Մարտակերտում խաղաղ բնակիչ է սպանվել․ ինչպե՞ս արձագանքեցին պաշտոնական Երևանը, Բաքուն և Մոսկվան
Հոկտեմբերի 9-ին տեղեկություն ստացվեց, որ ադրբեջանական կողմի արձակած կրակոցից Արցախի Մարտակերտ քաղաքում խաղաղ բնակիչ է զոհվել։ Դեպքը տեղի էր ունեցել քաղաքի հարակից տարածքում գտնվող նռան այգում։ Ադրբեջանի զինված ուժերի դիպուկահարի կրակոցից զոհվել էր 55-ամյա Արամ Տեփնանցը։
Մարտակերտի քաղաքապետ Միքայել Գյուրջյանը «Ազատության» հետ զրույցում պատմել է, որ Տեփնանցը կրակոցների պահին մենակ չի եղել, տրակտորում են եղել նաև ռուս խաղաղապահները։
Պաշտոնական Բաքուն հերքել է տեղեկությունը, ՌԴ պաշտպանական գերատեսչությունը՝ հաստատել։ Դեպքի առթիվ ՀՀ գլխավոր դատախազությունում հարուցվել է քրեական գործ։
JAMnews-ը ներկայացնում է միջադեպի բոլոր մանրամասները։
Մարտակերտի բնակչի մահվան հանգամանքների վերաբերյալ հաղորդեցին Արցախի մի քանի գերատեսչություններ։
Արցախի ներքին գործերի նախարարության հաղորդմամբ՝ սա Ղարաբաղյան երկրորդ պատերազմից հետո առաջին դեպքն է, երբ ադրբեջանական կրակոցից քաղաքացիական անձ է զոհվում։
Նախարարության մամուլի խոսնակի խոսքով՝ հրադադարի ռեժիմն ադրբեջանական կողմը հաճախ և տարբեր ուղղություններով է խախտում, բայց մինչ օրս քաղաքացիական անձի մահվան դեպք չէր գրանցվել։
Ըստ աղբյուրի՝ սպանված Արամ Տեփնանցն իր այգում ամենօրյա գործերն անելիս է եղել, երբ ադրբեջանցի դիպուկահարը նկատել է նրան ու կրակել։
Մինչ այդ, միջադեպի մասին տեղեկություն էր հաղորդել Մարտակերտի քաղաքապետ Միքայել Գյուրջյանը՝ նշելով, որ Տեփնանցը կրակոցների պահին մենակ չի եղել, տրակտորում են եղել նաև ռուս խաղաղապահները․
«Տրակտորը վար անելիս կրակել են, Արամը տեղում մահացել է, դիակը հանել են, բերել հիվանդանոց։ Խաղաղապահներն իր մոտ նստած են են եղել՝ տրակտորի մեջ: Կասկածելի բան է եղել, գնացել են խաղաղապահները երևի, որ օգնեն, այդպես է ստացվել», — «Ազատություն» ռադիոկայանի հետ զրույցում նշել էր Գյուրջյանը։
Երևանն ու Ստեփանակերտը դատապարտում են
Հայաստանի և Արցախի արտգործնախարարությունները խստորեն դատապարտեցին Ադրբեջանի գործողությունները, որոնց արդյունքում Մարտակերտում քաղաքացիական անձ է զոհվել:
ՀՀ արտաքին գերատեսչությունն ընդգծել է, որ կատարվածը նոյեմբերի 9-ի եռակողմ հայտարարությամբ ստանձնած պարտավորությունների կոպիտ խախտում է․
«Տվյալ հանցագործությունը պետք է պատշաճ կերպով հետաքննվի, իսկ մեղավորները՝ ենթարկվեն պատասխանատվության»։
Պաշտոնական հաղորդագրությամբ հանդես եկավ նաև Արցախի արտգործնախարարությունը՝ շեշտելով, որ Ադրբեջանի նման ագրեսիվ պահվածքը և սադրիչ գործողությունները միտված են խաղաղ բնակչության շրջանում վախի մթնոլորտի ստեղծմանն ու Արցախի հայաթափմանը:
«Ադրբեջանը նաև հեռահար նպատակներ է հետապնդում․ խափանել Ռուսաստանի Դաշնության խաղաղապահ առաքելության իրականացումն ու կասկածի տակ դնել խաղաղապահների գործունեության արդյունավետությունը», — ասված է հաղորդագրությունում։
Գերատեսչությունը ԵԱՀԿ Մինսկի խմբի համանախագահ երկրներին կոչ է արել գործուն քայլեր ձեռնարկել Ադրբեջանին պատասխանատվության ենթարկելու և հետագայում նման միջադեպերը բացառելու ուղղությամբ:
Բաքուն հերքում է
Ադրբեջանի պաշտպանական գերատեսչությունը հերքեց լուրը՝ այն որակելով որպես սուտ։
«Տրակտորի վարորդի մահվան մասին տեղեկությունը, որն իբր Ադրբեջանի զինված ուժերի կողմից արձակված կրակոցների հետևանքով է մահացել, սուտ է և չի համապատասխանում իրականությանը»։
Մոսկվան հաստատում է
Հոկտեմբերի 10-ին Արցախում ռուսական խաղաղապահ առաքելության գործունեության վերաբերյալ տեղեկագրում Ռուսաստանի պաշտպանության նախարարությունն անդրադարձավ նաև Մարտակերտում տեղի ունեցած դեպքին։ Գերատեսչությունը հաստատեց․ որ քաղաքացիական անձը զոհվել է ադրբեջանցիների կրակոցից:
«Հոկտեմբերի 9-ին Մարտակերտի շրջանում՝ կողմերի շփման գծի մոտակայքում գյուղատնտեսական աշխատանքների ժամանակ ադրբեջանական կողմից գնդակոծության հետևանքով մահացու վիրավորում է ստացել Մատաղիս գյուղի խաղաղ բնակիչը», — ասված է տեղեկագրում:
Ըստ աղբյուրի՝ ռուսաստանյան զորախմբի հրամանատարությունը երկու կողմերի ներկայացուցիչների ներգրավմամբ միջադեպի քննություն է իրականացնում։
Նույն օրը ՀՀ պաշտպանության նախարարությունը հաղորդեց, որ աշխատանքային այցով Մոսկվա է մեկնում նախարար Արշակ Կարապետյանը։ Մինչ այս պահը գերատեսչությունը մանրամասներ չի հրապարակել։
Դատախազությունը հաղորդում է
Հայաստանի գլխավոր դատախազությունը նույնպես Մարտակերտի բնակչի սպանությունը որակել է որպես հրադադարի եռակողմ հայտարարության դրույթների կոպտագույն խախտում, նաև շեշտել, որ հետևողական է լինելու դեպքի օբյեկտիվ քննության հարցում։
Ըստ աղբյուրի՝ դեպքը տեղի է ունեցել ժամը 13։20-ի սահմաններում, կրակոցներն արձակվել են Մարտակերտի վարչական տարածքի վարելահողից մոտ 1 կմ հեռավորությամբ տեղակայված ադրբեջանական դիրքից: Տեփնանցը տեղում մահացել է կրծքավանդակի հատվածում ստացած վիրավորումից:
Հաշվի առնելով տեղանքի սահմանամերձ լինելը՝ նախքան գյուղատնտեսական աշխատանքները սկսելը տեղանք են ներկայացել ռուս խաղաղապահները՝ աշխատանքների անվտանգությունն ապահովելու համար։
«Ըստ նախնական տեղեկությունների՝ վարորդը սկզբում խուսափել է վարել գյուղտեխնիկան, սակայն խաղաղապահներից մեկն առաջարկել է նրա հետ անձամբ նստել խցիկում՝ որպես անվտանգության լրացուցիչ երաշխիք»,- հաղորդում է գլխավոր դատախազությունն ու հավելում, որ ականատեսների պնդմամբ՝ այդ եղանակով նրանք մի քանի պտույտ են կատարել։
Ըստ աղբյուրի՝ դեպքից հետո ոչ միայն այդ, այլև սահմանամերձ այլ հատվածներում գյուղատնտեսական աշխատանքները դադարեցվել են։
Գերատեսչության տարածած հաղորդագրությունից տեղեկանում ենք, որ դեպքի առթիվ հարուցվել է քրեական գործ, կատարվում է նախաքննություն: Դեպքի վերաբերյալ առկա տվյալները փոխանցվել են նաև Արցախում տեղակայված Ռուսատանի դատախազության ներկայացուցիչներին։
«Նրանց հետ ապահովվել է օպերատիվ և արդյունավետ համագործակցություն։ Լիարժեք պատրաստակամություն է հայտնվել ներգրավվելու դեպքի հետաքննությանը հնարավոր բոլոր ձևաչափերով», — ասված է հաղորդագրությունում։
