Վրաստանում դեկտեմբերի 1-ից գործում է «կովիդ անձնագիրը»։ Ինչպե՞ս է աշխատում «կանաչ կարգավիճակը»

Կանաչ անձնագիրը Վրաստանում

Դեկտեմբերի 1-ից սկսվել է այսպես կոչված «կանաչ անձնագրերի» (կամ «կանաչ կարգավիճակի») հայեցակարգի գործարկումը։

Սա նշանակում է, որ, եթե չունեք «կանաչ կարգավիճակ», այսինքն՝ չեք պատվաստվել երկու դեղաչափով, վերջին 72 ժամում ՊՇՌ-թեստ կամ 24 ժամում արագ թեստ չեք արել, ձեզ այլևս չեն թողնի սրճարաններ և ռեստորաններ, խաղատներ, կինոթատրոններ և մի շարք այլ հաստատություններ։

Ի՞նչ է «կանաչ կարգավիճակը», և ո՞ւմ են այն տրվում։ Ի՞նչ փաստաթուղթ է պետք՝ դա ապացուցելու համար։ Ինչպե՞ս ստանալ փաստաթուղթը։ Արդյո՞ք այն պետք է տպագրված վիճակում, թե՞ բավական է այն ունենալ բջջային հեռախոսի մեջ։ Ո՞ր վայրերի մուտքն է թույլատրված կամ արգելված այսօրվանից։

JAMnews-ը մանրամասն ուղեցույց է պատրաստել։

Ի՞նչ է «կանաչ կարգավիճակն» ու «կանաչ անձնագիրը»

Կանաչ կարգավիճակ են ստանում մարդիկ, որոնք․

• պատվաստվել են COVID-19-ի դեմ ցանկացած պատվաստանյութի երկու դեղաչափով,
• արդեն ապաքինվել են,
• ՊՇՌ-թեստ են արել վերջին 72 ժամում,
• հակագենի արագ թեստ են հանձնել վերջին 24 ժամում։

Այդ մարդկանց (թեստի բացասական արդյունքի պայմանով) տրվում է «կանաչ կարգավիճակ»։

Այդ կարգավիճակը հաստատող փաստաթուղթը «կանաչ անձնագիրն» է կամ «կովիդ-անձնագիրը», որը QR-կոդով հատուկ փաստաթուղթ է։

Որտե՞ղ ստանալ «կանաչ անձնագիր»

«Կանաչ անձնագիր» տրամադրում են բոլոր հիվանդանոցները, որտեղ պատվաստում են անում։

Նկատի ունեցեք, որ «կանաչ կարգավիճակ» կստանաք միայն պատվաստանյութի երկու դեղաչափերով պատվաստվելուց հետո։

«Կանաչ անձնագիր» ստանալ կարելի է նաև արդարադատության տանն ու դրա հանրային կենտրոններում։

Այդ հաստատություն պարտադիր չէ զանգահարել և այցը նախապես ամրագրել։ Սակայն վերջին ժամանակներս Արդարադատության տներում հաճախ են հերթեր գոյանում։ Սա պետք է հաշվի առնել, եթե պլանավորում եք այնտեղից ստանալ փաստաթուղթը։

Պարտադի՞ր է արդյոք տպել փաստաթուղթը

Դրա անհրաժեշտությունը չկա։

«Կովիդ-անձնագիրը» լինում է նաև էլեկտրոնային տեսքով, և եթե էլեկտրոնայինն ակտիվացնեք, ձեզնից էլ չեն պահանջի թղթային տարբերակը։

QR-ի էլեկտրոնային տարբերակն ակտիվացնելու համար անհրաժեշտ է հեռախոսի մեջ ներբեռնել Georgia e-Health կամ CovidPass Georgia բջջային հավելվածները։ Երկու հավելվածն էլ «կանաչ անձնագիր» կտան ձեզ, եթե համապատասխանում եք չափանիշներին։ Տարբերությունն այն է, որ CovidPass Georgia-ն գործում է միայն Վրաստանի տարածքում։

Հավելվածը ներբեռնելուց և գրանցվելուց հետո ակտիվացնում եք QR-կոդը, որում պահվում է ձեր ողջ covid-պատմությունը․

