն որքան հնարավոր է շուտ»։
Հրապարակման տերմինները, տեղանունները, կարծիքներն ու գաղափարները պարտադիր չէ, որ արտացոլեն JAMnews-ի կամ նրա առանձին աշխատակիցների կարծիքներն ու գաղափարները։ JAMnews-ն իրեն իրավունք է վերապահում հեռացնել հրապարակումների այն մեկնաբանությունները, որոնք կհամարվեն վիրավորական, սպառնալից, բռնություն հրահրող կամ էթիկապես անընդունելի այլ պատճառներով:
Պետքարտուղար Բլինքենն ու վրաց-աբխազական հակամարտությունը
