Հայաստանի 9 համայնքներ ճանաչվել են աղետի գոտի
Տավուշի և Լոռու մարզի համայնքները՝ աղետի գոտի
Հայաստանի կառավարությունը Լոռու մարզի վեց և Տավուշի մարզի երեք համայնքներ աղետի գոտի է ճանաչել, խոսքը ընդհանուր առմամբ 39 բնակավայրի մասին է: Աղետի գոտի հռչակված համայնքներում ընդգրկված են այն բոլոր բնակավայրերը, որոնք տուժել են Դեբետ և Աղստև գետերի վարարումների հետևանքով:
Պատասխանատու գերատեսչությունները դեռևս գույքագրում են այն վնասները, որոնք տեղի բնակիչները կրել են ջրհեղեղի հետևանքով։ Տարածքային կառավարման և ենթակառուցվածքների նախարար Գնել Սանոսյանը հայտնել է, որ հրատապ խնդիրների լուծման համար հատյկացվել է 300 միլիոն դրամ:
«Գումարները պարբերաբար կավելացվեն, իսկ ընդհանուր ծախսերի մասին դեռ վաղ է խոսել։ Խոսքը միլիարդավոր դրամների մասին է»,- մանրամասնել է Սանոսյանը։
Մայիսի 26-ին հորդառատ անձրևները հեղեղումներ էին առաջացել Տավուշի և Լոռու մարզերի մի շարք համայնքներում: Փրկարար ծառայությունը տարբեր հատվածներից դուրս էր բերել 429 քաղաքացիների, որոնք տեղակայվել են իրենց հարազատների բնակարաններում կամ հյուրանոցներում:
Զոհվել է 4 մարդ, փլուզվել են ճանապահներ, կամուրջներ, տներ, տեղի բնակիչները հսկայական նյութական կորուստներ ունեն:
Մինչ այս պահը հաղորդված բոլոր տեղեկություններն՝ ամփոփ
Կան փակ ճանապարհներ
«Ճանապարհային դեպարտամենտ» հիմնադրամի փոխանցմամբ՝ փակ է Վանաձոր-Ալավերդի — Այրում-Բագրատաշեն ավտոճանապարհը:
Փրկարար ծառայությունը վարորդներին խորհուրդ է տալիս դեպի Վրաստանի սահման ուղևորվելիս Մ-6 միջպետական ճանապարհը շրջանցել Մ-3՝ Մարգարա-Վանաձոր-Տաշիր-ՀՀ սահման և Մ-1՝ Երևան-Գյումրի-ՀՀ սահման միջպետական ավտոճանապարհներով։
Նշվում է, որ Մ-4՝ Երևան-Սևան-Իջևան-ՀՀ սահման ավտոճանապարհի Դիլիջանից մինչև Իջևան հատվածը երթևեկելի է։ Որոշ հատվածներում, սակայն, երթևեկությունը միակողմանի է։
Բեռնատարների համար փակ է Դիլիջան-Իջևան հատվածը։ Գործում է շրջանցիկ Սևան-Ճամբարակ-Իջևան ավտոճանապարհը։
Մի քանի բնակավայրեր շրջափակման մեջ են
Խորհրդարանի իշխող «Քաղաքացիական պայմանագիր» խմբակցության պատգամավոր Արեն Մկրտչյանի փոխանցմամբ՝ Ախթալայի կամրջի փլուզման հետևանքով Ախթալա, Շամլուղ, Մեծ Այրում, Ճոճկան, Փոքր Այրում, Բենդիկ, Քարկոփ բնակավայրերի հետ կապը կտրված է: Խոսքը շուրջ 5500 բնակչի մասին է:
«Արագ տեմպերով անցկացվում է Ալավերդի-Մադան-Շամլուղ` 7 կմ գրունտային ճանապարհը` բնակավայրի հետ կապը վերականգնելու նպատակով (թե հիմնական, թե այլընտրանքային կամուրջները փլուզված են)»,- ավելի ուշ իր ֆեյսբուքյան էջում գրել է պատգամավորը:
Մկրտչյանի խոսքով՝ ծանր տեխնիկան աշխատում է նաև գիշերային ժամերին, իսկ սննդի խնդիր շրջափակված բնակավայրերը չունեն: Դա ապահովվում է ամենագնաց մեքենաներով, բեռնատարներով:
Իշխող թիմի պատգամավորը հայտնել է, որ շրջափակման մեջ հայտնված մյուս 5 բնակավայրերի՝ Շնողի, Թեղուտի, Նեղոցի, Հաղպատի և Ծաղկաշատի հետ (5200 բնակիչ) կապը վերականգնված է: Ալավերդի համայնքի այս բնակավայրերը շրջափակման մեջ էին հայտնվել Մ6 միջպետական ճանապարհի փլուզման արդյունքում։
Ավերածությունների մասին
Լոռու և Տավուշի մարզերում արտակարգ իրավիճակի կառավարման համար ստեղծվել է օպերատիվ շտաբ: Տարածքային կառավարման և ենթակառուցվածքների նախարար Գնել Սանոսյանը ղեկավարում է շտաբի աշխատանքները։ Հեռավար նիստի ընթացքում նա վարչապետ Փաշինյանին է ներկայացրել նախնական տվյալներ աղետի գոտու ավերածությունների մասին․
- ավերածություններն էական են հինգ գոտիներում՝ Ալավերդի, Տաշիր, Ալավերդուց դեպի Այրում հատված, Այրումից դեպի Բագրատաշեն հատված և Դիլիջանից դեպի Իջևան հատված;
- լուրջ վնասներ է կրել Հարավկովկասյան երկաթուղին, ժամանակավորապես դադարեցվել է Հայաստան-Վրաստան երկաթուղային կապը;
- շատ լուրջ վնասներ է կրել Մ6 միջպետական ճանապարհը, մոտ 8-9 հատվածներում ճանապարհն ամբողջությամբ կամ մասնակի քանդվել է, լուրջ վնասներ են պատճառվել Մ4 միջպետական ճանապարհի հինգ հատվածների;
- վնասվել են նաև 17 կամուրջներ, ջրագծեր, էլեկտրահաղորդման գծեր, գազատարներ և այլ ենթակառուցվածքներ;
- Լոռու և Տավուշի մարզի մի շարք բնակավայրեր հոսանքազրկվել են, մոտ 3500 բնակիչ դեռևս զրկված է էլեկտրաէներգիայից, մի շարք հատվածներում կան նաև գազամատակարարման հետ կապված խնդիրներ;
- փլուզվել են տներ և այլ օբյեկտներ:
Ի՞նչ աշխատանքներ են իրականացվում աղետի գոտում
Նախարար Գնել Սանոսյանն ասում է՝ իրականացվում են երկաթգծի, ճանապարհների, կամուրջների, էլեկտրահաղորդման գծերի, գազատարների վերականգնման, ինչպես նաև վնասների գույքագրման, բնակիչներին սննդի մատակարարման աշխատանքներ։
«Այրում կայարանում մասնագետների հետ քննարկում ենք կայարանի կամուրջը ժամանակավորապես թեթև մարդատար մեքենաների համար շահագործելի դարձնելու հնարավորությունը»,- նշել է նա:
Սանոսյանի խոսքով՝ մայիսի 28-ին Դեբետ գետում ջրի մակարդակը ևս 35 սանտիմետրով նվազել է, ինչը հեշտացնում է մի շարք աշխատանքների կազմակերպումը։
«Նոր վարարումներ չեն կանխատեսվում»
«Հիդրոօդերևութաբանության և մոնիթորինգի կենտրոն»-ի տնօրենի տեղակալ Գագիկ Սուրենյանի փոխանցմամբ՝ առաջիկա օրերին հորդառատ տեղումներ ու գետերում վարարումներ չեն կանխատեսվում։ Ասում է՝ տեղումնառատ ցիկլոնն արդեն սկսել է թուլանալ, Լոռու և Տավուշի մարզերում տեղումները թուլացել են 4-5 անգամ:
«Առաջիկա 5 օրերին մենք ակտիվ ցիկլոնային գործունեություն չենք սպասում, կլինեն ներզանգվածային տեղումներ, սակայն դրանք առանձնապես չեն ազդի գետերի հոսքի վրա։ Գետերում վարարումների հավանականություն չկա»,- նկատել է նա:
«Արմենպրես»-ի հետ զրույցում Սուրենյանը նշել է՝ Հայաստանում մայիսը տարվա ամենատեղումնառատ ամիսն է, սակայն այս տարի ցիկլոնը դրսևորվեց երկրին ոչ այդքան բնորոշ տեղումների ինտենսիվությամբ, կարկտահարությունների մեծ մասշտաբներով, ամպրոպների հաճախականությամբ։ Ուշադրություն է հրավիրել այն հանգամանքի վրա, որ ինտենսիվ տեղումներ են գրանցվել նաև մայրաքաղաքում, Երևանի առանձին հատվածներում եղել են նաև ջրածածկումներ:
Ըստ նրա՝ մայիսի 25-26-ին Լոռու և Տավուշի մարզերում այնքան շատ տեղումներ են եղել, որքան Երևանում նորմայով լինում է ամբողջ մայիս ամսվա ընթացքում։
«Հորդառատ անձրևներով պայմանավորված տեղի ունեցան գետերի վարարումներ, որոնք 1959 թվականից այս կողմ երկրորդն էին իրենց ծավալներով»,- շեշտել է Սուրենյանը:
Հետևեք մեզ — Facebook | Youtube | Telegram
Տավուշի և Լոռու մարզի համայնքները՝ աղետի գոտի
