Հայաստանի նախագահը Նյու Յորքում «Արևելք-Արևմուտք» ինստիտուտի հեղինակավոր մրցանակին է արժանացել

Հայաստանի նախագահ Արմեն Սարգսյանը Նյու Յորքում արժանացել է «Արևելք-Արևմուտք» ինստիտուտի մրցանակին: Նրան՝ որպես պետական գործչի հանձնել են ինստիտուտի համահիմնադիր, ամերիկացի դիվանագետ Ջոն Էդվին Մրոզի անվան մրցանակ: Այն ստանում են «լիդերության և նախաձեռնողականության» համար:

Ինչո՞վ է աչքի ընկել Հայաստանի նախագահը

Մրցանակը տրվել է Արմեն Սարգսյանին «որպես պետական գործիչ նրա երկարամյա կարիերայի և արձանագրած նվաճումների, ինչպես նաև համաշխարհային զարգացմանն ուղղված նրա նշանակալի ներդրումների համար»: «Արևելք-Արևմուտք» ինստիտուտի Տնօրենների խորհրդի նախագահ Ռոս Փերոթը  հանդիսավոր արարողությանն ունեցած իր ելույթի ժամանակ ասել է.

«Այնպիսի ժամանակներում, երբ Հայաստանն ապրում է փոփոխությունների շրջան, Սարգսյանին վստահվեց կայունության հաստատումն ու իր երկրի համար նոր տեսլականի առաջարկումը, որը վստահ ենք կտանի դեպի ավելի ժողովրդավար ու բարգավաճ ապագա:

Արևելք-Արևմուտք ինստիտուտը շարունակում է հանձնառու լինել նորարարական ու ստեղծարար լուծումների զարգացմանը՝ կարգավորելու մեր օրերի խնդիրներն ու նախապատրաստվելու ապագայի մարտահրավերներին: Այնպիսի անհատները, ինչպիսին Սարգսյանն է, հնարավոր են դարձնում մեր ջանքերը»:

Նախագահ Սարգսյանը շնորհակալություն է հայտնել համաշխարհային «մտքի կենտրոններից» (think tank) մեկի հեղինակավոր մրցանակի համար.

«21-րդ դարն այն ժամանակաշրջանն է, երբ ամեն բան արվելու է և ղեկավարվելու է նոր գաղափարների, նոր հետազոտությունների միջոցով, նրանց կողմից, ովքեր արագ են, երիտասարդ՝ անկախ տարիքից, եռանդուն: Սա է լինելու 21-րդ դարը, քաղաքականությունն այլ կերպ է իրականացվելու: Ես իսկապես հավատում եմ, որ 21-րդ դարը Հայաստանի դարն է, հետևաբար, կարծում եմ, որ մենք հաղթանակած ենք լինելու: Ուրախ եմ հայ ազգի մասը լինել… Այս հրաշալի մրցանակն ինձ կհիշեցնի, որ դեռևս շատ անելիքներ կան… Ես պարտականություն ունեմ ծառայելու իմ ժողովրդին ու իմ երկրին՝ մի երկրի, որը 21-րդ դարում լինելու է աշխարհի առաջատարներից մեկը»:

«Արևելք-Արևմուտք» ինստիտուտի մրցանակի են արժանացել նաև անցյալի հայտնի քաղաքական գործիչներ ԱՄՆ նախագահ Ջորջ Բուշն, ԱՄՆ պետքարտուղար Հենրի Քիսինջերը, Չեխիայի նախագահ Վացլավ Հավելը, Գերմանիայի կանցլեր Հելմուտ Քոլը:

Ի՞նչ է սպասվում Արմեն Սարգսյանին Նյու Յորքից վերադառնալուց հետո

Արմեն Սարգսյանի այցը Նյու Յորք համընկավ Հայաստանում քաղաքական ճգնաժամի մեկնարկի հետ: Խորհրդարանը փոփոխություններ մտցրեց «Ազգային ժողովի կանոնակարգի մասին» օրենքում, որը կդժվարացնի վաղաժամ խորհրդարանական ընտրությունների անցկացումը: Սակայն շուտափույթ արտահերթ ընտրություններն այն կետն են, որ պնդում է Նիկոլ Փաշինյանը:

Արտահերթ խորհրդարանական ընտրություններ անցկացնելու անհրաժեշտությունը բացատրվում է նրանով, որ խորհրդարանի ներկայիս կազմը չի արտացոլում քաղաքական ուժերի իրական հարաբերակցությունը, լեգիտիմ չէ և չի արտահայտում ժողովրդի կամքը:

Կայքում կարդացե նաև. Թե ինչպես նախկին իշխող կուսակցությունը փորձեց պահպանել խորհրդարանի հանդեպ վերահսկողությունն ու արահերթ ընտրություններ թույլ չտալ

Վարչապետն, ինչպես Հայաստանում տեղի ունեցած գարնանային հեղափոխության օրերին, կրկին փողոց դուրս բերեց տասնյակ հազարավոր կողմնակիցների և գնաց բանակցելու նախկին իշխող Հանրապետական կուսակցության պատգամավորների հետ: Քանի որ հենց նրանք էին կազմակերպել փոփոխությունների հաստատումը, որոնք արգելափակում են արտահերթ ընտրություններ անցկացնելու հնարավորությունը:

Բանակցություններից հետո վարչապետը բազմահազարանոց ցույցի մասնակիցներին հաղորդեց, որ բանավոր պայմանավորվածություն է ձեռք բերվել. նախորդ իշխանություններն ու նրանց ներկայիս կողմանկիցները չեն ձախողի ընտրությունների անցկացումը: Սակայն ՀՀԿ ներկայացուցիչները հենց հաջորդ օրը հաղորդեցին, որ ոչ մի պայմանավորվածություն չի եղել:

Կայքում կարդացեք նաև. Հայաստանում քաղաքական ճգնաժամի պատճառները և դրանից ելք գտնելու ուղիները

Ստեղծվել է մի իրավիճակ, երբ ընտրությունների ճակատագիրը նախագահ Արմեն Սարգսյանի ձեռքերում է: Նա կարող է ստորագրել օրինագիծը, և այն ուժի մեջ կմտնի: Ինչից էլ կօգտվեն խորհրդարանական ուժերը, որոնք օրենսդրական փոփոխություններ են արել իրենց մանդատները պահպանելու համար:

Սակայն Հայաստանում այժմ ակտիվորեն քննարկվում է նախագահի մեկ այլ հնարավոր քայլ: Նա կարող է մերժել օրինագիծը և ուղարկել Սահմանադրական դատարան պարզելու՝ արդոք այն համապատասխանում է Սահմանադրության պահանջներին: Այդ ժամանակահատվածը բավարար կլինի խորհրդարանը ցրելու և արտահերթ խորհրդարանական ընտրություններ անցկացնելու համար:

Ի՞նչ դիրքորոշում ունի Արմեն Սարգսյանը

Արմեն Սարգսյանն արդեն հայտարարել է, որ Հայաստան վերադառնալուց հետո պատրաստվում է քննարկումներ սկսել քաղաքական ուժերի հետ:

Այն հարցը, թե արդյոք Սարգսյանը կստորագրի օրինագիծը, քննարկվում է նաև հայկական լրատվամիջոցներում:

«Լրագիր» պարբերականի քաղաքական տեսաբան Հակոբ Բադալյանը կարծում է, որ Հայաստանի նախագահը հակապետական քայլ կանի, եթե ստորագրի օրինագիծը.

«Եթե Արմեն Սարգսյանը ստորագրի այդ օրինագիծը, նա փաստացի կարժեզրկի իր  ստացած մրցանակը: Պետական գործիչը չի կարող ստորագրել մի օրինագիծ, որը նախաձեռնել են հակապետական գործիչները»:

Փորձագետը կարծում է, որ երկրի նախագահն այդպիսի քայլի չի գնա, քանի որ դա կբերի երկրում քաղաքական ճգնաժամի խորացման:

Ինչպե՞ս է Արմեն Սարգսյանը դարձել Հայաստանի նախագահ

Արմեն Սարգսյանը երկրի նախագահ է ընտրվել ոչ թե համընդհանուր ժողովրդական քվեարկության արդյունքում, այլ խորհրդարանի պատգամավորների կողմից: Նրա թեկնածույթունն է առաջադրել Հայաստանի նախկին նախագահ Սերժ Սարգսյանը՝ ՀՀԿ առաջնորդը:

Հեղափոխության օրերին Արմեն Սարգսյանը որպես միջնորդ հանդես եկավ ընդդիմադիր պատգամավոր և բողոքի շարժման առաջնորդ Նիկոլ Փաշինյանի և Սերժ Սարգսյանի միջև: