Սկանդալ ադրբեջանական ընդդիմությունում․ «Մուսավաթ» կուսակցությունը մեղադրվում է իշխանություններին հավատարիմ լինելու համար
Ադրբեջանի հնագույն ընդդիմադիր կուսակցություններից մեկին՝ «Մուսավաթին», քննադատում են մյուս ընդդիմադիր գործիչներն այն բանի համար, որ դրա անդամներից մի քանիսն իշխանության հետ երկխոսության են գնացել։
«Մուսավաթը» հերքում է մեղադրանքներն՝ ասելով, որ այդ անձինք գործել են ոչ թե որպես կուսակցության ներկայացուցիչներ, այլ ինքնուրույն։
Սկանդալին մասնակցում են նաև նախկին քաղբանտարկյալ, լրագրող Աֆղան Մուխտարլին։
- «Վարակի բովով»․ ինչպե՞ս է ստուգումն անցել ադրբեջանական կառավարությունն ու հասարակությունը
- Համավարակը՝ որպես շանս Վրաստանի իշխող կուսակցության համա՞ր
- ԼԳԲՏ–ն Թուրքիայում․ նախարարն՝ ընդդեմ իրավաբանների
Ոչ այնքան հասկանալի առաջարկ
Ադրբեջանի իշխանություններն ընդդիմությանը պաշտոնապես երկխոսություն են առաջարկել 2020 թ–ի մարտի սկզբին։ Ըստ էության՝ դա նշանակում է համագործակցության կոչ, թեև դեռևս անհասկանալի է, թե ինչ ձևաչափով։
Ընդդիմադիրները տարբեր կերպ են արձագանքել այդ առաջարկին։
Չգրանցված «Հանրապետական այլնտրանք» կուսակցությունն առաջարկին համաձայնել է, ինչը բոլորի վրդովմունքն է առաջացրել։
«Մուսավաթ» և «Ժողովրդական ճակատ» կուսակցություններն, ինչպես նաև «Ադրբեջանի ժողովրդավարական ուժերի խորհուրդ» միավորումը մի շարք պայմաններ են առաջ քաշել։ Կառավարությունն այդ պայմանները չի ընդունել, այնպես որ, երկխոսություն չի ստացվել։
Ադրբեջանական իշխանությունները երկար տարիների ընթացքում առաջին անգամ են նման առաջարկով հանդես եկել։ Եվ, մերժում ստանալով, վրդովվել են։ Նախագահ Իլհամ Ալիևն իր ելույթներում իշխանությունների հետ համագործակցությունը մերժած ընդդիմադիրներին բազմիցս անվանել է «հինգերորդ շարասյուն» և «ժողովրդի թշնամի»։
Իսկ ընդդիմությունն իշխանությունների հետ երկխոսությունից ոչ մի լավ բան չի սպասում՝ հաշվի առնելով ավանդական բռնաճնշումներն ու հետապնդումները, որոնց ենթարկվում է։ Միայն «Հանրապետական այլընտրանքն» է ավելի լավատեսորեն տրամադրված։
Սկանդալային հանդիպում
Եվ ահա այժմ լրատվամիջոցներում տեղեկություններ են հայտնվել, որ «Մուսավաթի» անդամ Նովելա Ջաֆարօղլուն, որը գլխավորում է նաև «Ադրբեջանի կանանց իրավունքների պաշտպանության կազմակերպությունն», ու նրա երկու կուսակիցները հանդիպել են նախագահի վարչակազմի քաղաքական կուսակցությունների և օրենսդիր իշխանության հետ կապերի բաժնի պետ Ադալյաթ Վելիևի հետ։
Նովելա Ջաֆարօղլուն չի հերքում, որ կողմ է իր կուսակցության և իշխանությունների միջև երկխոսությանը․
«Բնականաբար, «Մուսավաթը» չի կարող հանդիպումից հեռու մնալ, որի ընթացքում քննարկվում են քաղաքական կուսակցությունները։ Զրույցը կայացել է։ Ամեն ինչ կախված է մեր ղեկավարությունից, իսկ մենք ընդամենը «Մուսավաթի» շարքային անդամներ են։ Սակայն շատ կցանկանայինք, որ երկխոսությունը կայանար», – ասում է նա։
«Ժողովրդական ճակատն» ու «Ադրբեջանի ժողովրդավարական ուժերի խորհուրդը» դա որպես դավաճանություն են ընկալել «Մուսավաթի կողմից»։
«Մուսավաթը» հավատացնում է, որ ոչ մի պատասխանատվություն չի կրում Ջաֆարօղլուի գործողությունների համար, և այդ մասին ոչինչ չգիտի, և իշխանությունների հետ չի պատրաստվում զրուցել։
«Վելիևի հետ այդ հանդիպման մասնակիցները հանդես են եկել իրենց հասարակական կազմակերպության, այլ ոչ թե մեր կուսակցության անունից։ Մեր հասցեին քննադատությունն անարդար է։ Մենք այդ հանդիպմանը ոչ ոքի չենք ուղարկել, և ընդհանրապես տեղյակ չենք եղել այդ ամենից», – հայտարարում է «Մուսավաթի» կառավարման անդամ Սահավաթ Սոլթանլին։
Մյուս ընդդիմադիրները ոչ թե չեն հավատում «Մուսավաթին», այլ պահանջում են պարզել իրավիճակն ու ստիպել Նովելա Ջաֆարօղլուին պատասխան տալ իր ինքնագործունեության համար։
Լրագրողն՝ ընդդեմ իրավապաշտպանի
Կատարվածին շատ կտրուկ է արձագանքել լրագրող Աֆղան Մուխտարլին, որը վերջերս է բանտից դուրս եկել և այժմ բնակվում է Գերմանիայում։
«Կարծում եմ, որ այդքանից հետո եթե Նովելան «Մուսավաթում» մնա, դա կուսակցության հեղինակության վրա բիծ է լինելու», – նշել է նա։
Ի պատասխան՝ Նովելա Ջաֆարօղլուն Մուխտարլիին մեղադրել է մաքսանենգության և այն բանի համար, որ նա բանտում լինելու ժամանակ իշխանություններին աղաչել է ազատ արձակել իրեն։
Մաքսանենգությունը մեղադրանքներից մեկն է, որն ադրբեջանական իշխանությունները առաջադրել են Մուխտարլիին նրան կալանավորելիս։ Կանխավ լրագրողն առևանգվել էր Վրաստանից։ Միջազգային իրավապաշտպան կազմակերպություններն Աֆղան Մուխտարլիին քաղբանտարյալ էին ճանաչել և երկար ժամանակ պահանջում էին նրան ազատ արձակել։
Այս ամենն ադրբեջանական ընդդիմության շրջանում ներքին կոնֆլիկտների առաջին դեպքը չէ։ Իշխանությունների առաջարկած երկխոսությունից հետո այդ կոնֆլիկտներն ավելի հաճախակի են դարձել։
Կրակին յուղ է լցնում նաև այն, որ «Հանրապետական այլընտրանք» կուսակցության անդամ Էրքին Գադիրլին գործող ընդդիմության միակ ներկայացուցիչն է, որը խորհրդարան է անցել 2020 թ–ի փետրվարյան ընտրությունների արդյունքում։
