«Լրջագույն զինատեսակներ Ֆրանսիան չի տա, բայց կհամագործակցի»․ հայ վերլուծաբան
ՀՀ պաշտպանության նախարարը Ֆրանսիայում
Հունիսի 18-ից աշխատանքային այցով Ֆրանսիայում է Հայաստանի պաշտպանության նախարարը։ Գերատեսչությունը չի հաղորդել՝ որքան է տևելու այցն ու ինչ օրակարգով է մեկնել Սուրեն Պապիկյանը։ Պարբերաբար տեղեկություններ են հրապարակվում ֆրանսիացի տարբեր պաշտոնյաների հետ նախարարի հանդիպումների մասին։
Հայաստանյան փորձագետները չեն բացառում Երևանի ու Փարիզի միջև սպառազինության առուվաճառքի շուրջ ուղիղ բանակցությունների հնարավորությունը։ Քաղաքական վերլուծաբան Հովսեփ Խուրշուդյանը հիշեցնում է՝ Ֆրանսիան ՆԱՏՕ անդամ երկիր է, և հասկանալի է, որ ՀԱՊԿ անդամ Հայաստանին «լրջագույն զինատեսակներ չեն մատակարարվի»։
Ապրիլի վերջին աշխատանքային այցով Երևանում էր Ֆրանսիայի ԱԳ նախարար Կատրին Կոլոնան։ Նա հայտարարեց, որ երկկողմ համագործակցությունը ամրապնդվում է նաև անվտանգային ոլորտում։ Հայտնի դարձավ ՀՀ-ում Ֆրանսիայի դեսպանատանը ռազմական կցորդ նշանակելու մասին։
Պաշտպանության նախարարի այցի մանրամասները, փորձագիտական կարծիք
Ի՞նչ է հաղորդվել նախարարի այցի մասին
Հունիսի 18-ին Հայաստանի պաշտպանական գերատեսչությունը հաղորդեց, որ նախարար Սուրեն Պապիկյանի գլխավորած պատվիրակությունն աշխատանքային այցով մեկնել է Ֆրանսիա։ Ավելի ուշ հայտնի դարձավ, որ Պապիկյանը Փարիզ է մեկնել Ֆրանսիայի զինված ուժերի նախարար Սեբաստիեն Լըկորնյուի հրավերով։
Այցի շրջանակում նա մասնակցել է «Փարիզի ավիացիոն ցուցահանդեսի» բացման արարողությանը, այցելել ռազմարդյունաբերական տաղավարներ: Եղել է նաև Ֆրանսիական դիմադրության շարժման մասնակիցների հիշատակը հավերժացնող Մոն-Վալերիանի հուշահամալիրում։ ՊՆ ղեկավարը հանդիպումներ է ունեցելՖրանսիայի զինված ուժերի նախարար Սեբաստիեն Լըկորնյուի, Սենատի արտաքին հարաբերությունների, պաշտպանության և զինված ուժերի հանձնաժողովի նախագահ Քրիստիան Կամբոնի հետ:
Պաշտոնական Երևանը հաղորդում է, որ այդ հանդիպումների ընթացքում քննարկվել են՝
- պաշտպանության բնագավառում հայ-ֆրանսիական համագործակցությունը,
- տարածաշրջանային անվտանգությանն առնչվող հարցեր,
- 2022 թ. սեպտեմբերի 27-ին Փարիզում կայացած հանդիպման ժամանակ ձեռք բերված պայմանավորվածությունների իրականացման ներկայիս ընթացքը։
Սուրեն Պապիկյանը վարչապետի ղեկավարած պատվիրակության կազմում Ֆրանսիա էր այցելել 2022 թվականի սեպտեմբերյան մարտական գործողություններից հետո, այդ ժամանակ ևս նա հանդիպել էր Ֆրանսիայի զինված ուժերի նախարարին։ ՊՆ հաղորդագրության համաձայն՝ պայմանավորվածություն էր ձեռք բերվել, որ «իրավիճակին տեղում ծանոթանալու նպատակով Ֆրանսիայի պաշտպանական գերատեսչությունը հատուկ պատվիրակություն կուղարկի Հայաստան»։
Սեբաստիեն Լըկորնյուն վերահաստատել էր խնդրի առնչությամբ Ֆրանսիայի պետական դիրքորոշումը, «այն է՝ ադրբեջանական զորքերը պետք է դուրս բերվեն Հայաստանի Հանրապետության տարածքից»։
Փորձագիտական կարծիք
Քաղաքական վերլուծաբան Հովսեփ Խուրշուդյանի խոսքով՝ Հայաստանի պաշտպանության նախարարի այցը Ֆրանսիա նշանակում է, որ երկկողմ համագործակցությունը խորանում է։ Վստահ է՝ կլինեն նաև բանակցություններ՝ կապված զենքի մատակարարումների հետ։
Թեև Հայաստանն ու Ֆրանսիան տարբեր ռազմական դաշինքներում են ներգրավված, սակայն ըստ նրա՝ փոխգործակցությունը կարող է արդյունքներ տալ։ Factor TV-ի եթերում Խուրշուդյանը օրինակ է բերել Ղազախստան-Թուրքիա համագործակցությունը․
«ՀԱՊԿ անդամ Ղազախստանը Թուրքիայից լրջագույն սպառազինություններ ստացել է, նույն բայրաքթար կոչվածները։ Չեմ ասի՝ լավագույն անօդաչու ավիացիան է, մանավանդ Ուկրաինայում տեսանք, որ եթե դրա դիմաց ճիշտ համակարգ է աշխատում, այդ բայրաքթարները շատ հեշտ չեզոքացվում են։ Համենայն դեպս, արևմտյան լուրջ տեխնոլոգիաներ կան դրա մեջ։ Եթե դա տալիս են Ղազախստանին, ուրեմն նման արգելք չկա»։
Վերլուծաբանի գնահատմամբ՝ Ֆրանսիան հզոր ռազմարդյունաբերություն ունի, արտադրում է շատ որակյալ զենքեր։
«Այսօր ֆրանսիական զենքերով մեծ հաջողությունների են հասնում ուկրաինացիները։ Խոսքը ֆրանսիական հրետանու մասին է, բայց Ֆրանսիան ունի նաև փայլուն ավիացիա»,- նկատել է նա։
Խուրշուդյանն ասել է՝ Ռուսաստանից զենք ստանալու հույս չկա, բացի այդ՝ հայկական կողմին այդ զենքը պետք էլ չէ։
«Ռուսական զենքը նաև կախածություն է այդ երկրից, որն ակնհայտ ՀՀ ինքնիշխանության ոչնչացման և իրեն կցելու նկրտումներ ունի»,- հայտարարել է նա։
Ռուսաստանին միլիոնավոր դոլարներ վճարելու, բայց այդպես էլ զենք չստանալու մասին բարձրաձայնել էր Հայաստանի վարչապետը՝ առանց մատնանշելու, թե որ դաշնակցի մասին է խոսքը։ Ավելի ուշ պարզ դարձավ, որ այդ գործընկերը Ռուսաստանն է։ Մինչ օրս վարչապետ Փաշինյանը կամ որևէ այլ պաշտոնյա չի հստակեցրել՝ ի՞նչ է արվում չմատակարարված զենքը ստանալու ուղղությամբ, արդյո՞ք ընթանում են իրավական գործընթացներ, նախատեսվո՞ւմ է արդյոք վճարված գումարի հետվերադարձ։
Հետևեք մեզ — Facebook | Youtube | Telegram
ՀՀ պաշտպանության նախարարը Ֆրանսիայում
