Հայաստանում ծառահատումների համար նախկին պաշտոնյաներ են ձերբակալվել

Լուսանկարը՝ Գոռ Այզակ Հովհաննիսյանի

Հայաստանում ծառահատումների դեմ սկսված պայքարի շրջանակում հարուցվել է քրեական գործ, ձերբակալվել են ՀՀ բնապահպանության նախարարության պետական տեսչության նախկին պաշտոնյաներ, կազմակերպությունների ներկայացուցիչներ, ովքեր կաշառք են վերցրել՝ ապօրինի ծառահատումների ծավալները չարձանագրելու և պատճառված վնասը նվազեցնելու համար:

Վերջին մեկ տարում ապօրինի ծառահատումների մեծ մասը կատարվել է Լոռու մարզում: Մարզի դատախազ Արսեն Մարտիրոսյանի խոսքով՝ միայն այս տարի արձանագրվել է ապօրինի ծառահատման 86 դեպք, որից 69-ով քրեական գործ է հարուցել: Բոլոր դեպքերով պետությանը պատճառված վնասի չափը կազմել է շուրջ 45 մլն դրամ:

«Յուրաքանչյուր ապօրինի անտառահատման փաստով պետք է քննության առարկա դարձվի պատասխանատու անձանց գործողությունների իրավաչափությունը` անտառապահ, անտառապետ, ինժեներ, տնօրենի տեղակալ ու տնօրեն, ինչպես նաև բնապահպանության տեսչության համապատասխան աշխատակիցների վարքագիծը, որոնց գործողություններում կհայտնաբերվեն խախտումներ»,- նշել է Արսեն Մարտիրոսյանը:

Բնապահպանները դրական են համարում, որ նման գործընթացը է սկսվել, բայց կարծում են, որ սա բավարար չէ անտառահատումների դեմ պայքարելու համար:

JAMnews-ի հետ զրույցում բնապահպան Ապրես Զոհրաբյանն ասաց, որ ձերբակալությունները անհրաժեշտ են ծառահատումները կանխելու համար, բայց կոսմետիկ բնույթ են կրում, որովհետև չեն պատժվում նրանք, ովքեր իրապես պատասխանատու են բարձիթողի վիճակի համար:

«Տարիներ շարունակ ոմանք անտառները հատել են, մեկ օրում հնարավոր չէ պայքարել նրանց դեմ, որովհետև այդ միջոցներով իրենց ընտանիքն են պահում: Այս ամենի թիվ մեկ պատասխանատուն երկրի նախագահն է, բայց ինքն իրեն չի ձերբակալելու»,- ասում է Ապրես Զոհրաբյանը:

Բնապահպանի խոսքով՝ ծառերը կտրվում են թե՛ դրանք վառելու ու տաքանալու, թե՛ վաճառելու ու դրանց մշակմամբ գույք պատրաստելու նպատակներով:

«Սա մեծ բիզնես է, որտեղ գյուղացիները չեն մտնում: Մեկ-երկու անգամ գյուղացին կարող է կտրել, որ տաքանա, բայց բիզնեսը տեղական ու բոլոր տեսակի իշխանությունների ձեռքերում է, և շահեկան բիզնես է, որովհետև ծառերը թանկ արժեն»,- ասում է բնապահպանը:

Բնապահպանության նախարար Արծվիկ Մինասյանը հավաստիացրել է, որ նրանք, ովքեր քաջալերում են, օժանդակում են ապօրինի ծառահատումները, պետք է ենթարկվեն պատասխանատվության՝ լինի դա պաշտոնատար, թե հասարակության մեջ որոշակի դերակատարություն ունեցող անձ:

«Որևէ մեկը չի սահմանափակել մարդու տաքանալու իրավունքը, բայց ապօրինությունների միջոցով կուտակել եկամուտներ, փորձել այն դարձնել կյանքի նորմ չի կարելի: Նման  բացահայտումները շարունակվելու են: Մարդիկ պետք է հասկանան, որ բնական ռեսուրսը հանրային սեփականություն է: Եթե մեկն ասում է, որ անտառը կարող ենք ավերել, կտրել, փրթել, մենք պետք է կանգնենք ու ասենք՝ ոչ, անտառը բոլորինն է»,- նշել է նախարարը: