Վրաստանի նախագահը կոչ է արել «Ռուսթավի 2»-ի շուրջ ստատուս քվոյի պահպանման մինչև սահմանադրական և եվրոպական դատարանների որոշումը

Վրաստանի նախագահն ընդդիմադիր «Ռուսթավի 2» հեռուստաընկերության գործով դատավճռի վերաբերյալ իր հատուկ հայտարարությունում կոչ է արել կողմերին, ելնելով հարցի քաղաքական նշանակությունից, «անհապաղ քայլեր» չձեռնարկել մինչև Սահմանադրական դատարանի և Մարդու իրավունքների եվրոպական դատարանի որոշումները:

Վրաստանի նախագահի խոսքով՝ նա չի կարող միջամտել հեռուստաընկերության պատկանելիության մասին վեճին, սակայն կարծում է, որ«Ռուսթավի-2»-ը և ցանկացած այլ լրատվամիջոց «միայն բիզնես չէ», այլ իրենից հասարակական-քաղաքական կյանքի կարևորբաղկացուցիչ է ներկայացնում:

««Ռուսթավի-2»-ը քննադատական և (իշխանությանը) հակառակ կարծիքի արտահայտչամիջոց է, ինչը շատ կարևոր է Վրաստանի եվրոպական ապագայի համար: Փաստացի միջազգային գործընկերների հետ իմ բոլոր հանդիպումներին բարձրացվել է «Ռուսթավի-2»-ի հարցը, և ես իմ դիրքորոշումն եմ հայտնել այդ թեմայի վերաբերյալ: Միջազգային հանրությունը «Ռուսթավի-2»-ի գործընթացն ընկալում է ոչ որպես դատական վեճ, այլ խոսքի ազատության հարց», — հայտարարել է Գեորգի Մարգվելաշվիլին:

«Ռուսթավի-2»-ի գործով հայտարարություն է տարածել նաև կառավարության վարչակազմը: Կառավարությունը մասնավորապես կոչ է անում հասարակությանը «հարգել ժողովրդավարական ինստիտուտները» և հիշեցնում է, որ հեռուստաընկերության վերաբերյալ դատական վեճն ընթացել է սեփականության իրավունքի խախտման հետ կապված «ծանր ժառանգության» ֆոնին:

Գերագույն դատարանի որոշման կապակցությամբ մտահոգություն է հայտնել Վրաստանի 19 առաջատար ոչ կառավարական կազմակերպություն: Նրանց տարածած հայտարարությունում ասված է, որ «ընդունված որոշումը կսահմանափակի լրատվամիջոցների ազատությունն ու սպառնում է Վրաստանի եվրատլանտյան ինտեգրացիայի գործընթացին»: