Սկանդալ Բաքվում փակված հոսթելի շուրջ

Բաքվի ոստիկանությունը հանկարծակի որոշում է կայացրել փակել մասնավոր հոսթել, այնտեղ ապրող արտասահմանյան զբոսաշրջիկները փողոցում են հայտնվել: Սոցցանցերում մեծ սկանդալ է առաջացրել ոչ այնքան որոշումը, որքան Ադրբեջանի ներքին գործերի նախարարության մամուլի ծառայության պետ, ոստիկանության գնդապետ Էսխան Զահիդովի մեկնաբանությունն այն մասին, որ «հոսթելները չեն համապատասխանում Ադրբեջանցիների մտածողությանը»:

Ոստիկանության ջոկատը Freedom հոսթել է մտել ապրիլի 8-ին նույն շենքի բնակչի բողոքով և կենվորներից պահանջել անմիջապես լքել իրենց սենյակները: Հոսթելի տեր Ջամիդին Մուրթուզաևը մեծ դժվարությամբ է կարողացել ոստիկանության սպաներին համոզել մինչև առավոտ ժամանակ տալ, հյուրերին կեսգիշերին փողոցում չթողնելու համար: Հաջորդ առավոտյան Մուրթուզաևն իր հաշվին հյուրերին՝ ամերիկացու, չինացու, ավստրիացու և երկու ուկրաինացու, տեղավորել է Բաքվի այլ հոթելներում: Նա ստիպված է եղել նաև ևս 6 զբոսաշրջիկի համար տեղ գտնել, որոնք արդեն այդ հոսթելում տեղեր էին ամրագրել:

Ադրբեջանի ՆԳՆ մամուլի ծառայության ղեկավար Էսխան Զահիդովը, մեկնաբանելով իրավիճակը 1news.az գործակալությանն ասել է.

«Բազմաբնակարան շենքերում հոսթելների կազմակերպումը հաճախ այդ տների բնակիչների դժգոհությունն է առաջացնում: Տվյալ կոնկրետ դեպքում 4-հարկանի տան երկու բնակարանը հյուրանոց են դարձրել: Սակայն այդ շենքն ընդհանուր մուտք ունի, որից օգտվում են ինչպես մեր քաղաքացիներն, այնպես էլ արտասահմանցիները: Բացի այդ, զբոսաշրջիկները հաճախ հոսթել են վերադառնում ուշ ժամի, երաժշտություն են լսում, աղմուկ են ստեղծում՝ հարևանների համար անհարմարություններ առաջացնելով: Տվյալ դեպքում հյուրերը բողոքել են, որ հոսթելի առկայությունը խաթարում է իրենց հանգիստը: Ոսիտակնությունը գործը դատարան է ուղարկել, որը որոշել է՝ լինի հոսթելը, թե չլինի»:

Եվ ավելացրել է. «Հոսթելները չեն համապատասխանում մեր մտածողությանը»:

Ադրբեջանի զբոսաշրջության ասոցիացիայի ղեկավար Նահիդ Բագիրովը հոսթելի փակումն անթույլատրելի է համարում. «Դա մեծ վնաս է հասցնում զբոսաշրջության զարգացմանը: Գործարարն օրենքներ չի խախտել, նրա փաստաթղթերը կարգին են, նա աշխատում է երկրի օրենսդրությանը համապատասխան: Ես դիմեցի համապատասխան ատյաններ, մշակույթի և զբոսաշրջության նախարարության ղեկավարությանը, և գործադրում եմ բոլոր ջանքերը հոսթելի աշխատանքի վերականգնման համար: Սակայն իմ ազդեցությունն անսահման չէ: Երևի երկրի ղեկավարությունը պետք է միջամտի և օգնի լուծել հարցը»:

Ընդդիմադիր «Ռեալ» շարժման գործադիր քարտուղար Նաթիկ Ջաֆարլին կտրուկ քննադատել է իշխանությունների այդ որոշումը: «Ժողովրդի մտածողությանն անհամապատասխան լինելու առիթով հոսթել փակելը հերթական անգամ ապացուցում է, որ տնտեսությունում անցկացվող բարեփոխումները ոչ մի արդյունքի չեն բերում: Քանի դեռ մենք չունենք նորմալ իրավապահ համակարգ, արդար դատարան, անօգուտ է խոսել տնտեսական բարեփոխումների մասին: Մեր երկրում կառավարումը հիմնված է ոչ թե օրենքների, այլ «խաղի կանոնների» վրա, որոնք սահմանվում են վերևներից»:

Ահա սոցցանցերի մի քանի տիպիկ մեկնաբանություն.

• «Ստացվում է, որ կաշառքը, կոռուպցիան, պետական գույքի հափշտակումը, պատվիրված դատավճիռները համապատասխանում են մեր մտածողությանը, սակայն հոսթելներում արտասահմայան զբոսաշրջիկների մնալը՝ ո՞չ»:

• «Եկեք ողջ երկիրը փակենք: Զբոսաշրջությունը նույնպես չի համապատասխանում մեր մտածողությանը: Եվ ընդհանրապես պետք է ստեղծել Մտածողության վերահսկողության վարչություն»:

• «Ամեն ինչ ճիշտ է: Միջուկային տերություններն, օրինակ Պակիստանը, Իրանը և Հյուսիսային Կորեան առանց հոսթելների են կարողանում գոյատևել, մեր ինչի՞ն է պետք իջնել փտած արևմուտքի մակարդակին»:

• «Ամեն ինչ շատ պարզ է: Հոսթելները կարող են ավելի թանկ հյուրանոցների հացը կտրել, որոնք բարձրաստիճան պաշտոնյաների են պատկանում»: