Հայաստանում ՀՆԱ ցուցանիշն աճել է 7,5 տոկոսով. տնտեսագետները կասկածներ ունեն, որ թիվը չափազանցված է

Լուսանկարը՝ Գևորգ Ղազարյան, JAMnews

Նախորդ տարի Հայաստանում Համախառն ներքին արդյունքի աճ է գրանցվել: 2016թ.-ի համեմատ ՀՆԱ ցուցանիշն աճել է 7.5 %-ով:

ՀՆԱ հավելաճի տեմպը, պաշտոնական վիճակագրության համաձայն, ամենաբարձրն է վերջին տասնամյակի ընթացքում:

Որոշ տնտեսագետներ, սակայն, չեն հավատում այս թվերին և կարծում են, որ նախ պետք է պարզել, թե ինչ մեթոդաբանությամբ է այն հաշվարկվել:

JAMnews-ի հետ զրույցում տնտեսագետ, պատգամավոր Սերգեյ Բագրատյանն ասել է, որ աճը փաստող ցուցանիշը կարող է «չափազանցված» լինել: Ամեն դեպքում, պատգամավորը ասել է, որ եթե պաշտոնական վիճակագրությունը իրականություն է և ՀՆԱ-ը 7,5 տոկոսանոց աճ է գրանցել, քաղաքացիները ավելի լավ կարող են ապրել:

Տնտեսագետը շեշտեց՝ 7,5 տոկոսով ՀՆԱ աճի շնորհիվ կարելի է սոցիալական մի շարք խնդիրներ լուծել:

«ՀՆԱ աճը պետք է ուղեկցվի թոշակների, աշխատավարձերի բարձրացմամբ, ծառայությունների մատուցման գների նվազեցմամբ: ՀՆԱ աճի արդյունքում գումար է ավելացել, որը կառավարությունը կարող է բաշխել թե՛ մեկ, թե՛ մի քանի ոլորտների ըստ իր հայեցողության: 7 տոկոս ՀՆԱ աճը նշանակում է 100 միլիարդ դրամ:

Այս գումարը կարելի է ամբողջությամբ ուղղել թոշակների բարձրացմանը, այդ դեպքում դրանք կարող են 25.000 դրամով բարձրացվել: Եվ կամ կարելի է 2500 դրամով բարձրացնել թոշակները, իսկ մնացած գումարն ուղել ծառայությունների էժանացմանը, ուսման վարձերի գների մեղմացմանը և այլն»,— ասել է Սերգեյ Բագրատյանը:

Հայաստանի տնտեսական զարգացման և ներդրումների նախարար Սուրեն Կարայանն էլ շտապել է հայտարարել, որ ՀՆԱ աճը կառավարության ձեռքբերումն է: Դրա հիմքում, նախարարի փոխանցմամբ, հիմնականում արդյունաբերության և ծառայությունների ոլորտներում գրանցված հաջողություններն են.

«0,6 %-ով էլ աճել է շինարարությունը: Աճել է արդյունաբերությունը: Հատկանշանական է, որ արդյունաբերության աճի մեջ մեծ տեսակարար կշիռը դա մշակվող արդյունաբերությանն է: Եթե արդյունաբերության թողարկումը 2017թ.-ին աճել է 12,6 տոկոսով, ապա մշակվող արդյունաբերության աճը եղել է 15,7 %: Միաժամանակ, մենք աճ ենք ունեցել առևտրի և ծառայությունների ոլորտում: Հանքարդյունաբերության ոլորտում ևս աճ կա` 2,6%»: