Հայաստանում «հեղափոխական» շաբաթօրյակին առաջին անգամ մասնակցում են նաև պաշտոնյաները
Վարչապետը դեռ մեկ ամիս առաջ հայտարարել էր մարտի 23-ին կայանալիք «հեղափոխական մասշտաբի» շաբաթօրյակի մասին և վերջերս կայացած իր մամուլի ասուլիսի ընթացքում կրկին կոչ արեց երկրի բոլոր բնակիչներին դուրս գալ մաքրության։
Նա ընտանիքի հետ միասին մասնակցում է Երևանում կատարվող մաքրությանը։ Սակայն տեղյակ չի պահում լրագողներին իր տեղաշարժերի մասին, որպեսզի կարողանա աշխատել, ոչ թե հարցազրույցներ տալ։
Կառավարության անդամների ու պատգամավորների մի մասն էլ է այս անգամ ժողովրդի հետ մասնակցում «հեղափոխական» շաբաթօրյակին։
Երևանի բոլոր համայքների բնակիչները վաղ առավոտից մաքրում են իրենց բակերն ու շրջակա տարածքները։
Շրջակա միջավայրը աղբից մաքրելու նախաձեռնության կազմակերպիչը ՀՀ տարածքային կառավարման և զարգացման նախարարությունն է։ Այն իրականացվում է «Մաքուր Հայաստան» ծրագրի շրջանակում։
Աղբակույտերից մաքրվում են պատմամշակութային հուշարձանները, հատուկ պահպանվող տարածքներն ու զբոսայգիները, միջհամայնքային ճանապարհներն ու բնակավայրերի հարակից տարածքները:
Մայրաքաղաքում աշխատանքները շատ վայրերում իրականացվում էին ուրախ մթնոլորտում՝ օրինակ, երեխաների երգերի ուղեկցությամբ։
