Ադրբեջանցի նախկին նախարարի ընտանիքի մոտ անհայտ ծագման բազմամիլիոնանոց անշարժ գույք է հայտնաբերվել

Ադրբեջանի ազգային անվտանգության նախկին նախարարի երեխաները բազմամիլիոնանոց անշարժ գույք ունեն մեծ Բրիտանիայում։ Այդ մասին հայտնի է դարձել հետաքննության արդյունքում, որն անցկացրել են OCCRP–ը, Finance Uncovered–ն ու Transparency International–ը։ Ենթադրվում է, որ այդ ամբողջ հարստությունը հափշտակության և փողերի հետագա լվացման արդյունք է։

Թեև Մահմուդովների ընտանիքի փաստաբանները պնդում են, որ այդ անշարժ գույքը գնվել է ժառանգություն ստացած միջոցներով, այլ ոչ թե անձնական խնայողություններով։

Էլդար Մահմուդովը պաշտոնանկ էր արվել 2015 թ–ին ազգային անվտանգության նախարարության շուրջ սկանդալի ֆոնին, իսկ նախարարությունը լուծարվել էր։

• «Ադրբեջանում ապրելն իմ իրավունքն է»։ Լրագրող և խղճի նախկին գերի Աֆղան Մուխտարլին պատմել է ապագայի իր պլանների մասին
• Կորոնավիրուսային սկանդալ․ Հայաստանի առողջապահության նախարարությունը Վրաստանից ներողություն է խնդրել իր նախարարի խոսքերի համար

Նախկին նախարարի աղջկա և տղայի անշարժ գույքի և ակտիվների ընդհանուր արժեքը գերազանցում է $111 միլիոնը։

Դա պարզվել է այն բանից հետո, երբ 2019 թ–ի նոյեմբերին մի խումբ հաքերներ կոտրել են Կայմանյան կղզիների (Մեծ Բրիտանիայի անդրծովյան տարածք) բանկի տվյալների բազան։ Բանկի հաճախորդների թվում է եղել նաև Մահմուդովների ընտանիքը։

 Այդ գործարքների օրինականությունը մասնագետները կասկածի տակ են դրել 2016 թ–ին։

Այն ժամանակ բարձրացվում էր նաև Էլդար Մահմուդովին պատկանող Britannia Group Ltd ընկերությունների ցանցի հարցը։ Բանկը պատրաստվում էր ներքին հետաքննություն անցկացնել, սակայն արդյոք արվել է դա, թե՝ ոչ, հայտնի չէ։

Նախկինում նմանատիպ սկանդալ արդեն բռնկվել էր Էլդար Մահմուդովի որդու զոքանչ Զամիրա Հաջիևայի շուրջ, որը Լոնդոնի Harrods հանրախանութում ծախսել էր ավելի քան 16 մլն ֆունտ, որը, պարզ չէ, թե որտեղից ուներ։ 

Զամիրա Հաջիևայի ամուսին (հետևաբար՝ Մահմուդովի որդու աները) Ջահանգիր Հաջիևը գլխավորում էր Ադրբեջանի միջազգային բանկը։ 2015 թ–ին նա կալանավորվել էր պետական ունեցվածքի վատնման համար և այժմ կալանավորված է։