Հյուսիսային Օսիայի բնակչի ողբերգական պատմության մոտիվներով նկարահանված հոլիվուդյան ֆիլմն օս հանրության քննադատությանն է արժանացել

«Հետևանքներ» (Aftermath) նոր հոլիվուդյան ֆիլմը, որը նկարահանվել է Հյուսիսային Օսիայի քաղաքացու ողբերգական պատմության մոտիվներով, քննադատել են Մոսկվայի «Ռուսաստանն այսօր» մուլտիմեդիա մամուլի միջազգային կենտրոնում կայացած նախնական փակ ցուցադրության ժամանակ:

«Ֆիլմում իրական փաստերն ուժեղ խեղաթյուրված են: Ֆիլմի ստեղծողները նույնիսկ ոչ մի անգամ չեն կապվել Կալոևի հետ», — ասում էին լրագրողները, որոնք ներկա էին ցուցադրությանը:

Ֆիլմը պաշտոնապես էկրաններ կբարձրանա այս շաբաթ՝ ապրիլի 7-ին:

Այն նկարահանվել է Հարավային Օսիայի բնակիչ Վիտալի Կալոևի պատմության մոտիվներով, որի ընտանիքը զոհվել է Գերմանիայի Բոդենի լճի երկնքում տեղի ունեցած ավիավթարի արդյունքում 2002թ-ին: Կալոևը կորցրել է կնոջն ու դստերը և, չսպասելով արդար դատի, գտել և սպանել է ողբերգության մեղավորին՝ երկու ինքնաթիռների բախումը թույլ տված ավիադիսպետչերին:

Ֆիլմի գործողությունը տեղափոխվել է ԱՄՆ: Առնոլդ Շվարցենեգերը դրանում ընտանիքն ավիավթարի ժամանակ կորցրած և վրեժի ծարավ հոր դերն է խաղում: Դիսպետչերի դերը, որին գլխավոր հերոսը մեղադրում է իր հարազատների մահվան համար, խաղում է Սքութ Մակնեյրին:

«Շվարցենեգերի կերպարում ոչ մի կովկասյան բան չկա: Ոչ մի հետք: Խոշորացույցով էլ չես տեսնի: Ցուցադրությունից առաջ ես ուզում էի հավատալ, որ կցնցվեմ: Սակայն Շվարցենեգերը շատ-շատ վատ է խաղում: Առնոլդ Շվարցենեգերի ատիվում «Ճշմարտացի սուտ» անվամբ հայտնի ֆիլմ կա: Վիտալի Կալոևի մասին ֆիլմը, ցավոք, նույնպես կարող էր այդպես անվանվել», — ասել է լրագրող Լև Ռիժկովը կինոդիտումից հետո:

Ֆիլմի՝ փետրվարի 8-ին դուրս եկած պաշտոնական թրեյլերի անոտացիայում ասվում էր, որ այն չի հավակնում իրականության վերստեղծմանը և նկարահանվել է իրական պատմության հիման վրա: «Երկու անծանոթ անխզելի կերպով կապված են միմյանց աղետալի ավիավթարից հետո», — ասվում էր թրեյլերի անոտացիայում:

Այդ թեմայով արտահայտվել է նաև գրող և լրագրող Քսենիա Կասպարին՝ «Բախում» փաստագրական վեպի հեղինակը, որը պատմում է Վիտալի Կալոևի պատմությունը: Վեպը վաճառքում կհայտնվի ապրիլի կեսերին:

«Գիրքը գրվել է Վիտալի Կալոևի անմիջական մասնակցությամբ: Նա առաջիններից մեկն է եղել, որը կարդացել է ձեռագիրը և հաստատել է դա: Ես շատ շնորհակալ եմ նրան վստահության և անկեղծության համար: Ես նաև հավաքել եմ այն մարդկանց հիշողությունները, որոնք նրա հետ են եղել ավիավթարից հետո և ավիադիսպետչերի սպանության գործով քննության ժամանակ: Հետազոտել եմ ավիավթարի տոնաներով փաստթղթեր, Կալոևի հարցաքննության արձանագրություններն ու այդ գործով վկաների ցուցմունքները: Դա մեծ ու բարդ աշխատանք էր, և ես շատ ուրախ եմ, որ կարողացա այն ավարտին հասցնել», — գրել է Կասպարին Ֆեյսբուքում:

• 2002թ-ի հուլիսի 1-ին «Բաշկիրիայի ավիաուղիներ» ռուսական ավիաընկերության ինքնաթիռը, որով Մոսկվայից Բարսելոն հանգստանալու էին թռչում երեխաներ, բախվել է DHL ընկերության բեռնատար ինքնաթիռին: Ինքնաթիռում եղած բոլոր ուղևորներն, այդ թվում՝ Կալոևի կինն ու երկու երեխաները, զոհվել են: Ավելի ուշ հետաքննությունն աղետի պատասխանատվությունը դրել է շվեյցարականSkyguide ընկերության վրա:

• 2004թ-ի փետրվարի 24-ին ավիադիսպետչեր Փիթեր Նիլսենը, որն աղետի պահին հերթապահություն էր իրականացնում Skyguide-ի դիսպետչերների սենյակում, սպանվել է Շվեյցարիայում իր տան շեմին: Սպանության կասկածով կալանավորվել է Վիտալի Կալոևը: Վերջինս հայտարարել է, որ նա Նիլսենին ցույց է տվել իր երեխաների նկարները և ցանկացել է, որ նա ներողություն խնդրի իրենից: Սակայն Նիլսենը հարվածել է Կալոևի ձեռքին և գցել նկարները: Վիտալի Կալոևի խոսքով՝ նա չի հիշում, թե ինչ է տեղի ունեցել դրանից հետո: 2005թ-ին շվեյցարական դատարանը Կալոևին մեղավոր է ճանաչել սպանության համար և դատապարտել 8 տարվա ազատազրկման:

• 2007թ-ի նոյեմբերին Վիտալի Կալոևը վաղաժամ ազատ է արձակվել և վերադարձել Ռուսաստան: Երբ Օսիա է մեկնել, նրան խանդավառությամբ են դիմավորել հայրենակիցները: 2008թ-ին Կալոևը նշանակվել է Հյուսիսային Օսիայի շինարարության և ճարտարապետության փոխնախարար:

Հոդվածում հնչած կարծիքներն արտահայտում են հեղինակի տերմինաբանությունն ու հայացքները և պարտադիր չէ, որ համընկնեն խմբագրության կարծիքի հետ