Կորոնավիրուսի հետևանքով ութերորդ մահն Ադրբեջանում և վարակման 76 նոր դեպք

Վարակվածների ընդհանուր թիվը հասել է 717-ի

Ադրբեջանում COVID-19 կորոնավիրուսի հետևանքով ութերորդ մահն է գրանցվել և վարակման 76 նոր դեպք։

Այսպիսով, ներկա պահին վարակվածների ընդհանուր թիվն, ըստ պաշտոնական տվյալների, կազմում է 717 մարդ։ Նրանցից 44–ն ապաքինվել է և դուրս գրվել հիվանդանոցից։

Ութերորդ մահացածը 67 տարեկան էր և, ինչպես կորոնավիրուսից Ադրբեջանում մահացած նախորդ հիվանդները, նա շաքարախտ ուներ։ 

Ադրբեջանում խիստ կարանտինային ռեժիմ է հայտարարվել (բայց ոչ արտակարգ դրություն)։ 

Փակ է կազմակերպությունների, ձեռնարկությունների և առևտրի կենտրոնների մեծ մասը։ Փակ է նաև մետրոն, բոլոր այգիներն ու պուրակները։

Ապրիլի 5–ից քաղաքացիների տեղաշարժի խիստ սահմանափակում է մտցվել․ տնից դուրս գալու համար պետք է աշխատավայրից տեղեկաք ունենալ կամ իշխանություններին sms-հաղորդագրություն ուղարկել՝ նշելով ելքի նպատակը։