Հայաստանում քննարկում են օմբուդսմեն ստեղծելու գաղափարը

Հայաստանում ակտիվորեն քննարկվում է բիզնես օմբուդսմեն ստեղծելու գաղափարը: Հեղինակների խոսքով՝ դրա հիմնական նպատակը բիզնես շրջանակների շահերը պաշտպանելն ու նրանց ոտնահարված իրավունքները վերականգնելն է:

Մինչ փորձագիտական ու քաղաքական շրջանակները քննարկում էին հարցը, ՀՀ արդարադատության նախարարի տեղակալ Սուրեն Քրմոյանն այսօր հայտնել է, որ «Գործարարների շահերի պաշտպանի մասին» նախագիծը պատրաստ է և ներկայացվում է հանրային լայն քննարկման: Դրանից հետո այն ներկայացվելու է նաև խորհրդարանական քննարկման՝ լրամշակված, փոփոխված տարբերակով:

Քրմոյանն ասել է, որ բիզնես օմբուդսմենի առաջ դրվող խնդիրներից մեկը՝ գործարարների գործունեության ընթացքում առաջացող խնդիրներին արագ արձագանքելն է, գործարարների շահերը ներկայացնելն ու դրանց պաշտպանությունը: Բացի այդ, ըստ արդարադատության փոխնախարարի, բիզնես օմբուդսմենի շնորհիվ հնարավոր կլինի խթանել ներդրումները, օժանդակել բիզնեսին, բարելավել գործարար միջավայրը և այլն:

Բիզնես օմբուդսմենի գաղափարին առաջիններից մեկը դեմ է արտահայտվել Մարդու իրավունքների պաշտպանը: Նա հայտարարել է, որ նախընտրելի է զարգացնել գործող ինստիտուտը՝ իր ղեկավարած Մարդու իրավունքների պաշտպանի գրասենյակը, քան նոր ինստիտուտ ստեղծել: Ըստ Արման Թաթոյանի՝ բիզնես օմբուդսմենը կատարելու է ըստ էության իր գործառույթը. «Հակառակ դեպքում այդ անձը նաև կարող է ինձ դիմել, կլինի դուբլիկացիա, որը խոչընդոտելու է գործին: Ես դեմ եմ»:

Տնտեսագետ, Ազգային ժողովի ընդդիմադիր փոխնախագահ Միքայել Մելքումյանն էլ ասել է, որ բիզնես օմբուդսմեն ունենալու անհրաժեշտությունը կա, որովհետև հարկավոր է պաշտպանել հատկապես փոքր ու միջին բիզնեսի շահերը. «80 հազար ձեռնարկատերերի իրավունքները պետք է պաշտպանված լինեն, տեղ չկա, որ դիմեն»:

Ֆեյսբուքյան օգտատերերը դեռևս չեն հասցրել ակտիվ քննարկել հարցը, բայց մի քանի գրառում արդեն արվել է.

«Իսկ աշխատողների շահերի պաշտպանի ինստիտուտ չե՞ք ուզում հիմնել, դա պակաս կարևոր հարց է՞: Այսօր Հայաստանում գործատուներն ինչ ուզում են անում են, իսկ աշխատողները պաշտպանված չեն նրանց քմահաճույքներից»

«Բիզնես օմբուդսմեն… Իսկ ո՞վ է պաշտպանելու նրա շահերը»:

«Տեսնես՝ ո՞ւմ համար է ստեղծվում էս պաշտոնը»: