Հայաստանում սկսել է աշխատել ձեռնարկությունների մի մասը, որոնք կանգնեցվել էին կորոնավիրուսի պատճառով

Հայաստանում արտակարգ դրության ժամանակահատվածում գործող պարետատունը գործունեության ոլորտների սահմանափակման մասնակի մեղմացման է գնացել։ Սահմանափակումները հրահանգվել էին մեկ ամիս առաջ, երբ կորոնավիրուսի համաճարակի պատճառով արտակարգ դրություն հայտարարվեց։

Հայաստանում մեկ ամսով արտակարգ դրություն էր հայտարարվել մարտի 16–ից։ Միաժամանակ հայտարարվել էր գործունեության բոլոր ոլորտների սահմանափակում՝ բացառությամբ կենսական և ռազմավարական նշանակության գործունեության։ Այժմ արտակարգ դրության ռեժիմը երկարաձգվել է մինչև մայիսի 14–ը։ Ձեռնարկությունների մի մասն աշխատանքի վերադառնալու հնարավորություն է ստացել։ Սակայն հանրային տրանսպորտն ու մետրոն դեռ կանգնած են։ Շաունակում են աշխատել մթերային խանութներն ու դեղատները։

• Առցանց օպերաներ, համերգներ և բժիշկների պարեր։ Ինչպե՞ս են զվարճանում Հայաստանի բնակիչները կարանտինի օրերին
• «Հենց դուրս եկա, առաջին հերթին կնոջս եմ համբուրելու»․ կարանտինային յոթ պատմություն Վրաստանից

Ովքե՞ր կարող են աշխատել

Աշխատանքը վերսկսել են վերամշակող արդյունաբերության ձեռնարկությունները։ Թույլատրված է ծխախոտային արտադրանքի, ցեմենտի, գիպսի, կրի, մետաղական կոնստրուկցիաների արտադրությունը, գործարկվել են նաև ձեռնարկությունները, որոնք դետալներ են մատակարարում դրանք հավաքելու համար։

Ժամանակավորապես արգելված գործունեության ցանկից գրեթե ամբողջությամբ դուրս է եկել շինարարության ոլորտը։ Դեռևս թույլատրված չէ միայն շինարարական աշխատանքների ավարտական փուլը։

Թույլատրվել է նաև ճարտարագիտական գործունեությունը և դրա հետ կապված տեխնիկական խորհրդատվությունները։

Աշխատանքի անցնելու թույլտվությանը զուգահեռ Հայաստանի վարչապետ Նիկոլ Փաշինյանը կոչ է արել բոլոր ձեռնարկությունների ղեկավարներին ուժեղացնել սանիտարական վերահսկողությունը․

«Այս փուլում ես առանձնահատուկ կարևորություն եմ տալիս գործատուների պատասխանատվությանը, թե ինչքանով են նրանք ապահովում պայմաններ իրենց իսկ ընկերությունների աշխատողների վարակման  հնարավորությունները նվազագույնի հասցնելու համար։ Ես ուզում եմ ևս մեկ անգամ մեր բոլոր գործատուներին կոչ անել, խնդրել, որ նրանք ձեռնարկեն առանձնահատուկ հակահամաճարակային միջոցառումներ, որպեսզի մենք կարողանանք վերջին օրերին նկատված դրական դինամիկան ոչ միայն պահպանել, այլև զարգացնել, որ համավարակի գագաթնակետը մեզ համար լինի թիկունքում և ոչ թե առջևում»:

Պարետատունը բոլոր ձեռնարկություններին խորհրդատվություն կտրամադրի, թե ինչպես ավելի լավ կազմակերպել աշխատանքը՝ վարակի տարածման նվազագույն ռիսկերով։

Խորհրդարանում առաջարկում էին ընդլայնել ցանկը

Բիզնեսի որոշ ոլորտների աշխատանքի թույլտվության հարցը քննարկվում էր ոչ միայն կառավարությունում, այլև խորհրդարանում։

Ընդդիմադիր խմբակցություններից մեկն առաջարկում էր զգալիորեն ընդլայնել գործունեության թույլատրված ոլորտների ցանկը։ «Լուսավոր Հայաստան» խմբակցության ղեկավար Էդմոն Մարուքյանը, մասնավորապես, առաջարկում էր վերսկսել հանրային տրանսպորտի և մետրոյի, տնտեսական, ինչպես նաև մարզական պարագաների վաճառքի խանութների աշխատանքը։

Նա առաջարկում էր նաև վերականգնել միջքաղաքային տրանսպորտի, տեխսպասարկան և մեքենաների մաքսազերծման կետերի աշխատանքը։

 «Մենք պետք է աստիճանաբար, փուլ առ փուլ հնարավորություն տանք այդ ոլոտներին աշխատելու։ Եվ սահմանափակումները պետք է տրամաբանական լինեն»։

Սակայն պատգամավորների մեծ մասը դեմ էր այս առաջարկներին։

Ի՞նչ են գրում սոցցանցերում

Սոցցանցերի օգտատերերը պարետատան որոշումը ոչ միանշանակ ընդունեցին։ Քաղաքացիների մի մասը կարծում է, որ սահմանափակումների մեղմումը կարող է հանգեցնել վարակի տարածման երկրորդ ալիքի և սպառնալիքի տակ է դնում մարդկանց կյանքերը․

«Այսքան դիմացել էինք, մի շաբաթ էլ կդիմանայինք։ Թե չէ ամեն ինչ կարող է նորից կրկնվել»։

Մյուս մասը կարծում է, որ սահմանափակումները հազարավոր մարդկանց համար ֆինանսական դժվարություններ են ստեղծում, և դրանք հնարավորինս պետք է չեղարկել։

«Ոչ մի աղետ չի լինի։ Բոլոր սահմանափակումները պետք է տրամաբանական լինեն։ Իշխանությունը պարզապես հեծնել է ժողովրդին։ Մինչև ե՞րբ»։