Վրաց ուղղափառ եկեղեցու Սուրբ սինոդը քննարկել է ուկրաինական եկեղեցու ավտոկեֆալիայի հարցը

Վրաց ուղղափառ եկեղեցու գլխավոր մարմին Սուրբ սինոդը հունիսի 21-ին քննարկել է «Ուկրաինայում ստեղծված բարդ եկեղեցական վիճակի» հարցը:

Նիստի արձանագրությունում ասվում է, որ Վրաստանի պատրիարքարանը 3 նամակ է ստացել Ուկրաինայում գործերի դրության վերաբերյալ: Առաջինը Կոստանդնուպոլսի տիեզերական պատրիարքությունից է, երկրորդը՝ Մոսկվայի և համայն Ռուսիո պատրիարքությունից, երրորդը՝ Ուկրաինայի ուղղափառ եկեղեցու Մոսկվայի թեմից:

«Սինոդը լսել է ուկրաինական եկեղեցու ավտոկեֆալիայի մասին տեղեկատվությունը, այդ հարցը հետազոտվում է, և ապագայում եզրակացություն կարվի», — հայտարարել է քահանայապետ Զոսիմեն լրագրողներին սինոդի ժողովի ավարտից հետո:

Ավելի մանրամասն մեկնաբանություն լրագրողներին տվեց սինոդի անդամ, միտրոպոլիտ Չկոնդիդցին, քահանայապետ Պետրե Ցաավան: Նրա խոսքով՝ ուկրաինական եկեղեցու ավտոկեֆալիայի մասին հարցի քննարկումները լրջորեն կմեկնարկեն այն բանից հետո, երբ իր դիրքորոշումը հայտնի Տիեզերական պատրիարքությունը:

«Կարծում եմ, Վրաց ուղղափառ եկեղեցին խոհեմ դիրքորոշում է ընդունել, — հայտարարել է քահանայապետ Պետրեն՝ միաժամանակ իր անձնական կարծիքը հայտնելով, —ես անձամբ կարծում եմ, որ Ուկրաինան՝ 40 մլն բնակչություն ունեցող երկիրը, պետք է անկախ եկեղեցի ունենա և չպետք է իր աղոթքներում հիշատակի Ուկրաինայի հանդեպ ագրեսոր համարվող պետության հայրապետին: Նա նաև չպետք է ենթակա լինի եկեղեցական առումով, սակայն ընթացակարգային առումով այս հարցի լուծումը ժամանակային առումով կձգվի», — հայտարարել է քահանայապետ Պետրեն:

Ուկրաինական կողմը հույս ունի, որ վրաց պատրիարքությունն իրեն կաջակցի ավտոկեֆալիայի հարցում: Այս մասին հայտարարել է Ուկրաինայի Գերագույն ռադայի խոսնակ Անդրեյ Պառուբին: Մյուս կողմը նույնպես ակտիվություն է ցուցաբերում: Ապրիլին Վրաստանում էր Ռուսաստանի պատրիարքարանի միջազգային հարցերի բաժնի ղեկավար միտրոպոլիտ Իլարիոնը: Ինչպես հայտարարել է Վրաստանի պատրիարքության քարտուղար սարկավագ Միքայել Բոտկովելին, միտրոպոլիտ Իլարիոնն ու համայն Վրաց կաթողիկոս-պատրիարք Իլյա երկրորդը քննարկել են Ուկրաինայի ավտոկեֆալիայի հարցը:

• Ապրիլի 22-ին Ուկրաինայի նախագահ Պյոտր Պորոշենկոն հայտարարել է, որ Կոստանդնուպոլսի պատրիարքությունը պարտադիր ընթացակարգեր է սկսել Ուկրաինայում միասնական ավտոկեֆալիա ունեցող եկեղեցու ստեղծման ուղղությամբ:
• Կոստանդնուպոլսի պատրիարքության սինոդը հայտարարել է, որ ակտիվորեն համագործակցելու է ուղղափառ եկեղեցիների հետ ուկրաինական եկեղեցու ավտոկեֆալիայի հարցում իրազեկման և համակարգման ուղղությամբ:

Այսօր Ուկրաինայում գործում է կանոնական ուկրաինական եկեղեցին, որը ենթարկվում է Մոսվայի պատրիարքարանին, ինչպես նաև երկու չճանաչված եկեղեցիներ՝ Կիևի պատրիարքության եկեղեցին և Ուկրաինայի ուղղափառ եկեղեցին: