Վրեժ՝ վիրավորանք հասցված քրոջ համա՞ր, թե՞ հեղաշրջման փորձ Ադրբեջանում

Գյանջա քաղաքի գործադիր իշխանության ղեկավար Էլմար Վելիևի հանդեպ մահափորձի գործի վերաբերյալ միմյանց հակասող վարկածներ և մանրամասներ են ի հայտ գալիս:

Գյանջայի գործադիր իշխանության ղեկավարի հանդեպ մահափորձը տեղի է ունեցել հուլիսի 3-ին: Պաշտոնյան վիրավորվել է, իսկ կրակողին՝ Ռուսաստանի քաղաքացի Յունիս Սաֆարովին, տեղում ձերբակալել են:

Հարձակումից հետո սոցցանցերում տարածվեցին Յունիս Սաֆարովի լուսանկարները՝ դաժան ծեծի հետքերով: Ինչպես նշվում էր լուսանկարների տակ արված գրառումներում, նրան ծեծել են ոստիկանները ձերբակալությունից հետո, իրենք էլ հենց տեղադրել են լուսանկարները:

Ֆեյսբուքի ընդդիմադիր հատվածի շրջանում այդ լուսանկարները զայրույթ և կարեկցանք են առաջացրել: Չէ՞ որ Գյանջայի ղեկավարը, որի վրա կրակել են, կոպիտ և հայհոյող մարդու համբավ ուներ և ժողովրդի շրջանում համակրանք չէր վայելում:

Տվյալ պահին երկու վարկած կա, թե ինչ և ինչու է տեղի ունեցել:

Պաշտոնական վարկածը

ՆԳՆ-ն ասում է, որ այդ մահափորձն ահաբեկչական ակտ էր:

Յունիս Սաֆարովն արմատական իսլամիստ է, 2016թ-ին 8 ամիս ապրել է իրանական Կում քաղաքում և Սիրիայում մարտական պատրաստվածություն անցել:

2017թ-ին, վերադառնալով Գյանջա, նա հարձակվել է բանկի անվտանգության աշխատակցի վրա և խլել նրանից տաբելային զենքը: 2018թ-ի հունվարից հետևել է Էլմար Վելիևին, մի անգամ գրեթե բռնվել է, սակայն կարողացել է թաքնվել՝ վիրավորելով ոստիկանին: Եվ ահա, վերջապես, հուլիսին փորձել է սպանել Վելիևին: Այսպիսի վարկած է ներկայացրել ԱՊԱ գործակալությունը:

Վելիևը պետք է մի շարք ահաբեկչական գործողություններից մեկի զոհը դառնար, որոնց նպատակն Ադրբեջանում իսլամական պետության ստեղծումն է: Դրա համար պետք էր սպանել որոշակի թվով պետական պաշտոնյաների, երկրում խուճապ և քաոս սերմանել և տիրանալ իշխանությանը:

Ոստիկանությունը պնդում է, որ Սաֆարովն իբր նույնիսկ տեսաուղերձ է պատրաստել, որում կոչ է անում ժողովրդին զինված պայքար սկսել պաշտոնյաների և իսլամի թշնամիների դեմ:

Իսկ ինչ վերաբերում է ալյանդակված դեմքով Սաֆարովի լուսանկարներին, ապա նրան ոչ ոք չի ծեծել, իսկ վնասվածքները նա ստացել է ձերբակալման ժամանակ դիմադրություն ցուցաբերելիս:

Ոչ պաշտոնական վարկածը

Ընդդիմադիր և անկախ մամուլը (օրինակ, Turan գործակալությունը) և քաղաքացիական ակտիվիստները, սակայն, այլ վարկած ունեն:

Ինչպես արդեն ասվել է, Վելիևը վաղուց անտաշ, իր ենթականերին, ինչպես նաև Գյանջայի՝ իր ձեռքի տակ ընկած բոլոր բնակիչներին, Գյանջայում հայտնված լրագրողներին պարբերաբար վիրավորող մարդու համբավ ունի: Այդպիսի վարքից տուժածներից մեկը Յունիս Սաֆարովի քույրն է եղել:

Այսպիսով, գործադիր իշխանության ղեկավարի վրա հարձակումը ոչ թե ահաբեկչական ակտ էր, այլ վրեժի ակտ: Եվ դա Սաֆարովին ոչ միայն գյանջացիների, այլ նաև Ադրբեջանի շատ բնակիչների աչքերում ավելի շուտ հերոս է դարձնում, քան չկայացած մարդասպան: Ինչպես գրել է ֆեյսբուքի օգտատերերից մեկն այդ պատմության քննարկման մեկնաբանություններում, «ողջ երկրում մի տղամարդ էր գտնվել, նրան էլ նստեցրին»:

Բացի այդ, ինչպես հաղորդում է Թուրան գործակալությունը, «Մուսուլմանական միասնություն» շարժումը (որի անունից Սաֆարովն իբր պատրաստել է այդ տեսաուղերձը, հայտարարում է, որ այդ մարդն իրենց կազմակերպությունից չէ: Այդ տեսագրությունն էլ մինչ այժմ ոչ մի տեղ չի հրապարակվել, այնպես որ, դրա գոյության փաստը լուրջ կասկածներ է առաջացնում:

Եվս մեկ տեսաուղերձ է ձայնագրել ձերբակալվածի կինը՝ Շարաֆաթ Սաֆարովան: Դրանում նա մի փոքր այլ կերպ է բացատրում իր ամուսնու քայլը: Ըստ նրա՝ Սաֆարովը վրեժ էր ուզում լուծել ոչ միայն իր քրոջ և վիրավորված մուսուլմանների համար, այլ՝ բոլոր գյանջացիների, որոնց երկար տարիներ հնարամտորեն հարստահարել է Վելիևը: