Հայաստանի ԱԳՆ-ն առաջին անգամ հավատարմագրել է ադրբեջանական լրատվամիջոցի խմբագրի
Հայաստանի արտգործնախարարությունը հավատարմագրել է «Թուրան» տեղեկատվական գործակալության գլխավոր խմբագիր Շահին Հաջիևին։
Տեղեկություններ Երևանից
Հայաստանի ԱԳՆ մամուլի քարտուղար Աննա Նաղդալյանը մեկնաբանել է գերատեսչության այդ որոշումը։
«Նրա [խոսքը Շահին Հաջիևի մասին է — JAMnews] կողմից հայտ էր ներկայացվել ՀՀ ԱԳՆ` հավատարմագրվելու և համապատասխան լրագրողական գործունեություն ծավալելու Հայաստանում: Բոլոր նախանշված ընթացակարգերը անցնելուց հետո վերջինիս հայտը բավարարվել է, և նա իր լրագրողական խմբով այցելել է Հայաստան»։
Հայաստանի արտգործնախարարությունից հաղորդում են նաև, որ այցը զուտ պրոֆեսիոնալ բնույթ է կրում։ Ադրբեջանցի խմբագրի հայտը գնահատվում է որպես բնական․ ամեն օր գերատեսչությունն արտասահմանցի լրագրողներից տասնայկ այսպիսի հայտեր է ստանում։
• Հայաստանի և Ադրբեջանի առաջնորդները քննարկել են ղարաբաղյան հակամարտության կարգավորումը
• Հայաստանը պլանավորում է բանակի զարգացման գործում 2,5 մլրդ դոլար ներդնել
Ադրբեջանցի լրագրողի առաջին հարցազրույցը
Շահին Հաջիևը Հայաստանում արդեն հասցրել է վերցնել առաջին հարցազրույցը։ Խոսնակը Հայաստանի Ազգային ժողովի նախկին պատգամավոր և երկրի նախագահի խորհրդական Թևան Պողոսյանն է եղել։ Նա ֆեյսբուքյան իր էջում գրել է, որ ադրբեջանցի լրագրողը վստահեցրել է իրեն․ ասվածի իմաստը չի խեղաթյուրվելու։
Տեղեկություններ Բաքվից
«Թուրան» գործակալությունը հաղորդում է, որ այցը համաձայնեցվել է Ադրբեջանի և Հայաստանի համապատասխան մարմինների հետ։ Նշվում է նաև, որ Երևանում Շահին Հաջիևը հանդիպում է քաղաքական կուսակցությունների ներկայացուցիչների և փորձագետների հետ։ Այցի արդյունքը պետք է լինի տեսանյութ և տպագիր ռեպորտաժներ ղարաբաղյան կարգավորման և տարածաշրջանում տիրող իրավիճակի մասին։
«Թուրան» գործակալությունը լրագրողներին խնդրել է օգտագործել այդ տեղեկությունները, չխեղաթյուրել դրանք և ոչինչ չավելացնել։
«Թուրան» գործակալության մասին
«Թուրան» տեղեկատվական գործակալությունը նախկին ԽՍՀՄ առաջին անկախ գործակալություններից է և Ադրբեջանի ամենահին գործակալությունը։ Այն հիմնադրվել է 1990թ-ի մասյիսին Բաքվում մի խումբ լրագրողների կողմից։ 2017թ-ին այն ժամանակավորապես փակվել էր հարկերի չվճարման մեղադրանքով։ Կրկին սկսել է աշխատել մի քանի ամիս անց։ Լրագրողների պաշտպանության միջազգային կոմիտեն (CPJ) այն անվանել է Ադրբեջանի միակ անկախ տեղեկատվական գործակալությունը։