• պատվաստման ամսաթիվն ու պատվաստանյութի տեսակը,
• ՊՇՌ-թեստի և հակագենի թեստի վերջին արդյունքները,
• վարակման ձեր կարգավիճակը՝ արդյո՞ք վարակվել եք։

Այժմ՝ գլխավորի մասին․ ի՞նչն է տալիս «կանաչ կարգավիճակ»

Դեկտեմբերի 1-ից ձեզ թույլ չեն տա այցելել մի շարք վայրեր առանց կանաչ անձնագրի։

Ահա այդ վայրերը․

• ռեստորաններ, սրճարաններ, բարեր՝ բացօթյա և փակ տարածքներում,
• կինոթատրոններ, թատրոններ, օպերա, համերգասրահներ, զվարճանքի կենտրոններ,
• խաղատներ, խաղային բիզնեսի հետ կապված հաստատություններ,
• ՍՊԱ-կենտրոններ, մարզասրահներ,
• հյուրանոցներ,
• ճոպանուղիներ, լեռնադահուկային հանգստավայրեր։

«Կանաչ անձնագրի» պահանջն արդիական է 18 տարեկանից բարձր քաղաքացիների համար։

Այդ թվում՝ պահանջը (18 տարեկանից բարձր անձանց համար) տարածվելու է մանկական զվարճանքի կենտրոնների վրա։ Այսինքն՝ եթե երեխային տանում եք մանկական զվարճանքների կենտրոն և պատվաստված չեք, ձեզ ներս չեն թողնի, բայց երեխային՝ կթողնեն։

«Կանաչ անձնագիրը» պարտադիր չէ այն վայրերում, ուր գնալը կենսական անհրաժեշտություն է՝ հիվանդանոցներում, խանութներում։

Դեռևս, ի տարբերություն մյուս եվրոպական երկրների, «կովիդ-անձնագիր» պետք չէ հանրային տրանսպորտում։

Ի՞նչ կլինի, եթե ինչ-որ տեղ գնաք առանց «կանաչ անձնագրի»

Հաստատության տերը կտուգանվի, որ մարդ է ընդունել առանց «կանաչ անձնագրի», այդ պատճառով էլ նրա շահերից է բխում ուշադիր ստուգել բոլոր այցելուներին։

Տուգանքը բավականին բարձր է․ անհատ ձեռնարկատիրոջ համար 2 հազար լարի (մոտ 640 դոլար), իրավաբանական անձի համար՝ 10 հազար լարի (մոտ 3200 դոլար)։

Աշխատանքի տեսչության հաղորդագրության համաձայն՝ օբյեկտներում պարբերաբար պլանային և արտապլանային ստուգումներ կիրականացվեն։ Եթե պարզվի, որ այս կամ այն հաստատությունը պարբերաբար խախտում է կանոնները, այն կփակվի, դրա գործունեությունը ժամանակավորապես կկասեցվի։

Ինչպե՞ս է օբյեկտը ստուգելու ձեր կարգավիճակը

Հաստատության մուտքի մոտ մարդ է կանգնած լինելու՝ սմարթֆոնով կամ QR-կոդ կարդացող սարքով՝ ստուգելու համար ձեր QR-կոդը։ Ձեզ թույլ կտան ներս մտնել, միայն եթե «կանաչ կարգավիճակ» ունեք։

«Կանաչ անձնագիրն» անժամկե՞տ է

Դա կախված է նրանից, թե ինչպես եք ստանում այդ կարգավիճակը։

Եթե չեք պատրաստվում պատվաստվել և ընտրում եք թեստի եղանակը՝ «կանաչ կարգավիճակ» ստանալու համար, հիշեք, ՊՇՌ կամ արագ թեստի ժամկետը լրանալուց հետո այն պետք է կրկնել ամեն անգամ։

ՊՇՌ թեստի դեպքում «կանաչ կարգավիճակի» գործողության ժամկետը կազմում է 72 ժամ, իսկ արագ թեստի դեպքում՝ 24 ժամ։ Նկատի ունեցեք, որ թեստերը վճարովի են, և դրանք պետք է անեք ձեր հաշվին։

Վարչապետ Իրակլի Ղարիբաշվիլիի որոշմամբ՝ կորոնավիրուս տարած անձինք Վրաստանում ցմահ «կանաչ կարգավիճակ» կստանան։

Սակայն Ղարիբաշվիլիի նախաձեռնությունն արդեն դժգոհություն է առաջացրել համաճարակաբանների և մասնագետների շրջանում։

Նրանք նշում են, որ «հավերժ կանաչ անձնագրի» կարգավիճակ չի գործում Վրաստանից բացի ոչ մի երկրում, որովհետև COVID-19-ը կայուն իմունիտետ չի ձևավորում։

Վրաստանում քիչ չեն կրկնակի վարակման դեպքերը։ Հիվանդությունների վերահսկման ազգային կենտրոնի տվյալներով՝ երկրում արձանագրվել է այդպիսի մինչև 5 հազար դեպք։

Այդ պատճառով էլ չի բացառվում, որ Ղարիբաշվիլիի նախաձեռնությունը վերանայվի։

Եվս մեկ դետալ՝ անգամ եթե «հավերժ կանաչ կարգավիճակի» քննարկումը Վրաստանում չձգձգվի, և այդ որոշումն ուժի մեջ մնա, այդ կարգավիճակը չի գործելու ճամփորդությունների ժամանակ։ «Անժամկետ կարգավիճակը», որը տրամադրում է Ղարիբաշվիլին, պետք կգա երկրի ներսում, իսկ արտասահմանում անհրաժեշտ կլինի թեստ կամ պատվաստում։

Այսինքն՝ եթե հիվանդացել եք ավելի քան 6 ամիս առաջ և «կանաչ կարգավիճակ» ունեք միայն դրա հաշվին (և չեք պատրաստվում պատվաստվել), ապա ձեզ թույլ չեն տա հատել սահմանը կամ մուտք գործել ցանկացած այլ երկիր։

Էլ ի՞նչ է փոխվում դեկտեմբերի 1—ից

Կառավարության համակարգման խորհրդի որոշմամբ՝ կինոթատրոններում և թատրոններում այցելուների թույլատրելի թիվը դեկտեմբերի 1-ից 30 տոկոսից կաճի մինչև 50 տոկոս։ 

Դեկտեմբերի 1-ից նաև կչեղարկվեն ժամային սահմանափակումները ռեստորանների համար։ Մինչ օրս ռեստորաններին թույլատրվում էր աշխատել միայն մինչև 23:00-ն։

Դեկտեմբերի 1-ից ամեն ինչ դեռ ուժի մեջ է․

• դիմակ կրելը բացօթյա և փակ տարածքներում,
• նախկինի պես արգելված են բազմամարդ հարսանիքները, թաղումները, հանդիսությունները, տարբեր հոբելյանները և այլն,
• նախկինի պես արգելված է գիշերային ակումբների աշխատանքն ինչպես բացօթյա, այնպես էլ փակ տարածքներում,
• ճամբարային տիպի հավաքույթները նախկինի պես արգելված են։

Արդյո՞ք «կովիդ-անձնագիր» է պետք առևտրի կենտրոններում և շուկաներում

Առևտրի կենտրոն մտնելիս անձնագիր չեն պահանջի։ Այն պետք չի լինի նաև հագուստի, մթերային, տեխնիկայի կամ ցանկացած այլ խանութներում, որոնք տեղակայված են կենտրոններում (եթե որևէ խանութ այն չպահանջի իր իսկ նախաձեռնությամբ), ոչ էլ դեղատներում։ Սակայն առևտրի կենտրոնի ներսում գտնվող զվարճանքի կենտրոններում, կինոթատրոններում, սրճարաններում, ռեստորաններում և նման այլ վայրերում անպայման կստուգեն ձեր «կանաչ կարգավիճակը»։

Ինչո՞ւ է ներմուծվել «կանաչ կարգավիճակի» հայեցարգը

Կիրառելով «կանաչ կարգավիճակի» հայեցակարգը՝ կառավարությունը փորձում է խթանել պատվաստումը երկրում։

Նոյեմբերի 30-ի դրությամբ՝ Վրաստանի բնակչության ընդամենը 35 տոկոսն է ամբողջությամբ պատվաստվել։ Վարակման և մահացության մակարդակը նախկինի պես բարձր է։