Ի՞նչ կփոխվի Վրաստանի քաղաքացիների համար 2023 թվականից
Փոփոխություններ Վրաստանի քաղաքացիների համար
Թոշակառուներ
● Հունվարի 1-ից Վրաստանում կբարձրանա տարիքային կենսաթոշակը։ Հավելավճարը կկազմի 20-25 լարի [մոտ 7-9 դոլար]։ Այսպիսով, մինչև 70 տարեկան թոշակառուների կենսաթոշակը կբարձրանա մինչև 300 լարի [մոտ 100 դոլար], իսկ 70 տարեկանից բարձրներինը՝ մինչև 365 լարի [մոտ 135 դոլար]։ Լեռնային շրջաններում ապրող թոշակառուները կստանան համապատասխանաբար 355 և 440 լարի [131 և 162 դոլար]։
● Հունվարի 1-ից «Liberty» բանկում կենսաթոշակային վարկերի վերին շեմը կկազմի 26 տոկոս՝ 36 տոկոսի փոխարեն։
Պետական ծառայողների աշխատավարձ
● Հունվարի 1-ից պետական ծառայողների աշխատավարձերը կբարձրանան 10 տոկոսով, իսկ իրավապահ մարմինների աշխատակիցներինն ու զինվորականներինը՝ 20 տոկոսով։
Բժշկական անձնակազմի աշխատավարձեր ու այլ բժշկական նորություններ
● 2023 թվականի հունվարի 1-ից կսահմանվի բժիշկների և միջին բուժանձնակազմի նվազագույն ժամավճարը։ Բժիշկների նվազագույն աշխատավարձը ժամում 7 լարի է [մոտ 2,5 դոլար] (այսինքն ամսական առնվազն 1260 լարի է [մոտ 467 դոլար), իսկ բուժքույրերինը՝ ժամում 4,4 լարի [մոտ 1,60 դոլար] (ամսական առնվազն 792 լարի [մոտ 293 դոլար]): Նոր կանոնակարգի համաձայն՝ աշխատավարձերի բարձրացումը կվերաբերի մինչև 9000 բժիշկների և ավելի քան 8000 բուժքույրերի։
● Ուժի մեջ է մտել օրենք, որն արգելում է դեղատներին դեղերը վաճառել սահմանվածից բարձր գնով։ Մասնավորապես, ուժի մեջ են մտնում դեղորայքի տեղեկանքային գները, որոնք սահմանում են առավելագույն վերին շեմը, որից ավելի բարձր գնով ապրանքների իրացումը առաջացնում է օրենքով սահմանված պատասխանատվություն։
● 2023 թվականի սեպտեմբերի 1-ից վերակենդանացման ծառայությունների մատուցման համար անհրաժեշտ կլինի համապատասխանել նոր թույլտվության պայմաններին։ Ակնկալվում է, որ այս փոփոխությունը կտրուկ կբարձրացնի վերակենդանացման ծառայությունների չափանիշներն ու որակը:
Բնակչության սոցիալապես անապահով խմբեր ու երեխաներ
● Ծանր հաշմանդամության խումբ ունեցող անձանց սոցիալական աջակցությունն ավելացվել է 65 լարիով [մոտ 24 դոլար]: Մյուս կատեգորիայի հաշմանդամություն ունեցողների համար վճարը բարձրացվել է 35 լարիով [մոտ 13 դոլար]։
● 2023 թվականի հուլիսից սոցիալապես անապահով երեխաներին տրամադրվող ֆինանսական աջակցության չափը կավելանա 50 լարիով [մոտ 18 դոլար] և կկազմի մեկ երեխայի համար մինչև 200 լարի [մոտ 74 դոլար]։
Հղիության և ծննդաբերության (մայրության) արձակուրդ
● Փոփոխությունները վերաբերում են նաև հղիության և ծննդաբերության արձակուրդին։ Մասնավոր հատվածի աշխատողների համար սահմանված աջակցության չափը կկրկնապատկվի և 1000 լարիի փոխարեն կկազմի 2000 լարի [740 դոլար՝ 370 դոլարի փոխարեն] (նախկինում այս գումարը ստանում էին պետական հատվածի աշխատողները)։ Դպրոցների ուսուցիչները մայրության արձակուրդի ընթացքում կստանան նաև իրենց աշխատավարձը՝ ամբողջական չափով:
