Տեղահանված արցախցիները ևս 2 ամիս դրամական օգնություն կստանան
Եվս 2 ամիս Հայաստանի կառավարությունը դրամական օգնություն կտրամադրի Արցախում բնակելի անշարժ գույք կորցրած կամ տեղահանված քաղաքացիներին:
Կառավարության հունվարի 27-ի նիստում գործադիրը հավանության է արժանացրել աշխատանքի և սոցիալական հարցերի նախարարության ներկայացրած որոշման նախագիծը:
- Պետության հաշվին բուժում և դրամական նպաստներ Հայաստանում՝ արցախյան պատերազմի վիրավորներին
- «Պետք է կենտրոնացնենք ուժերն Արցախում բնականոն կյանքը վերականգնելու համար»․ Հայաստանի վարչապետ
- «Արցախը վերակենդանացման բաժանմունքից տեղափոխվում է ինտենսիվ թերապիայի բաժանմունք»․ ԱԳ նախարար
Ղարաբաղյան երկրորդ պատերազմի հետևանքով տեղահանված ու Հայաստանում բնակություն հաստատած արցախցիներից շատերը դեռ չեն լուծել իրենց զբաղվածության խնդիրը, հետևաբար՝ նաև բնակարանային ու ֆինանսական միջոց պահանջող մյուս խնդիրները:
Սա է պատճառը, որ գերատեսչությունը որոշել է վերանայել ծրագրի ժամկետն ու երկարաձգել դրամական օգնության տրամադրումը: Հունվար և փետրվար ամիսներին ևս ՀՀ կառավարությունը կաջակցի արցախցիներին:
Արցախից տեղահանված ընտանիքներին ՀՀ բյուջեից դրամական օգնություն է տրամադրվում՝ սկսած 2020 թ.-ի նոյեմբերից: Թեև որոշման ժամկետը 4 ամիս էր, բայց ելնելով քաղաքացիների կարիքներից՝ այն պարբերաբար երկարաձգվում է:
Ըստ նախագծի հիմնավորման՝ միջոցառման շահառուների թիվը 42 հազարից ավելի է:
«Հաշվի առնելով, որ շահառուները գտնվում են սոցիալական անբարենպաստ վիճակում և հատկապես ձմեռային ամիսների ընթացքում կատարում են ավելի շատ ծախսեր՝ կապված կոմունալ վճարումների հետ, նպատակահարմար է երկարաձգել տրամադրվող աջակցության ժամկետները ևս 2 ամսով», — ասված է նախագծի հիմնավորման մեջ:
Արցախից տեղահանված երեխաներին, ինչպես նաև 1-ին կամ 2-րդ խմբի հաշմանդամություն ունեցող անձանց տրամադրվելու է ամսական 40 000 դրամ, մյուս բոլոր խմբերին` 20 000 դրամ:
Դրամական օգնությունը նշանակելու և վճարելու է նախարարության Միասնական սոցիալական ծառայությունը անկանխիկ եղանակով:
Նախարարությունը տեղեկացնում է, որ ծրագրից օգտվելու համար նոր դիմում ներկայացնելու կարիք չկա․ շահառուներին նախկինում էլ աջակցել են, նրանց տվյալներն ունեն:
Նոր որոշման ընդունման արդյունքում 2022 թ. պետական բյուջեի՝ հունվար–փետրվար ամիսների համար նախատեսված ծախսերն ավելանալու են 2 241 720 մլրդ դրամով։