«Իվանիշվիլին չի թաքցնում, որ բռնապետություն է կառուցում». կարծիք
Մատե Դևիձեի դատավճիռը
Transparency International Georgia կազմակերպության ներկայացուցիչ Զվիադ Կորիձեն արձագանքել է բողոքի ակցիաների ժամանակ ձերբակալված երիտասարդ Մատե Դևիձեի համար կայացված դատավճռին և նշել, որ Իվանիշվիլին չի թաքցնում, որ ստեղծում է ատելության, բռնության և հալածման ենթարկող պետություն:
Կորիձեն նշել է, որ Բիձինա Իվանիշվիլին «իր գրպանն է դրել ողջ արդարադատության համակարգը» և կայացնելու է այն բոլոր որոշումները, որոնք կցանկանա:
21-ամյա Մատե Դևիձեն, որը մեղադրվում է ոստիկանի վրա հարձակվելու մեջ, դատավոր Նինո Գալուստաշվիլիի կողմից ճանաչվել է մեղավոր և դատապարտվել ազատազրկման 4 տարի և 6 ամիս ժամկետով:
Դևիձեին մեղադրանք է առաջադրվել քրեական օրենսգրքի 353 հոդվածի 1-ին մասով (ծառայողական պարտականությունների կատարման ժամանակ հարձակում ոստիկանի վրա), որը նախատեսում է 4-7 տարի ժամկետով ազատազրկում:
Զվիադ Կորիձե
«Ինչպե՞ս կարող էին երեք ոստիկաններ այնպես ազդեցության տակ ընկնել, որ իրենց թույլ տային ստել դատարանում: Դատախազները, որոնք ներկա են դատարանում, դատավորները, որոնք քննում են գործերը, նրանք չեն ներկայացնում արդարադատության համակարգը, նրանք անկախ մարդիկ չեն և չեն պաշտպանում անկախ պետական հաստատությունների շահերը:
Բիձինա Իվանիշվիլին ողջ արդարադատության համակարգն իր գրպանն է դրել և միայն այն որոշումներն է ընդունում, որոնք իրեն են հարկավոր: Խոսքը միայն այն հիսուն մարդկանց մասին չէ, որոնց մենք համարում ենք խղճի բանտարկյալներ: Նա այդպես է վարվելու բոլորի հետ, այդ թվում՝ այն մարդկանց, որոնք ընդհանրապես ոչ մի հանցանք չեն գործել:
«Որոնելով լույսն անվերջանալի խավարում» խոսքերով, որոնք Մատե Դևիձեն արտաբերել է դատական դահլիճը լքելուց առաջ, նա դիմել է ամբողջ հասարակությանը՝ ասելով նրանց, որ մենք մթության մեջ ենք և պետք է լույս փնտրենք՝ դրանից դուրս գալու համար:
Եթե մենք մոմ չվառենք, եթե այս ճանապարհը չշարունակենք, Վրաստանը կկորի այս դարում: Վրաստանը խավարում թողնեը Բիձինա Իվանիշվիլիի այսօրվա գլխավոր ուղերձն է: <…> Սա հենց այն դարաշրջանն է, որը կլուսավորեն Մատեն, Մզիան (Ամաղլոբելի), Անդրոն (Չիչինաձե)՝ այն մարդիկ, ովքեր այսօր տառապում են որպես քաղբանտարկյալներ»:
Հետևեք մեզ — Facebook | Youtube | Telegram
Մատե Դևիձեի դատավճիռը