● 2023 թվականից սկսած յուրաքանչյուր երրորդ և հաջորդ նորածիններին կտրամադրվի 1000 լարիի [մոտ 370 դոլար] միանվագ օգնություն:
Ավտոմոբիլային տրանսպորտի վարորդներ
● Հունվարի 1-ից 65 լարիով [մոտ 23 դոլար] կբարձրանա ավտոմեքենայի գրանցման վկայականի տրամադրման արժեքը, 45 լարիով էլ կավելանա պետհամարանիշի ձեռքբերման արժեքը։ Ըստ այդմ՝ տրանսպորտային միջոցի գրանցումը կարժենա 100 լարի՝ 35 լարիի փոխարեն [մոտ 37 դոլար՝ 13 դոլարի փոխարեն], համարանիշի թողարկումը՝ 80 լարի՝ 35 լարիի փոխարեն [մոտ 30 դոլար՝ 13 դոլարի փոխարեն]։
● 2023 թվականի սեպտեմբերի 1-ից վարորդական իրավունք ձեռք բերել ցանկացողները պարտավոր են իմանալ տրանսպորտային միջոցի տեխնիկական վիճակի մասին։ Գործնական թեստին ավելանալու են մեքենայի տեխնիկական բնութագրերի վերաբերյալ հարցեր։ Վարորդի թեկնածուն պետք է հարցերին պատասխանի տեսողականորեն՝ օգտագործելով համապատասխան գործիքը կամ բանավոր:
● 2023 թվականի հունվարի 1-ից պարբերական տեխզննումների ժամանակ կստուգվի նաև տրանսպորտային միջոցների աղմուկը։ Մեքենայի արձակած աղմուկը չպետք է գերազանցի օրենքով թույլատրված դեցիբելը:
● 2023 թվականի հունվարի 1-ից կխստացվեն տրանսպորտային միջոցների արտանետումների ստանդարտները։ Մասնավորապես, բենզինով աշխատող մեքենաների արտանետումների ստանդարտը (CO) 0,6 տոկոսից իջեցվել է 0,55 տոկոսի։ Փոփոխությունը վերաբերում է բենզինով աշխատող մեքենաներին, որոնք հանրապետությունում գրանցված են եղել մինչև 2020 թվականի ապրիլի 1-ը։
Զենքի կրում
● Մարդաշատ վայրերում և հասարակական տրանսպորտում զենք կրելու համար տուգանքը 200-ից հասցվել է 500 լարիի [մոտ 182 դոլար]։ Տուգանքին կհաջորդի զենքի առգրավումը։
Աշխատանքի անվտանգություն
● 2023 թվականի հունվարի 1-ից պարտադիր կդառնա աշխատանքի վայրերում անվտանգության և առողջության հետ կապված նշանների առկայությունը։
Ալկոհոլ
● 2023 թվականի հունվարի 1-ից ներքին շուկայում վաճառքի համար նախատեսված ալկոհոլային արտադրանքը ենթակա է պարտադիր սերտիֆիկացման։
Սննդամթերքի անվտանգություն
● Սննդի արդյունաբերության բոլոր օպերատորները պարտավոր են մինչև 2023 թվականի հունիսի 1-ը ներդնել ռիսկերի և կրիտիկական վերահսկման կետերի (HACCP) վերլուծության համակարգ: Նշված համակարգը Եվրամիության հետ կնքած Խորը և համապարփակ ազատ առևտրի գոտու համաձայնագրի (DCFTA) մաս է կազմում և 2015 թվականից աստիճանաբար ներդրվում է Վրաստանում։
Վառելիք
● 2023 թվականի հունվարի 1-ից այլևս չի գործի 2020 թվականին Վրաստանի կողմից հայտարարված մորատորիումը Եվրո-5 դասի դիզվառելիքի ներկրման վերաբերյալ։ Սա նշանակում է, որ 2023 թվականից այս դասի դիզելային վառելիքը Վրաստան կմատակարարվի Ադրբեջանից։
Փոփոխություններ Վրաստանի քաղաքացիների համար
