Զինված ուժերը զարգացնելու ենք ագրեսիայից պաշտպանվելու համար․ Հայաստանը տարածքներ նվաճելու մտադրություն չունի։ Այս մասին հոկտեմբերի 25-ին Ազգային ժողովում հայտարարել է Հայաստանի վարչապետը։
2022 թվականի բյուջեի նախագծի նախնական քննարկման ժամանակ Նիկոլ Փաշինյանն անդրադարձել է Հայաստանի պաշտպանական ռազմավարությանն ու խոսել երկրի պաշտպանական բյուջեի ավելացման մասին։
ԱԺ մշտական հանձնաժողովների համատեղ նիստում «ՀՀ 2022 թվականի պետական բյուջեի մասին» օրենքի նախագծի քննարկման ժամանակ գործադիրի ղեկավարն ընդգծել է, որ հաջորդ տարվա «բյուջեն կոչված է ամուր հիմքեր ստեղծելու կառավարության 5-ամյա ծրագրի իրագործման համար»։
Փաշինյանը հիշեցրել է, որ բյուջեն հիմնված է լինելու 3 առաջնահերթությունների վրա՝ անվտանգության համակարգի բարեփոխում և բարելավում, ենթակառուցվածների զարգացում, կրթության և գիտության արդիականացում։
Հայաստանի վարչապետն իր ելույթում հատուկ անդրադարձ է կատարել երկրի պաշտպանական բյուջեի ավելացմանը։ Փաշինյանի խոսքով՝ 2022 թվականի պաշտպանական բյուջեն 2021 թ․ պլանի համեմատ ավելի է 11%-ով և կազմում է ավելի քան 345 մլրդ դրամ․
«Մենք հետևողականորեն շարժվելու ենք Հայաստանում պրոֆեսիոնալ բանակ ստեղծելու ճանապարհով, բայց դա անելու ենք սահուն, մտածված քայլերով, քայլ առ քայլ մեծացնելով զինվորական ծառայության գրավչությունը, բարելավելով սպայի և սպայական ծառայության կերպարը, զարգացնելով ու բարելավելով ՀՀ պաշտպանական դոկտրինը»։
Գործադիրի ղեկավարի խոսքով՝ Հայաստանի կարևորագույն առաջնահերթությունը «անվտանգային նոր միջավայրում երկրի սահմանների պահպանությունն է»։
Ըստ վարչապետի՝ կառավարության տեսլականն է, որ ապագայում միայն սահմանապահ զորքերը ծառայություն իրականացնեն երկրի սահմաններին։
«ՀՀ տարածքից, մասնավորապես՝ Սոթք-Խոզնավար հատվածից ադրբեջանական ԶՈՒ-ի ստորաբաժումների դուրսբերման և Հայաստանի և Ադրբեջանի սահմանների դելիմիտացիայի և դեմարկացիայի գործընթացի մեկնարկը բարենպաստ պայմաններ կստեղծի նշված խնդրի լուծման համար»,- նշել է Փաշինյանը։
2022 թվականի բյուջեի քննարկման ժամանակ վարչապետն անդրադարձել է նաև Հայաստանի պաշտպանական ռազմավարությանը․
«Կառավարության ծրագրում մենք արդեն ընդգծել ենք, որ Հայաստանի Հանրապետությունը, ինչպես ցանկացած խաղաղասեր պետություն, զինված ուժերը զարգացնելու և վերափոխելու է ոչ թե ագրեսիայի, այլ ագրեսիայից պաշտպանվելու համար։ Հայաստանի Հանրապետությունը տարածքներ նվաճելու մտադրություն չունի»:
Փաշինյանի դիտարկմամբ՝ անվտանգության համակարգի զարգացման իմաստով կարևոր է ոչ միայն բանակի պաշտպանական կարողությունների արդիականացնումը, այլև բարենպաստ արտաքին միջավայրի ձևավորումը, Հայաստանի, Արցախի և տարածաշրջանի համար «խաղաղ դարաշրջան բացելու օրակարգի» հետևողական իրագործումը.
«Դա մենք տեսնում ենք մեր տարածաշրջանում թշնամանքի մթնոլորտի հաղթահարման, Լեռնային Ղարաբաղի հակամարտության կարգավորման նպատակով ԵԱՀԿ Մինսկի խմբի համանախագահության ձևաչափով բանակցային գործընթացի վերականգնման, տարածաշրջանային տնտեսական և տրանսպորտային ենթակառուցվածքների ապաշրջափակման միջոցով»։
Վարչապետի գնահատմամբ՝ տնտեսական և տրանսպորտային ենթակառուցվածքների ապաշրջափակումը կարող է որակապես փոխել ՀՀ տնտեսության բովանդակությունն ու կառուցվածքը, լրացուցիչ խթան դառնալ ներհայաստանյան ենթակառուցվածքների զարգացման համար, ինչպես նաև ապահովել երկարաժամկետ տնտեսական աճ։
Այս ամենի արդյունքում, ըստ Փաշինյանի, Հայաստանի քաղաքացիների համար կստեղծվեն հավասար պայմաններ՝ տնտեսական գործունեության մեջ ներգրավվելու համար, էականորեն կբարձրանա նաև Հայաստանի տնտեսության գրավչությունը տեղական և օտարերկրյա ներդրումների համար։
