«ՀՀ-ին բացահայտ սպառնում են Ուկրաինայի սցենարով»․ հայ քաղաքագետ
ՌԴ-ն սպառնում է Հայաստանին
«Տեսնում ենք, թե ինչպես են փորձում Հայաստանը դարձնել երրորդ Ուկրաինա, եթե Մոլդովան համարենք երկրորդը, իսկ Փաշինյանը թռիչքային քայլերով գնում է Զելենսկու ճանապարհով»,- ռուսական ТАСС գործակալությանն ասել է Ռուսաստանի կառավարության բարձրաստիճան պաշտոնյա, որը ցանկացել է անանուն մնալ։
Աղբյուրը քննադատել է Հայաստանի վարչապետի՝ Եվրախորհրդարանում ունեցած ելույթն ու նշել, որ այն «բացարձակ անպատասխանատու և սադրիչ» էր, հատկապես ՌԴ և հայ-ռուսական հարաբերությունների առնչությամբ։ Այլ մանրամասներ լրատվամիջոցը չի հաղորդել։
JAMnews-ի հետ զրույցում քաղաքագետ Ռոբերտ Ղևոնդյանը նշել է, որ այս կերպ Մոսկվան արտահայտում է իր դժգոհությունը Փաշինյանի ելույթից։ Մյուս կողմից նկատել է՝ առաջին անգամ չէ, որ ռուսական կողմը Հայաստանին սպառնում է Ուկրաինայի սցենարով։ Կարծում է՝ Մոսկվան կբավարարվի միայն հայտարարություններով, կոնկրետ գործողությունների չի դիմի, քանի դեռ Երևանն էլ չի մեկնարկել ՀԱՊԿ ռազմական դաշինքից դուրս գալու գործընթաց։ Քաղաքագետի փոխանցմամբ՝ կարծես թե հայկական կողմը նման մտադրություններ չունի։
Նախօրեին Հայաստանի վարչապետը ծավալուն ելույթ էր ունեցել Եվրախորհրդարանում։ Փաշինյանը քննադատել էր անվտանգության ոլորտում երկրի դաշնակիցներին՝ անդրադառնալով 2022 թ․-ի Հայաստանի սահմանին ռազմական գործողությունների ժամանակ ՀԱՊԿ արձագանքի բացակայությանը, ինչպես նաև «Ռուսաստանի խաղաղապահ զորախմբի անգործության պայմաններում» ԼՂ-ից հայերի բռնի տեղահանությանը։
«Այն ժամանակ, երբ 100 հազար հայեր ԼՂ-ից փախչում էին ՀՀ, անվտանգային ոլորտի մեր դաշնակիցները մեզ ոչ միայն չէին օգնում, այլև ՀՀ-ում իշխանափոխություն անելու, ժողովրդավարական իշխանությունը տապալելու հրապարակային կոչեր էին հնչեցնում»,- շեշտել էր նա ու հավելել, որ հայ ժողովրդի համախմբման արդյունքում պետության դեմ ուղղված «հերթական դավադրությունը» ձախողվել է։ Կոնկրետ դաշնակցի անուն, սակայն, վարչապետը չէր հնչեցրել։
Մեկնաբանություն
Քաղաքագետ Ռոբերտ Ղևոնդյանի դիտարկմամբ՝ Ռուսաստանը ՀՀ-ին Ուկրաինայի սցենարով է սպառնում բավականին երկար ժամանակ, դա արվում է հիմնականում ռուսական մեդիայի ներկայացուցիչների, փորձագետների կողմից։ Ընդգծում է՝ այս պարագայում ևս ռուսական դիվանագիտությունն աշխատում է այնպես, ինչպես միշտ։
«Սկզբում անանունության սկզբունքով ինչ-որ մեկը շատ կոշտ գնահատականներ է տալիս։ Ես սպասում եմ նաև ԱԳՆ խոսնակի կողմից որոշակի արձագանք։ Հետո նաև փորձագետների մակարդակ կանցնի, ավելի ուշ իրենց դժգոհությունը կարտահայտեն մի փոքր ավելի մեղմացված»,- պարզաբանել է նա։
Քաղաքագետի գնահատմամբ՝ ուզում են ևս մեկ անգամ հիշեցնել՝ Մոսկվան ունի գործիքներ, որոնք կարող է գործի դնել, եթե Հայաստանը շարունակի նման վարքագիծ դրսևորել․
«Սա բացահայտ սպառնալիք է Հայաստանին։ Բայց նորություն չէ, այդ սպառնալիքը բավականին երկար ժամանակ է, ինչ պտտվում է, շատ սրվել էր, օրինակ՝ Հռոմի ստատուտի վավերացման նախօրեին»։
Շեշտում է՝ ամեն անգամ, երբ Հայաստանն ինքնիշխան որոշում, հայտարարություն կամ գործողություն է անում, սպառնալիքների հեղեղն ավելի է շատանում։ Ասում է՝ հայկական կողմը պետք է սովորած լիներ դրան և մշակեր մարտահրավերները չեզոքացնելու մեխանիզմներ։
Ըստ նրա՝ այդ մարտահրավերներին միայնակ դիմակայել Հայաստանը չի կարող, Արևմուտքը պետք է որոշակի աջակցություն ցուցաբերի՝ լինի ֆինանսական, թե ռազմական․
«Հայաստանը պետք է կարողանա վարել այնպիսի դիվանագիտություն, որ մի կողմի մարտահրավերները կարողանա չեզոքացնել մյուս կողմի աջակցությամբ»։
Ղևոնդյանի խոսքով՝ քանի դեռ Երևանը վճռական գործողություններ չի իրականացրել, մասնավորապես՝ չի սկսել ՀԱՊԿ անդամակցության դադարեցման գործընթաց, Մոսկվան գործնական քայլերի չի դիմի, կբավարարվի «փորձագետների, մեդիա ներկայացուցիչների հարձակումներով», հայտարարություններով։ Սակայն չի կարծում, թե մշտապես այդպես է լինելու։
«Ի վերջո այդ քայլերը մենք տեսնելու ենք։ Դրանք լինելու են առաջին հերթին տնտեսական՝ Վերին Լարսով անցման հետ կապված խնդիրներ, ԵԱՏՄ որոշակի գործիքների միջոցով ճնշման ավելացում և նաև ռազմական՝ Ադրբեջանի կողմից սադրանքներ սահմանին։ Դրա համար էլ ՌԴ-ն չի ուզում, որ Ալիևը գնա Եվրոպա և սադրանքների բացառման մասով ինչ-որ համաձայնությունների հասնի»,- նշել է նա։
Ռոբերտ Ղևոնդյանի խոսքով՝ ռուսական կողմի ձեռնարկելիք գործողությունների չեզոքացման համար ռազմավարության մշակումը Հայաստանի համար պետք է լիներ «ոչ թե այսօրվա, այլ երեկվա գործ»։
Հետևեք մեզ — Facebook | Youtube | Telegram
ՌԴ-ն սպառնում է Հայաստանին
