Կորոնավիրուս․ Իտալիան դառնում է Եվրոպայում հիվանդության տարածման օջախ։ Թարմացում

Փետրվարի 26

Իտալիայից, որտեղ 300 մարդ է վարակվել, 11 մարդ մահացել կորոնավիրուսից,  հիվանդությունը տեղափոխվել է եվրոպական այլ երկրներ՝ Ավստրիա, Խորվաթիա և Շվեյցարիա, որտեղ առաջին դեպքերն են գրանցվել, հաղորդում է Բի-Բի-Սի-ն։ 

Աֆրիկայում կորոնավիրուսի առաջին դեպքը հայտնաբերվել է Ալժիրում, Լատինական Ամերիկայում էլ գրանցվել է հիվանդության դեպք Բրազիլիայում։ Հիվանդ բրազիլացին վերջերս է Իտալիայից վերադարձել։

Այնուամենայնիվ, Ֆրանսիայի, Իտալիայի, Գերմանիայի առողջապահության նախարարների և Եվրահանձնաժողովի ներկայացուցիչների հանդիպմանը որոշում է կայացվել չփակել Իտալիայի հետ սահմանները։

Այդ հանդիպմանը Գերմանիայի առողջապահության նախարարը հայտարարել է, որ Իտալիայի հարևաններն իրավիճակին «շատ, շատ լուրջ են» վերաբերվում, և այն «կարող է ավելի շուտ վատթարանալ, քան կսկսի բարելավվել»։

Մեծ Բրիտանիայում դպրոցականերին, որոնք արձակուրդն Իտալիայում են անցկացրել, արգելել են դասի գնալ։ Սակայն երկու երկրների միջև ավիահաղորդակցությունը չի խզվել։

Իրան

Իրանում պաշտոնապես վարակված է պակաս, քան 100 մարդ, սակայն մեծ մտավախություններ կան, որ նրանց թիվը շատ ավելի մեծ է։ Այս մասին, մասնավորապես, հայտարարել է տեղի խորհրդարանական Ահմադ Ամիրաբադի–Ֆարահանին, որը Ղոմ քաղաքից է։ Նա իշխանություններին հայտարարել է, որ նրանք ստում են երկրում կորոնավիրուսի տարածման մասշտաբների մասին։

Ի պատասխան Իրանի առողջապահության փոխնախարար Հարիրչին հայտարարել է, որ մահացության հաստատված դեպքերն ընդամենը 12–ն են, և ասել, որ հրաժարական կտա, եթե որևէ մեկն ապացուցի, որ այդ թվերը սխալ են։ Դա ընդամենը երկու օր առաջ էր, և արդեն փետրվարի 26–ին Հարիրչին հոսպիտալացվել է, նրա մոտ կորոնավիրուս է հայտնաբերվել։

•Կորոնավիրուսը մոտենում է Կովկասի սահմաններին։ Ինչպե՞ս են դրան արձագանքում Ադրբեջանում, Հայաստանում և Վրաստանում 

•Թե ինչպես են փրկում հազարավոր ընտանի կենդանիներին, որոնց լքել են կորոնավիրուսի համաճարակի գոտում 

Ավելի քան 1100 մարդ է վարակվել Հարավային Կորեայում, որտեղ 11 մարդ է զոհվել։ Երկրում վարակվածների ամենամեծ թիվն է Չինաստանից հետո։

Փետրվարի 25

Առողջապահության համաշխարհային կազմակերպությունը հայտարարել է, որ աշխարհը պետք է պատրաստվի կորոնավիրուսի պանդեմիային, հաղորդում է Բի-Բի-Սի-ն ։

Դա այն դրությունն է, երբ վարակը մարդուց մարդուն է փոխանցվում աշխարհի տարբեր կողմերում։ Դա դեռևս տեղի չի ունեցել, սակայն «երկրները պետք է պատրաստ լինեն»։

Չինաստանից բացի, որտեղ առաջացել է նոր կորոնավիրուսն, այժմ հիվանդությունը գրանցվել է աշխարհի ևս 30 երկրում։

Տնտեսագետների հաշվարկների համաձայն՝ 2020 թ–ին համաշխարհային տնտեսությունը կարող է վարակի պատճառով կորցնել շուրջ 1 տրիլիոն դոլար։

Կորոնավիրուսով կարող է վարակվել Երկրի բնակչության 40–ից 70 տոկոսը

The Atlantic–ը հաղորդում է այն եզրակացությունների մասին, որոնց հանգել է Հարվարդի համալսարանի համաճարակաբան Մարկ Լիփսիտչը։

Մի կողմից, եզրակացությունները տագնապալի են․ վարակվել կարող է Երկրի բնակչության 40–ից 70 տոկոսը։

Մյուս կողմից, խուճապի հիմքեր չկան։ Կորոնավիրուսն այդքան արագ տարածվում է, որովհետև այն պակաս ագրեսիվ է, քան նախորդ տարիներին հայտնված «խոզի» և «թռչնի» գրիպն, ինչպես նաև ատիպիկ թոքաբորբը։

Հիվանդությունն ավելի մեղմ է ընթանում, երբեմն՝ առանց ախտանիշների․ այդ պատճառով էլ վարակակիրներին ավելի բարդ է հայտնաբերելը։

Փետրվարի 24

Խորհրդարանական Ահմադ Ամիրաբադի–Ֆարահանին, որը ծնունդով Իրանի Ղոմ քաղաքից է, իշխանություններին մեղադրել է այն բանի համար, որ նրանք ստում են երկրում կորոնավիրուսի տարածման մասշտաբների մասին։

Ղոմը հայտնվել է Իրանում հիվանդության հանկարծակի համաճարակի կենտրոնում։ Ամիրաբադի–Ֆարահանին պնդում է, որ միայն Ղոմում արդեն մահացել է ոչ պակաս, քան 50 մարդ, թեև դեռևս մի քանի օր առաջ ընդամենը 18 վարակված կար։

Սակայն Իրանի առողջապահության փոխնախարար Իրայ Հարիրչին հերքել է դա և հայտարարել, որ մահացության հաստատված դեպքերի քանակը 12 է։ Նա ասել է, որ հրաժարական կտա, եթե որևէ մեկն ապացուցի, որ այդ թվերը սխալ են, հաղորդում է Բի–Բի–Սի–ն։

Իրանի կառավարության պաշտոնական ներկայացուցիչ Ալի Ռաբիեյը նույնպես վստահաբար հայտարարել է, որ իշխանությունները ոչ մի դեպքում չեն թաքցնելու վարակից մահացության դեպքերը կամ հիվանդության վիճակագրությունը։

Սակայն Ամիրաբադի–Ֆարահանին հրաժարվել է հետ կանչել իր պահանջը։

«Ես փոխնախարարին 40 զոհի անուն եմ տվել։ Այժմ մենք սպասում ենք նրա հրաժարականին», – նրա խոսքերն է մեջբերում «Իլնա» գործակալությունը։

Երկու պաշտոնատար անձանց այս դիմակայությունն ու նման կարճ ժամանակահատվածում վարակվածների թվի անոմալ աճը մեծ դեբատներ են առաջացրել սոցցանցերում և կասկածներ, որ իրականում իշխանությունները չեն կարողանում պայքարել համաճարակի դեմ և թաքցնում են իրական տվյալները։

Այս պահի դրությամբ իշխանությունները հրահանգել են փակել Ղոմի դպրոցներն ու համալսարանները՝ վարակի տարածումը կանխելու համար։

Իտալիան Ասիայի սահմաններից դուրս ամենավատ իրավիճակում է

Մինչդեռ համաճարակը նորանոր երկրներ և տարածաշրջաններ է համակում։ Ասիայի սահմաններից դուրս վատթարագույն իրավիճակում է Իտալիան։

Լոմբարդիայի շրջանում հաստատվել է վարակման 219, մահացության 7 դեպք։ Ընդ որում, այստեղ մահվան առաջին դեպքի մասին հաղորդվել է դրանից ընդամենը երեք օր առաջ՝ փետրվարի 21–ին։

Եվրահանձնաժողովը փետրվարի 24–ին հայտարարել է, որ դեռևս չի դիտարկում Եվրամիության շենգենյան գոտու սահմանը փակելու մասին հարցն ի պատասխան Իտալիայում կորոնավիրուսի բռնկմանը։ Սակայն Իտալիայի ներսում և հարևան երկրների հետ տեղաշարժի սահմանափակումներ են մտցվել, որոնք վերաբերում են արդեն 70 հազար մարդու։

Հարավային Կորեայում բժշկական վտանգի արդեն երկրորդ մակարդակ է հայտարարվել։ Տարեցներին և քրոնիկական հիվանդություններ ունեցողներին հորդորվում է հրաժարվել ցանկացած ուղևորությունից։

Վարակման առաջին դեպքերն են գրանցվել Քուվեյթում, Բահրեյնում և Իրաքում։

Կորոնավիրուսի վիճակագրությունը փետրվարի 24–ի դրությամբ

Փետրվարի 24–ի տվյալների համաձայն՝ աշխարհում հաստատվել է կորոնավիրուսով վարակվելու 79,553 դեպք։ Հիվանդների բացարձակ մեծամասնությունը նախկինի պես Չինաստանի Հուբեյի շրջանում է։

Այսօրվա դրությամբ վարակից մահացել է 2,628 մարդ, ապաքինվել՝ 25,213 մարդ։

Ախարհում հիվանդության տարածմանը կարելի է հետևել այս առցանց քարտեզի միջոցով։

Համաճարակի տնտեսական հետևանքները

Համաճարակի հետևանքները սկսում է կրել համաշխարհային տնտեսությունը։ Տուժում են բոլոր այն ընկերությունները, որոնք կախված են Չինաստանի մատակարարումներից։

Դրան հետևում է բորսայի ցուցիչների անկումը․ ներդրողները դուրս են բերում միջոցներն իրական հատվածից և ներդնում դրանք նախևառաջ ոսկու մեջ, որի գինը յոթ տարում ռեկորդային մակարդակի է հասել։

Արտադրության կրճատման հետևանքով նվազում են հումքի, նախևառաջ՝ նավթի գները։