Վրաստանի կառավարությունը փորձում է փրկել տնտեսությունը

Վրաստանի կառավարությունը կորոնավիրուսի պանդեմիայի պայմաններում տնտեսական կորուստները նվազագույնի հասցնելու ծրագիր է հրապարակել:

Հիմնական շեշտը դրված է զբոսաշրջության ոլորտի վրա, քանի որ այն ստացել է շոշափելի հարված:

Թբիլիսիում արդեն փակվել են 10 հյուրանոց: Մյուս հյուրանոցները փորձում են խնայել՝ սենյակների մի մասը փակելով: Այդպես է վարվել, օրինակ, HOLIDAY INN-ը. այժմ այնտեղ սպասարկվում է սենյակների մոտ 20 տոկոսը:

Մոտ 100 հյուրանոցներ, որոնց տերերը վարկ են վերցրել և հիմա չեն կարողանում վճարել, սպասում են կառավարության և բանկերի որոշումներին: Այդ մասին հայտարարեց Վրաստանի հյուրանոցների և ռեստորանների ֆեդերացիայի հիմնադիր Շալվա Ալավերդաշվիլին:

Վնասներ են կրում նաև տուրօպերատորները և էքսկուրսիոն ընկերությունները. նրանց մոտ արդեն չեղյալ են հայտարարվել համարյա թե բոլոր ամրագրումները:

Ծանր ֆինանսական վիճակում են ժամանցային կենտրոնները. մարդիկ խուսափում են զանգվածային հավաքատեղիներից: Ժամանակավորապես փակ են բոլոր հայտնի գիշերային ակումբները՝ «Կուրի վրայով», «Բասիանի», «Խիդի»:

Վերջին 10 օրվա ընթացքում տատանվել է նաև լարին՝ ազգային արժույթը, դոլարի նկատմամբ արժեզրկվելով միանգամից 20 միավորով: Այսօր պաշտոնական փոխարժեքով մեկ դոլարի դիմաց կարելի է ստանալ 2.9494 լարի:

Կառավարության առավել կարևոր նախաձեռնությունների մասին, որոնք, վարչապետ Գիորգի Գախարիայի կարծիքով, թույլ կտան ձեռներեցներին գոյատևել և պահպանել աշխատատեղերը։

Զբոսաշրջության ոլորտ

1.Բանկերը երեք ամիս պետք է օգնեն ամենակարիքավոր ընկերություններին վերակազմավորել պարտքերը: Ենթադրվում է, որ դա կօգնի զբոսաշրջության ոլորտին խնայել մոտ 100 մլն լարի (շուրջ 36 հազար դոլար):

2.Ֆիզիկական անձինք երեք ամսով ազատվում են վերցրած վարկերը և փոխառությունները սպասարկելու պարտականություններից:

3.Կառավարությունը չորս ամսով կհետաձգի տուրիստական ոլորտում գործող ընկերությունների հարկերի վճարումները: Որոշումը վերաբերում է ընդհանուր առմամբ 18 հազար ընկերությունների և ավելի քան 50 հազար աշխատողների: Սպասվում է, որ դա կօգնի զբոսաշրջության ոլորտին մարտից հունիս ընկած ժամանակահատվածում խնայել 100 մլն լարիից ավելի (շուրջ 36 հազար դոլար):

Ընկերությունները պետք է վերսկսեն սովորական ռեժիմով հարկային վճարումները 2020 թվականի հուլիսին: Կուտակված պարտքերը նրանք պետք է մարեն մինչև 2020 թվականի նոյեմբերի 1-ը:

4. Կառավարությունը մտադիր է կրկնապատկել այն գումարը, որը հավաքագրվելու է զբոսաշրջության ոլորտում ավելացված արժեքի հարկի տեսքով: Սպասվում է, որ մարտից հունիս ընկած ժամանակահատվածում այդ գումարը կկազմի մոտ 600 միլիոն լարի (շուրջ 215 հազար դոլար):

«Դա նշանակում է, որ տարվա ընթացքում ավելացված արժեքի հարկի միջոցով  տնտեսություն կվերադառնա մեկ միլիարդ 200 միլիոն լարի (շուրջ 500 միլիոն դոլար)»,- ասել է վարչապետը:

5.Պետությունը վեց ամսով կստանձնի չորսից մինչև հիսուն սենյակ ունեցող երկու հազար հյուրանոցների վարկերի տոկոսադրույքները:

6.Պետությունը մինչև տարվա վերջ ներդնում է 300 միլիոն լարի (107 հազար դոլար) նյութական և ենթակառուցվածքային ծախսերում:

•Կորոնավիրուս․ պանդեմիա է հայտարարվել։ Ի՞նչ է դա նշանակում և ի՞նչ սպասել 

•Ինչպե՞ս խուսափել կորոնավիրուսից և ինչո՞ւմ է դրա սպառնալիքը: Հարցերի պատասխանները երկու րոպեանոց տեսանյութում

Բանկային արտոնություններ

Վրացական առավել մեծ բանկերը կառավարության հետ համակարգված աշխատանքի պատրաստակամություն են հայտնել:

«Սաքարթվելոս բանկի»-ն և ТВС-ն իրենց հաճախորդներին կառաջարկեն վճարումների եռամսյա հետաձգում:

ТВС-ն նաև պատրաստ է անհատական կարգով լուծել զբոսաշրջության ոլորտի հետ կապված հաճախորդների խնդիրները:

Տարբեր բացառություններ և արտոնություններ պատրաստ է տրամադրել նաև «Լիբերթի բանկը»:

Վրաստանին ֆինանսական օգնություն պատրաստ է տրամադրել նաև «Քարթու» հիմնադրամը, որի հետ ուղղակիորեն կապ ունի իշխող «Վրացական երազանք» կուսակցության ղեկավար Բիձինա Իվանիշվիլին:

Հիմնադրամը հայտարարել է, որ պատրաստ է օգնել վերացնել ֆինանսական կորուստները, որոնք կկրեն պետական կառույցները կորոնավիրուսի դեմ պայքարի ընթացքում: