Հայաստանի արտգործնախարար․ «Հայաստանն ու Լեռնային Ղարաբաղն իրենց պաշտպանելու բոլոր հնարավորություններն ունեն»

Հայաստանն, ինչպես նաև Լեռնային Ղարաբաղն ինքնապաշտպանության համար բոոր հնարավորություններն ունեն։ Կա Արցախի մեր հայրենակիցների անվտանգության միայն մեկ երաշխավոր, և դա Հայաստանն է: Այս մասին Եգիպտոս կատարած իր պաշտոնական այցի ժամանակ հայտարարել է Հայաստանի արտգործնախարարը։

Կահիրեում Զոհրաբ Մնացականյանն իր տեսակետն է հայտնել նաև Հայաստանի և Ադրբեջանի հարաբերությունների, Կովկասում և Արևելյան Միջերկրականում Թուրքիայի պահվածքի, ինչպես նաև Հունաստանի և Կիպրոսի հետ կապված իրավիճակի մասին։

•Կարծիք․ ո՞վ է սրացում սադրել Հայաստանի և Ադրբեջանի սահմանին։ Արդյո՞ք դա կարող էր Ռուսաստանը լինել

•Հայաստանի ԱԳ նախարարը կոչ է արել Իսրայելին զենք չվաճառել Ադրբեջանին

Ղարաբաղի մասին․ «Այս հարցը ռազմական լուծում չունի»

Լեռնային Ղարաբաղի բնակչության ֆիզիկական անվտանգության ապահովմանը և կարգավիճակի խնդրին՝ ինքնորոշման իրավունքի ճանաչմանը և դրա իրականացմանն է ուղղված հայկական իշխանությունների ուշադրությունը և գերակայություններն, ասել է նախարարը։ 

Մնացականյանը նշել է նաև, որ հակամարտության հանգուցալուծումը հիմնված է փոխզիջումների վրա, իսկ «փոխզիջում նշանակում է, որ կողմերից յուրաքանչյուրը պետք է համապատասխան քայլեր ձեռնարկի դեպի հավասարակշռված, չափելի լուծում, որը կհասցեագրի բոլորի շահերը»։

«Չի կարող լինել «միայն իմ ճանապարհով» լուծում: Այս հակամարտությունն ունի իր առանձնահատկություները, պատմությունը, նրբությունները և կարևոր տարբերությունները: Այս շրջանակներում էլ մենք բարձր ենք գնահատում մեր բոլոր գործընկերների շատ զգուշավոր մոտեցումը բացառապես խաղաղ հանգուցալուծմանը: Այս հարցը չունի ռազմական լուծում»։

Թուրքիայի պահվածքի մասին․ «Մենք ականատես ենք լինում մեծ ռազմական ներկայության»

Զոհրաբ Մնացականյանը մեկնաբանել է Թուրքիայի դիրքորոշումը տարածաշրջանի անվտանգության կապակցությամբ։ Նրա խոսքով, Թուրքիան «միակ երկիրն էր, որը հանդես եկավ միակողմանի և շատ ագրեսիվ մոտեցմամբ» հայ–ադրբեջանական սահմանին տեղի ունեցած հուլիսյան բախումների ժամանակ․

«Իհարկե մենք ականատես ենք լինում իրենց կողմից ռազմական կուտակման փորձերի: Մենք տեղեկություններ ենք ստանում օտարերկրյա ահաբեկիչ զինյալների օգտագործման մասին, ովքեր տեղափոխվելու են Ադրբեջան կամ գուցե արդեն իսկ տեղափոխվել են: Մենք ականատես ենք լինում մեծ ռազմական ներկայության, ռազմական ամրապնդման»։

Ըստ նախարարի, սրանք հենց այն քայլերն են, որոնք խաթարում են տարածաշրջանում խաղաղության և կայունության հասնելու ջանքերը։

Լուրջ մարտահրավերները, անվտանգության  մարտահրավերներն Արևելյան Միջերկրականից ընդլայնվում են մինչև Մերձավոր Արևելք և Հյուսիսային Աֆրիկա, ինչպես նաև Հարավային Կովկաս։ Դրանք փոխկապակցված են և բնութագրվում են ապակայունացման նույն աղբյուրներով, նշել է Մնացականյանը։

Հայաստանի արտգործնախարարը նաև մեկնաբանել է Հունաստանի և Կիպրոսի հետ կապված իրավիճակը․

«Ուշադրությամբ հետևում ենք Արևելյան Միջերկրականի զարգացումներին, և մեր համերաշխությունն ենք հայտնել Հունաստանին ու Կիպրոսին իրենց բացառիկ տնտեսական գոտում տնտեսական գործունեություն ծավալելու իրենց անքակտելի իրավունքների հարցում` միջազգային իրավունքին համապատասխան: Եվ նույն ձևով ցանկանում եմ ընդգծել նաև մեր համերաշխությունն ու աջակցությունը Եգիպտոսին»։

Հունաստանի և Թուրքիայի միջև հարաբերությունների հարցն առանձնապես արդիական դարձավ այն բանից հետո, երբ Արևելյան Միջերկրականում գազի նոր հանքավայր հայտնաբերվեց։ Սա հանգեցրեց ՆԱՏՕ–ի անդամ երկրու երկրների՝ Թուրքիայի և Հունաստանի դիմակայության։ Բանն այն է, որ Թուրքիան ու Հունաստանը կարծում են, որ նոր հանքավայրը գտնվում է իրենց ինքնիշխան տնտեսական գոտուն վերաբերող տարածքում։

Կոնֆլիկտի մեջ ներգրավվում են տարածաշրջանի մյուս երկրներն, ընդ որում, Թուրքիային աջակցում է դեռևս միայն Ադրբեջանը։

Ավելի վաղ Հայաստանի ԱԳՆ–ն հայտարարություն էր արել այն մասին, որ «Արևելյան Միջերկրականում ապակայունացնող դիրքորոշումը ի ցույց է դնում հարևան տարածաշրջաններում Թուրքիայի հետևողական ագրեսիվ և զավթողական քաղաքականությունը»։